Álıhan Smaıylov óz qyzmetinde nesimen este qaldy
ASTANA. KAZINFORM – QR Premer-mınıstri Álıhan Smaıylov qazaqstandyq mınıstrler kabınetin eki jyldan astam ýaqyt basqardy. KAZINFORM agenttigi osy ýaqytta Álıhan Smaıylov tikeleı qatysqan kóptegen oqıǵalarǵa sholý usynady.
Álıhan Smaıylov 2018 jyly mınıstrler kabınetine kelip, Qarjy mınıstri boldy. Bul qyzmette Á. Smaıylov Úkimettiń keńeıtilgen otyrysynda sol kezdegi QR Prezıdenti Nursultan Nazarbaevtyń mınıstrler kabınetin nashar jumysy úshin ábden synǵa alyp, Premer-Mınıstrge jaqyn otyrýymen este qalǵan edi.
Bir jyldan keıin Á. Smaıylov Premer-Mınıstrdiń orynbasary laýazymyna taǵaıyndalyp, onda shamamen 3 jyl jumys istedi.
2022 jyldyń basynda Qańtar oqıǵasy elimizdi dúr silkindirdi, bul Úkimet quramyna da túbegeıli áser etip, Asqar Mamın bastaǵan mınıstrler kabıneti otstavkaǵa ketti. Bul rette Á. Smaıylov qaıta oralyp qana qoımaı, Premer-Mınıstrdiń mindetin atqarýshy boldy, sodan keıin osy laýazymǵa resmı túrde bekitildi.
Á. Smaıylovtyń jańa qyzmettegi alǵashqy sheshimderiniń biri – otyn baǵasyn 180 kúnge memlekettik retteýdi engizý boldy. Qańtar oqıǵasyndaǵy qazaqstandyqtar narazylyǵynyń resmı sebebi suıytylǵan gaz baǵasynyń ósýi bolǵanyn eskersek, muny Úkimettiń tıisti reaktsııasy dep sanaýǵa bolady.
2022 jyly Premer-Mınıstr óz laýazymyndaǵy eń aýyr synaqtardyń birine tap boldy. Qys mezgilinde bir ýaqytta birneshe aımaqta jylýmen baılanysty úlken problemalar týyndady. Nátıjesinde Ekibastuz ben Rıdder turǵyndary jylýsyz qaldy, Premer-Mınıstrdiń orynbasary Roman Sklıar aımaqtarǵa shuǵyl attandy, biraq ol jyldar boıy jınaqtalǵan máselelerdi sheshe almady. Sonymen qatar, bul jaǵdaı 15-ten astam JEO-nyń aýyr jaǵdaıda bolǵanyn, al olardy jóndeýge mıllıardtaǵan qarjy qajet ekenin anyqtady. Úkimet jaǵdaıdy túzetý úshin jumysqa kiristi.
Sondaı-aq, Á. Smaıylovtyń bıligi kezinde «Arselor Mıttal» kompanııasynyń shahtalarynda birneshe apat boldy. Aty shýly kompanııa shahtalarynda buǵan deıin de qaıǵyly oqıǵalar bolǵanyn ádildik úshin atap ótken jón. Degenmen, sońǵy sátke deıin Á. Smaıylovtyń basshylyǵymen Úkimet tarapynan tıimdi sharalar qabyldanbady. Saldarynan, Á. Smaıylov basqaratyn mınıstrler kabıneti tusynda eki jylda tórt iri apat boldy, ondaǵan adam ajal qushty.
Atap aıtqanda, 2022 jyldyń maýsym aıynda AMT kompanııasynyń nysandarynda bir aptada bes adam qaza tapty – Temirtaýda otqa tózimdi qurylǵyny bólshekteý kezinde tórt qyzmetker qaza tapty jáne bireýi JEO-2 qazandyǵynda mert boldy.
Sol jyldyń qarasha aıynda Qaraǵandy oblysyndaǵy kásiporynnyń Lenın atyndaǵy kómir shahtasynda metan gazy kenetten taraǵan. Jarylys kezinde shahtada 106 adam boldy, onyń 5-eýi qaıtys boldy, 9-y zardap shekti. 2023 jyly 17 tamyzda Qaraǵandy oblysyndaǵy «Qazaqstan» shahtasynda D6 kómir eńisin (gorızont – 170 m) qazýda konveıerlik taspa órtendi. Onda shahtada 227 adam boldy, 5 adam qaza taýyp, 11 adam jaraqat aldy. Premer Tótenshe jaǵdaıla jáne Ekologııa mınıstrlikterinen tıisti sheshim qabyldaý úshin «ArselorMıttal Temirtaý» AQ-da júrgizilip jatqan ónerkásiptik jáne ekologııalyq aýdıtterdi jedel aıaqtaýdy talap etti. Ýaqyt kórsetkendeı, bul sharalar kútken nátıje bermedi – 2023 jyly qazan aıynyń sońynda taǵy bir qaıǵyly oqıǵa boldy, bul joly Kostenko shahtasynda jarylys bolyp, 46 kenshiniń ómiri qıyldy.
Nátıjesinde AMT-ny memleket menshigine ótkizýdi jedeldetý týraly sheshim qabyldandy.
Smaıylovtyń tusynda alapat órtter de boldy. El tarıhyndaǵy eń iri órtterdiń biri Abaı oblysynda oryn aldy, ony sóndirý kezinde «Semeı ormany» RMÝ Novoshýlba fılıalynyń 14 qyzmetkeri, onyń ishinde Ýspen ormanshylyǵynyń basshysy Meıramgúl Jıenbaeva qaza tapty. Órttiń resmı sebebi naızaǵaıdyń túsýi dep ataldy. Biraq resmı aqparat kózderi habarlaǵandaı, aýa raıy da jaǵdaıdy nasharlatty – qatty ystyq pen jel órttiń júzdegen gektarǵa taralýyna yqpal etken.
