Álıhan Smaıylov: «Báıterek» holdıngi eski qaryzdaryn jańa qaryzben jaýyp otyr
ASTANA. KAZINFORM – Joǵary aýdıtorlyq palata tóraǵasy Álıhan Smaıylov Jibek Joly telearnasyndaǵy «Ýáde» baǵdarlamasynda «Báıterek» holdınginiń qaryzdardy basqarý saıasatyndaǵy júıeli problemalardy atady.
- Bıyl biz «Báıterek» ulttyq basqarý holdınginde aýdıtorlyq is-shara júrgizdik. Bul jerdegi júıelik problemalardy anyqtadyq. Mysaly, qaryzǵa alynǵan qarajatty basqarý máselesi bar. Qazir «Báıterek» holdınginiń shoǵyrlandyrylǵan boryshynyń kólemi 8 trln teńgeden asyp otyr. Jańadan qaryzǵa alynǵan qarajattyń bir bóligi ınvestıtsııalyq jobalarǵa jiberýdiń ornyna ishki problemalardy sheshý men buryn alynǵan qaryzdardy jabýǵa baǵyttalyp otyr, - dedi ol.
Palata basshysy «Damý» qorynyń basshylyǵy memleket kepildigimen qaryz alý máselesine tym nemquraıdy qaraıtynyn aıtady.
- «Damý» qory ekonomıkany ártaraptandyrý úshin «Azııa» damý bankinen memlekettik kepildikpen qomaqty aqshany qaryzǵa alady. Ol qarajatty ekinshi deńgeıli bankter men mıkroqarjy uıymdary arqyly shaǵyn jáne orta bıznesti qarjylandyrýǵa jiberý kerek bolǵan. Biraq bıznes tarapynan tıisti usynymdardyń jetispeýine baılanysty 11 mlrd teńge «Damý» qoryna qaıtarylǵan. Sonda bul qaryz ne úshin alyndy degen suraq týyndaıdy, - dedi Álıhan Smaıylov.
Buǵan deıin Joǵary aýdıtorlyq palata júrgizgen aýdıtter nátıjesinde 2024 jyly 135 mlrd teńge bıýdjetke qaıtarylǵanyn jazǵan edik.