Áleýmettik medıtsınalyq saqtandyrý qoryna jańa basshy taǵaıyndaldy

ASTANA. KAZINFORM – QR Qarjy mınıstrliginiń apparat basshysy Ernar Erjanov «Áleýmettik medıtsınalyq saqtandyrý qory» KeAQ ujymyna jańa basqarma tóraǵasy Gúlmıra Sabdenbekti tanystyrdy.

G.Sabdenbek ár jyldary basshylyq qyzmet atqardy. Atap aıtqanda, Ulttyq medıtsınalyq holdıngtiń strategııalyq damý departamentine jetekshilik etti. Sonymen qosa «Ulttyq ǵylymı kardıohırýrgııalyq ortalyǵy» AQ basqarma tóraǵasynyń orynbasary boldy.

Keıingi qyzmette QR Prezıdenti Ákimshiligi Áleýmettik-ekonomıkalyq saıasat bólimi meńgerýshisiniń orynbasary bolyp, áleýmettik saıasat jáne ornyqty damý, memlekettik aýdıt, sondaı-aq qarjylyq baqylaý máselelerimen aınalysqanyn atap ótken jón.

Budan bólek ujymǵa basqarma tóraǵasynyń birinshi orynbasary Aıdar Mekebekov tanystyryldy. Ol Qarjy mınıstrliginiń júıesinde uzaq jyl jumys istegen. Aıtalyq, salyq ınspektorynan bastap memlekettik kirister jáne qarjylyq baqylaý organdarynyń bólimshelerinde basshylyq qyzmet atqarǵan. Sol sekildi Qarjy monıtorıngi komıteti tóraǵasynyń orynbasary bolǵan.Búginge deıin «Qazaqmys korporatsııasy» JShS-de urlyqqa qarsy is-qımyl jónindegi departament dırektory bolyp, eńbek etken.

Úkimettiń Mindetti áleýmettik medıtsınalyq saqtandyrý qoryn Qarjy mınıstrliginiń qaramaǵyna berý sheshimi durys. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev aıtty.