Áleýmettik ámııan: Oqýshylardyń ystyq asy endi tsıfrlyq baqylaýda
ASTANA.KAZINFORM — Ótken jyldan bastap Qazaqstan mektepterinde «Áleýmettik ámııan» atty jańa tsıfrlyq júıe synaqtan ótýde.
Bul júıe 5–11 synyptarda áleýmettik kómek alatyn otbasylardyń balalaryna beriletin tegin ystyq tamaqtyń ádil ári ashyq túrde taratylýyn qamtamasyz etýge baǵyttalǵan.
Jańa júıeniń basty ereksheligi – ata-analardan eshqandaı qaǵaz qujat jınaýdyń qajeti joq. Qoldaý alý quqyǵy memlekettik derekter bazasy arqyly avtomatty túrde anyqtalady.
«Áleýmettik ámııan» tsıfrlyq sheshimi memlekettik qoldaýdy aldyn ala ózi anyqtap, avtomatty túrde kórsetip qana qoımaı, oqýshynyń tıesili tamaqty alǵanyna naqty kóz jetkizýge múmkindik beredi.
«Áleýmettik ámııan» júıesiniń jumys isteý tártibi:
«Áleýmettik ámııan» – memlekettik qoldaýǵa quqyǵy bar otbasylardyń balalaryna tegin ystyq tamaq berý úderisin avtomattandyrýǵa jáne ashyq baqylaýǵa arnalǵan tsıfrlyq sheshim. Júıe ata-analarǵa eshqandaı qaǵaz qujat ótkizbeı, balasynyń tegin tamaqtanýǵa quqyǵy bar ekendigi týraly habarlama jiberedi.
Ata-ana kelisimin bergen jaǵdaıda, otbasyǵa avtomatty túrde tsıfrlyq tamaqtaný vaýcheri qurylady. Bul vaýcherdi ata-ana eGov mobile qosymshasy arqyly iske qosady. Oqýshy mektep ashanasynda arnaıy sáıkestendirý ádisteri – QR-kod, karta nemese Face ID arqyly ystyq tamaq alady. Osydan keıin ata-ananyń telefonyna balasynyń mektepte tamaqtanǵany jóninde habarlama jiberiledi.
Júıede keri baılanys fýnktsııasy da qarastyrylǵan – ata-ana berilgen taǵamnyń sapasyna baǵa bere alady. Al aıdyń sońynda kórsetilgen naqty qyzmetter negizinde avtomatty túrde oryndalǵan jumystar aktisi jasalyp, jetkizýshige tek naqty qyzmetter úshin tólem júrgiziledi.
Qazirgi tańda «Áleýmettik ámııan» júıesi pılottyq rejımde 20 mektepte synnan ótýde: onyń 10-y Astana qalasynda, qalǵan 10-y Qostanaı oblysynda ornalasqan. Pılottyq joba tehnologııany naqty jaǵdaıda tekserýge, ata-analar, muǵalimder men jetkizýshilerden keri baılanys alýǵa, sondaı-aq bolashaqta júıeni keń kólemde engizýge daıyndyq júrgizýge múmkindik beredi.
Pılottyq kezeńniń nátıjelerine qaraı, júıeni 1–4 synyp oqýshylaryna da kezeń-kezeńmen engizý josparlanyp otyr. Bul sheshim bilim berý salasyndaǵy barlyq jas toptary úshin tamaqtaný úderisin birizdi etip, memlekettik qoldaýdyń ashyqtyǵy men ádilettiligin kúsheıtedi.
Kútiletin nátıjeler:
- Memlekettik kómektiń naqty qajet adamdarǵa jetýi
- Qyzmet kórsetý barysynyń ashyqtyǵy
- Ata-analar úshin yńǵaıly baqylaý múmkindigi
- Mektep ákimshiliginiń jumysyn jeńildetý
- Jetkizýshiler úshin ádil tólem kepildigi
Memlekettik qoldaýdy tsıfrlandyrý – bul jaı ǵana tehnologııa emes. Bul - árbir memlekettik kómektiń óz ıesine dál ári ádil túrde jetýin qamtamasyz etetin senim júıesin qalyptastyrý.
Aıta keteıik, emhanalarǵa qarasty dárihanalardyń 100%-y «Áleýmettik ámııan» jobasyna qosyldy.