Áleýmettik turaqtylyqty qoldaý turǵysynda 2016 jyldan qajetti qadamdar eskerilip otyr
Osy baǵytta atqarylatyn sharalarda «Jańa áleýmettik saıasat» baǵyttynyń orny erekshe. Memleket basshysy Qazaqstan halqyna Joldaýynda atap ótken jańa áleýmettik saıasat aıasynda birqatar mańyzdy sharalar eskerilip otyr.
Birinshiden - áleýmettik qamtamasyz etý júıesin ońtaılandyrý, áleýmettik ataýly kómektiń jańa formatyn engizý tájirıbesin keńeıtý, eń tómengi kúnkóris deńgeıiniń shamasyn aıqyndaý ádisnamasyn ózgertý, sondaı-aq azyq-túlik sebetiniń quramyn jáne tamaq ónimderin tutynýdyń eń tómengi normalaryn qaıta qaraý maqsatynda 2030 jylǵa deıin áleýmettik damý Tujyrymdamasy ózektilendiriletin bolady.
Sonymen qatar aǵymdaǵy jyldyń sońyna deıin 2016-2019 jyldarǵa arnalǵan Densaýlyq saqtaýdy damytýdyń memlekettik baǵdarlamasy, 2016 jylǵy 1 naýryzǵa deıin jańa Bilim jáne ǵylymdy damytýdyń memlekettik baǵdarlamasynyń jobasy ázirlenedi. Bul turǵydaǵy jumystar atalǵan mańyzdy eki salaǵa tyń serpin berýge negizdelip otyr.
Aıta keterligi, 2017 jyldan bastap bilim berý salasynda «Barshaǵa arnalǵan kásiptik-tehnıkalyq tegin bilim» týraly jańa jobany iske asyrý bastalatyn bolady.
Budan bólek, halyqtyń turǵyn úıge qoljetimdilik deńgeıin arttyrý turǵysynda aldaǵy jyldan bastap tıisti sharalar qolǵa alynbaq. «Halyqtyń turǵyn úıge qoljetimdilik deńgeıin arttyrý úshin 2016-2018 jyldary jalǵa beriletin alańy 817 myń sh.m. nemese shamamen 13 600 páter turǵyn úı salý jáne ony satyp alý qamtamasyz etiledi. «Turǵyn úı qurylys jınaq banki» AQ klıentteriniń barlyq salymdaryna ótemaqy berý úshin Úkimet rezervinen 2016 jyly 20,9 mlrd. teńge jáne 2017 jyly 16 mlrd. teńge bólinetin bolady»,-dedi Úkimet otyrysynda QR Ulttyq ekonomıka mınıstri Erbolat Dosaev.
Turǵyn-úı qurylysyndaǵy úleskerlik salymdardy kepildendirý qoryn qurý maqsatynda «Báıterek» UBH» AQ jarǵylyq kapıtalyn 10 mlrd. teńgege ulǵaıtý kózdelip otyr. Budan basqa, bıýdjettik kredıtteý jáne sýbsıdııalaý tetigi arqyly 298 shaqyrym jylýmen, sýmen jabdyqtaý jáne sý burý jelileri salynyp jáne rekonstrýktsııalanatyn bolady.
Áleýmettik turaqtylyq jáne jumyspen qamtýdy qoldaý turǵysynda 2016 jyldan qajetti qadamdar eskerilip otyr. Máselen, áleýmettik mańyzy bar azyq-túlik taýarlaryna baǵanyń ósýine jol bermeý úshin, 2016-2017 jyldary olarǵa bólshek baǵanyń shekti mánderi belgilenbek. Ulttyq ekonomıka mınıstrligi bul quzyrettilik 2018 jylǵy 1 qańtardan bastap joıylatyndyǵyn alǵa tartýda. Atap óterligi, 2016-2018 jyldary áleýmettik mańyzy bar azyq-túlik taýarlaryna taýarlyq ınterventsııalar júrgizý, resýrstardy tıimdi paıdalaný jáne ýaqtyly tolyqtyrý úshin turaqtandyrý qorlarynyń jumysy jalǵasatyn bolady.
«Jumyspen qamtýdy qoldaý maqsatynda 2016 jyly óńirlik Jumyspen qamtýǵa járdemdesýdiń keshendi josparlaryn iske asyrý jalǵastyrylatyn bolady jáne kadrlarǵa qajettilikti aıqyndaý arqyly jumyskerlerdiń bosatylýy men jańadan qurylatyn jumys oryndarynyń jıyntyq kartasy ózektendiriledi. 2016 jylǵy naýryzda eldegi áleýmettik-ekonomıkalyq jaǵdaı nasharlaıtyn bolsa, az qamtylǵan otbasylarǵa qosymsha maqsatty kómek kórsetý boıynsha usynystar engiziletin bolady»,-deıdi Erbolat Dosaev.
Aıtpaqshy, Úkimet músheleri «Jumyspen qamtý jol kartasy-2020» jobasyn maquldady. Atalǵan qujat jobasyn tanystyrǵan QR Densaýlyq saqtaý jáne áleýmettik damý mınıstri Tamara Dúısenova «Jumyspen qamtý jol kartasy-2020» jobasynyń Memleket basshysy N.Nazarbaevtyń tapsyrmasyna sáıkes ázirlengenin atap ótti. Onyń aıtýynsha, bilikti jumysshylardyń jumys oryndaryn saqtaý úshin jobada óndiris kólemi nemese ónim baǵasy tómendegende iri ónerkásip kásiporyndaryndaǵy jumys ýaqytynyń qysqarǵany úshin jumysshylardyń jalaqysynyń bir bóligin ýaqytsha sýbsıdııalaý mehanızmin engizý kózdelgen.
«Ýaqytsha sýbsıdııalaý bilikti jumysshynyń jumys ýaqytynyń qysqarýyna oraı joǵaltqan jalaqysynyń úshten eki kóleminde usynylyp otyr. Bul rette ónerkásip kásiporny kelesi sharttardyń birine saı bolýy tıis: qala quraýshy kásiporyn bolýy tıis; eksportqa shyǵarylatyn taýarynyń úlesi atalǵan kásiporyn óndiretin taýlarlardyń jalpy kóleminiń 30 paıyzynan kem bolmaýy qajet; ishki naryqqa jetkizetin taýarynyń úlesi oblystyq kólemnen 30 paıyzdan, dál sol taýarlardy respýblıkalyq kólemnen 10 paıyzǵa kem bolmaýy kerek», - dedi mınıstr.