Áleýmettik osal topqa jatatyn elordalyq túlekterdiń oqý aqysy tólenedi

NUR-SULTAN. QazAqparat – Áleýmettik osal topqa jatatyn elordalyq túlekterdiń JOO-larda bilim alý aqysyn ákimdik óteıdi. Bul týraly Nur-Sultan qalasynyń ákimi Altaı Kólginov óziniń Instagram paraqshasynda jazdy.

«Jańa oqý jylynda pedagogıkalyq jáne medıtsınalyq mamandyqtar boıynsha joǵary bilim alýǵa 1 300-ge jýyq grant bólýdi josparlap otyrmyz. Odan bólek, áleýmettik kómek boıynsha jeke baǵdarlama qarastyrylǵan. Jaǵdaıy tómen otbasylardan shyqqan talapkerlerdiń qala ýnıversıtetterinde bilim alýy úshin oqý aqysyn tóleý túrinde áleýmettik kómek kórsetemiz. Bul baǵdarlama boıynsha qujattardy qabyldaý 21 tamyzǵa deıin jalǵasady.

Oqý aqysyn tóleý túrindegi áleýmettik kómek jetim balalar, balalar úıiniń túlekteri, bala kúninen múgedek, kópbalaly otbasylardan shyqqan balalar arasynda bólinedi.

Bilim alý eńbek naryǵynda suranysqa ıe mamandyqtar boıynsha júrgiziledi. Olar - bıotehnologııa, esepteý tehnıkasy jáne baǵdarlamalyq qamtamasyz etý, geodezııa jáne kartografııa, sáýlet, mektepke deıingi bilim berý, ınjener, jalpy medıtsına, pedagogıka, IT sala, jylý energetıkasy, azyq-túlik ónimderiniń tehnologııasy, elektr energetıkasy jáne ózgeleri», - dep jazdy bas shahardyń ákimi.

Altaı Kólginovtiń dereginshe, atalǵan áleýmettik kómekti alý úshin qalanyń jumyspen qamtý jáne áleýmettik qorǵaý basqarmasyna habarlasý kerek. Sondaı-aq, ótinishti egov portaly arqyly elektrondy túrde berýge bolady.