Áleýmettik kásipker mártebesin alý úshin qandaı rásimderden ótý kerek
«Áleýmettik kásipkerlikti memlekettik qoldaý zań boıynsha 2022 jyldyń qańtarynan bastap kúshine endi. Bizdiń tizilimge kásipkerler tirkelip jatyr. Ár toqsan saıyn osy tizilim jańartylyp turady. Jergilikti atqarýshy organdarda arnaıy komıssııa qurylǵan. Olar berilgen ótinishterdi qarap, mınıstrlikke tapsyrady. Odan keıin biz kásipkerlerdi tizilimge tirkeımiz», - dedi M. Isaeva Ortalyq kommýnıkatsııalar qyzmetinde.
Osy oraıda ol zańnamada alǵash ret áleýmettik kásipkerlikke anyqtama berilgenin atap ótti. Bul turǵyda toqsan saıyn ár kásipker osy baǵytta óziniń ótinishin berýge quqyly.
Óz kezeginde áleýmettik kásipker Emın Askerov barlyq oblys ortalyǵynda komıssııalar jasaqtalǵanyn, bul komıssııalar ótinishterdi qabyldaý men áleýmettik kásipker reestrin qurýmen aınalysatynyn jetkizdi.
«Resmı mártebe alý úshin áleýmettik kásipker tapsyratyn qujattar tizimi bar. Osydan keıin oblystyq ákimdikter biryńǵaı reestrdi qurý úshin barsha málimetti Ulttyq ekonomıka mınıstrligine ótkizedi. Bul rásimderden soń áleýmettik kásipkerler memleket tarapynan bolatyn jeńildikterge ıe bolady», - dedi E. Askerov.
Aıta keteıik, byltyr jazda «Qazaqstan Respýblıkasynyń keıbir zańnamalyq aktilerine kásipkerlik, áleýmettik kásipkerlik jáne mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» Zańy qabyldandy.
Qujat halyqtyń áleýmettik osal toptaryn jumyspen qamtýdy qamtamasyz etýge járdemdesýge, áleýmettik problemalardy sheshýge kásipkerlik sýbektileriniń qatysýyn qoldaýǵa jáne áleýmettik kásipkerlerdiń taýarlaryn, jumystary men kórsetiletin qyzmetterin naryqta ilgeriletýge baǵyttalǵan.
Engiziletin ózgerister men tolyqtyrýlar boıynsha, áleýmettik kásipkerler halyqtyń áleýmettik osal toptary qataryndaǵy óz qyzmetkerlerin oqytyp, biliktiligin arttyrsa, salyq jeńildikterine ıe bolmaq.
Sondaı-aq, memleket áleýmettik kásipkerlik nysandaryn ınfraqurylymmen qamtamasyz etýge jáne olarǵa qarjylyq, aqparattyq, konsýltatsııalyq, ádistemelik kómek kórsetýge mindetteledi.
«Memleket basshysy áleýmettik máselelerdi sheshýge, az qamtylǵan azamattar men erekshe qajettilikteri bar adamdarǵa qoldaý kórsetýge únemi kóńil bóledi. Bul turǵyda áleýmettik kásipkerlikti damytýdyń mańyzy zor. Bul ózgerister men tolyqtyrýlardy Senat depýtattary bastamashylyq etkenin jáne daıyndaǵanyn erekshe atap ótken jón. Otandyq zańnamada alǵash ret áleýmettik kásipkerlikke anyqtama berilip otyr», - dedi Senat tóraǵasy Máýlen Áshimbaev.
Memleket basshysynyń tapsyrmalaryn iske asyrý úshin osy Zań aıasynda ekonomıkalyq ósimdi qalpyna keltirý jáne pandemııadan zardap shekken kásipkerlerdi qoldaý boıynsha qosymsha sharalar kózdelgen.
«Zań óńdeý salasyndaǵy jańa kásiporyndarǵa qosylǵan qun salyǵyn 70 paıyzǵa tómendetýdi, óńdeýshi ónerkásiptiń jańa negizgi qorlaryna qaıta ınvestıtsııalanǵan tabysty korporatıvtik tabys salyǵynan bosatýdy kózdeıdi. Sondaı-aq, jeke kásipkerlikti qoldaý úshin arnaıy mobıldik qosymshany paıdalaný arqyly arnaıy salyq rejımi engiziledi. Bul jeke kásipkerler qyzmetiniń jekelegen protsesterin jáne olardyń salyq organdarymen ózara is - qımylyn jeńildetedi», - dedi Senat tóraǵasy.
