Álemniń TOP-10 úzdik ýnıversıteti belgili boldy
ASTANA. KAZINFORM — Eýropa jáne Amerıka ýnıversıtetteri 2024 jylǵy álem ýnıversıtetteriniń akademııalyq reıtınginde (ARWU) kósh bastap tur. Garvard ýnıversıteti taǵy da birinshi orynda, dep habarlaıdy Euronews.
2024 jyly Ulybrıtanııa, Germanııa, Frantsııa jáne Shveıtsarııa ýnıversıtetteri ARWU boıynsha úzdik ýnıversıtetter qataryna endi.
Kembrıdjde (AQSh) ornalasqan Garvard ýnıversıteti 22-shi jyl qatarynan reıtıngte birinshi orynda tur.
Úzdik «úshtikke» sondaı-aq taǵy eki amerıkalyq JOO — Stenford ýnıversıteti men Massachýsets tehnologııalyq ınstıtýty (MIT) kirip otyr.
Birikken Koroldikte ornalasqan Kembrıdj ýnıversıteti tórtinshi orynda tur. Oksford ýnıversıteti altynshy orynda.
Dál osy eki eýropalyq ýnıversıtet birinshi «ondyqqa» kirdi, qalǵan oryndardyń barlyǵy AQSh oqý oryndarynyń enshisinde qaldy.
ARWU reıtıngi Shanhaı reıtıngi dep te atalady, sebebi ony Shanhaı Tszıao Tong ýnıversıtetiniń Joǵary bilim ınstıtýty jasaıdy. Úzdik ýnıversıtetter tizimimen jumys kezinde akademııalyq jáne zertteý qyzmetiniń kórsetkishteri baǵalanady.
Olarǵa túlekterdiń Nobel syılyǵy men Fılds júldesi, medaldar sııaqty bedeldi marapat alý sııaqty jetistikteri kiredi.
Sondaı-aq jıi silteme jasaıtyn zertteýshiler sany, Nature Science jýrnaldarynda jarııalanǵan maqalalar esepke alynady.
Oksford jáne Kembrıdj ýnıversıtetterinen ózge, úzdik 50 ýnıversıtet qataryna eski álemniń basqa JOO da kirdi. Olardyń qatarynda Parıj-Sakle frantsýz ýnıversıteti bar. Ol ótken jylmen salystyrǵanda úsh satyǵa joǵarylap, 12-shi orynda tur.
Tsıýrıh tehnologııalyq ınstıtýty (Shveıtsarııa) álem boıynsha 21-shi orynda. London ımperatorlyq kolledji 25-shi, al Kopengagen ýnıversıteti — 32-shi orynda.
100 úzdik oqý oryndarynyń eń kóbi AQSh pen Qytaıda — sáıkesinshe 38 jáne 14 ýnıversıtet.
Eýropada úzdik 100 ýnıversıtettiń eń kóbi Ulybrıtanııada ornalasqan.
