Álemniń myqty áskerleri reıtınginde Ózbekstan 65-orynda tur

Álem elderi armııalarynyń jyl saıynǵy reıtınginde Ózbekstannyń Qarýly kúshteri 65-orynǵa ıe boldy, dep habarlaıdy Kazinform agenttiginiń menshikti tilshisi.

Álemdegi eń myqty áskerlerdiń reıtıngin Global Firepower taldaý ortalyǵy usyndy. Tizimge 145 memleket engen. 

Munda Ózbekstan úsh pozıtsııaǵa syrǵyp, 65-orynǵa turaqtady. Osydan bir jyl buryn atalǵan el reıtıngide 62-shi turǵan edi. Joǵaryda keltirilgen málimetterge sáıkes, Ózbekstannyń qorǵanys bıýdjeti 796 mln dollarǵa baǵalandy. Qyzmetke jaramdy adamı resýrstardyń jalpy sany - 13,7 mln, al áskerı qyzmetshiler sany - 68 myń.

Ortalyq Azııa elderi arasynda Qazaqstan armııasynyń pozıtsııasy ilgeri. Elimiz reıtıngide 58-orynda tur. Túrikmenstan - 83, Qyrǵyzstan - 100, Tájikstan bolsa 107-orynǵa jaıǵasty.

Álemdegi eń myqty armııalardyń úshtigine AQSh, Reseı jáne Qytaı endi. Sondaı-aq alǵashqy ondyqqa Úndistan, Ońtústik Koreıa, Ulybrıtanııa, Japonııa, Túrkııa, Pákistan jáne Italııa kirdi.

Global Firepower reıtıngi 60-tan astam túrli faktorlar negizinde qurylady. Áskerı salany qarjylandyrý kólemi, ásker jáne bólimderdiń sany, olardyń materıaldyq-tehnıkalyq jaraqtandyrylýy, eldiń kólik ınfraqurylymy men geografııalyq ornalasýy da eskeriledi.