Álemniń qarjy naryǵyndaǵy ahýal qalpyna kele bastady - Erbolat Dosaev
«Bıylǵy sáýirde aýqymdy fıskaldyq jáne monetarlyq yntalandyrý aıasynda álemdik taýar jáne qarjy naryqtary ahýaly qalpyna kele bastady. Álemniń birqatar elderiniń birtindep karantınnen shyǵýyna qaraı qor alańdary ósýdiń oń aımaǵyna aýysty. Naýryzda aıtarlyqtaı tómendegennen keıin aktsııalar naryǵy orta eseppen 11-12%-ke ósti», - dedi Erbolat Dosaev qańtar-sáýirdegi áleýmettik-ekonomıkalyq damý qorytyndylary týraly Úkimet otyrysynda.
Spıker 10 sáýirde OPEK+ munaı óndirisin kúnine 9,7 mln barrelge qysqartý týraly kelisimge kelgenin atap ótti.
«Bastapqyda munaı qorynyń ulǵaıýy men shıkizatqa suranystyń qatty tómendeýinen qaýiptený sebebinen OPEK+ kelisimi shıkizat naryǵyndaǵy ahýaldy jaqsarta alǵan joq. Sonyń saldarynan Brent markaly munaıdyń baǵasy 22 sáýirdegi saýda-sattyqta bir barreli úshin 15,98 AQSh dollaryna deıin eń tómen belgige tústi. Bıylǵy sáýirdiń sońynda munaı baǵasy bir barreline 25,27 AQSh dollaryna jetti (jyl basynan bastap 61,7% tómendedi). Munaı baǵasynyń jáne álemdik suranystyń tómendeýi jáne tótenshe jaǵdaı men karantınniń engizilýi Qazaqstannyń ekonomıkalyq belsendilik kórsetkishterine áser etti», - dedi E. Dosaev.
QR UEM Statıstıka komıtetiniń aldyn-ala baǵalaýynsha, bıylǵy 4 aıda eń kóp tómendeý kólik (11%) jáne saýda (8,9%) sııaqty qyzmet kórsetý salalarynda baıqalǵan.
«Osynyń aıasynda sáýirdiń basynda iskerlik belsendilikti qoldaý men ekonomıkany nesıeleýge qolaıly jaǵdaı jasaý úshin Ulttyq bank 6 sáýirden bastap bazalyq stavkany 9,5%-ke deıin tómendetti, al 27 sáýirde bazalyq stavkany sol deńgeıde saqtap qaldy. Ulttyq banktiń baǵalaýy boıynsha, álemdik shıkizat naryǵyndaǵy ahýaldyń oń damýy jáne syrtqy jaǵdaılardyń jaqsarýy kezinde ınflıatsııa dálizi bıylǵy munaı baǵasynyń bir barrel úshin 35-40 AQSh dollaryna deıin ósýi kezinde 6-8% bolýy múmkin», - dedi Erbolat Dosaev.
