Álemge áıgili balýandar Astanada bas qosady

ASTANA. KAZINFORM – Álemdik kúres juldyzdary bas qosatyn dástúrli Wrestling Stars týrnıri bıyl 29 qarasha kúni Astanadaǵy Beeline Arena sport kesheninde ótedi.

Sportbugin.kz saıtynyń habarlaýynsha, Astana tórinde álemdegi eń úzdik degen erkin kúres sheberleri baq synaıdy. Olardyń qatarynda, eki dúrkin álem chempıony, tórt dúrkin Eýropa chempıony, Rıo Olımpıadasynyń qola júldegeri Frank Chamıso jáne Parıj Olımpıadasynyń qola júldegeri, albanııalyq Cherman Valıev bar.

Sondaı-aq, eki dúrkin Azııa chempıony, álem chempıonatynyń qola, Azııa oıyndarynyń kúmis júldegeri Danııar Qaısanov jáne erkin kúresten Azııa chempıony Sanjar Dosjanov álemdik týrnırde baq synaıdy.

Erkin jáne grek-rım kúresiniń sheberleri qatysatyn dúbirli básekedegi kezekti juptar anyqtaldy.

Týrnırde 23 jasqa deıingi jastar arasyndaǵy álem chempıony Nachyn Kýýlar men qyrǵyzstandyq balýan, Azııa chempıony, 23 jasqa deıingi balýandar arasyndaǵy álem chempıony Ulyqbek Joldoshbekov beldesedi. Eki balýan erkin kúresten 70 keli salmaqta baq synamaq.

Sondaı-aq, grek-rım kúresinen 2019 jylǵy álem chempıonatynyń kúmis júldegeri Horlan Jaqansha kilemge qaıta oraldy. Ol 55 keli salmaqta elimizdiń qazirgi úzdigi, 20 jasqa deıingi sportshylar arasyndaǵy álem chempıony Ishar Qurbaevpen ózara myqtyny anyqtaıdy.

Erkin kúresten úsh dúrkin Azııa chempıony, álem chempıonattarynyń qola júldegeri Azamat Dáýletbekov 86 keli salmaqta Reseı chempıony, osetııalyq Alan Bagaevpen beldesedi.

Wrestling Stars týrnıri erkin kúresten 8 salmaq dárejesinde ótedi. Týrnırdiń maqsaty – kúres túrlerin keńinen nasıhattap, olımpıadalyq sportty damytýǵa kúsh salý.

Buǵan deıin habarlaǵanymyzdaı, Astanada para dzıýdodan Grand Prix halyqaralyq jarysy ótedi.