Álemdik reıtıngide Qazaqstannyń ýnıversıtteri qalaı baǵalanyp júr

ASTANA. KAZINFORM – Ǵylym jáne joǵary bilim mınıstrligi qazirgi kezde Qazaqstannyń qaı ýnıversıtteri álemdik ozyq oqý oryndarynyń reıtınginde joǵary baǵalanyp júrgenin habarlady.

- Bıyl shyqqan QS World University Rankings 2026 nátıjelerine sáıkes, reıtıngke Qazaqstannyń 20 joǵary oqý orny endi. Reıtıngke engen úsh jańa ýnıversıtet – Sh.Esenov atyndaǵy Kaspıı tehnologııalar jáne ınjınırıng ýnıversıteti, M.Qozybaev atyndaǵy Soltústik Qazaqstan ýnıversıteti jáne Shákárim ýnıversıteti. Bul oqý oryndary alǵash ret álemdik reıtıngke kirdi. L.N.Gýmılev atyndaǵy Eýrazııa ulttyq ýnıversıteti alǵash ret jumys berýshiler arasyndaǵy bedel ındıkatory boıynsha álemniń úzdik 100 ýnıversıtetiniń qataryna kirdi. Sondaı-aq ál-Farabı atyndaǵy Qazaq ulttyq ýnıversıteti jáne basqa da 5 ýnıversıtet oqytýshylar men stýdentterdiń bilim berý protsesindegi baılanysy boıynsha 100 úzdik qatarynan oryn aldy. Bul kórsetkish oqý protsesiniń sapasy men jeke qatynasqa negizdelgen bilim berýdiń mańyzyn bildiredi, - delingen mınıstrliktiń Kazinform agenttigine bergen jaýabynda.

Vedomstvo aqparatyna qaraǵanda, jańa reıtıngte Abai University 628-oryndy ıelenip, byltyrmen salystyrǵanda birden 43 pozıtsııaǵa joǵary kóterildi (671–680 aralyǵy). Osylaısha, ýnıversıtet álemniń úzdik 650 joǵary oqý ornynyń qataryna kirip, Qazaqstannyń aldyńǵy qatarly úzdik 5 ýnıversıtetiniń biri retinde óz ornyn nyǵaıtty.

Budan buryn habarlanǵandaı, Ǵylym jáne joǵary bilim mınıstri Saıasat Nurbek memlekettik ýnıversıtetterde oqý aqysy óspeıtinin aıtty.