Álemdik rekord: elordalyq muǵalim alyp avtobýsty súıredi
ASTANA. KAZINFORM — Elordada 55 jastaǵy muǵalim Aıgúl Erjanova 13,5 tonnalyq avtobýsty jalǵyz ózi súırep, rekord jańartty.
Aıta keteıik, qazir ol № 50 mekteptiń ustazy. Rekordty tirkeý úshin qaladaǵy № 1 Avtopark óziniń avtobýsyn usyndy.
— Bul sheshimge barýǵa ózimniń bapkerim Aıbar inim men onyń dosy Erjan ekeýi sebepshi boldy. Sonymen qatar, mektep bitiretin túlekterdi de yntalandyryp, bolashaq qadamdary senimdi bolýy úshin búgin alyp avtobýsty súıreýge bel býdym. Sebebi adam talpynsa, armany oryndalady, — dedi Aıgúl Erjanova Kazinform agenttigine bergen suhbatynda.
Eske salsaq, byltyr muǵalim jalpy salmaǵy 8 tonna bolatyn eki pıkap kóligin 57 metrge tartqan edi. Al bıyl ol óziniń rekordyn jańartý maqsatynda 13,5 tonnalyq avtobýsty súıredi.
Azııa jáne Afrıka elderi boıynsha álemdik rekordtardy tirkeýdiń bas ofıtseri (Global Best Of RECORDS) Qýandyq Qudaıbergenovtiń aıtýynsha, buǵan deıin álemde osy tektes rekordtar bolǵan, biraq 50 jastan asqan áıelder arasynda aýyr salmaqtaǵy avtobýstardy tartyp kórgender tirkelmedi.
— Dúnıejúzilik rekordtar kitaby qazir 89 memleketti biriktirip otyr. 2026 jylǵy dúnejúzilik rekordtar kitabyna Aıgúl hanymnyń aty ekinshi ret enedi. Óıtkeni bul kisi byltyr eki aýyr pıkap kóligin tartyp, bir rekordty ornatqan edi. Dál búgin elordalyq muǵalim ekinshi ret rekord jańartqanyna barshamyz kýáger boldyq. Sondyqtan osy oqıǵany resmı túrde tirkeýge qoıamyz. Ol avtobýsty 14 metr boıy tartyp ótti. Barlyq ekstremaldy sanattaǵy rekordtarda 10 metr súırese, onda Global Best Of RECORDS kitabyna engiziledi. Jalpy, 50 jastan asqan adamǵa mundaı aýyr kólikti tartý ońaı emes. Atap aıtqanda, Aıgúl hanym rekordty ornatty, — dedi álemdik rekordtardy tirkeýdiń bas ofıtseri.
Budan buryn habarlanǵandaı, aýyr atletıkadan Aıanat Jumaǵalı el rekordyn 7 márte jańartqanyn jazǵan edik.
Eske salsaq, 2024 jyly atyraýlyq sportshy jigit kómir tıelgen 94 tonnalyq vagondy súıredi.
