Álemdik BAQ-taǵy Qazaqstan: Parıj kelisimi, saýdadaǵy basymdyq, jańa lokomotıv jáne balamasyz BUU
Apta boıy álemdik basylymdar Qazaqstan jaıly kóp jazdy. Qazaqstan-Frantsııa kelisim, Prezıdenttiń BUU týraly málimdemesi men Premer-mınıstrdiń Qytaıda aıtqan sózi medıany qyzyqtyrypty. Keler jyly qabyldanatyn zańdar, ALSTOM jetkizetin lokomotıv pen saýda kólemi týraly aqparat ta nazar aýdarýǵa turarlyq. Tolyǵyraq Kazinform tilshisiniń sholýynan oqyńyz.
Report: Ortalyq Azııanyń Qytaımen saýda úlesiniń jarymy Qazaqstannyń úlesinde
Premer-mınıstr Oljas Bektenov Shanhaı qalasynda ótken China International Import Expo – VII Qytaı halyqaralyq ımport kórmesine qatysty. Laýazymdy sheneýnik jıyn barysynda Qytaıdyń Ortalyq Azııa elderimen taýar aınalymynyń jartysynan astamy Qazaqstanǵa tıesili ekenin jetkizgen. Onyń aıtýynsha, budan ári «Jibek joly elektrondy kommertsııasy» pılottyq aımaǵyn qurý boıynsha yntymaqtastyqty nyǵaıtý basty perspektıvaly qadam bolmaq. Premer-mınıstrdiń sózin Report bólisti.
Halyqaralyq kórmede Qazaqstan tarapy Qytaımen memleketaralyq kedergisiz saýda-sattyq, elektrondy kommertsııa, kólik pen logıstıkany damytý, ozyq JI tehnologııalaryn engizý boıynsha ózara is-qımyldy nyǵaıtýǵa yntaly ekenin ańǵartty.
«Qazaqstandyq pavılondar Alibaba jáne JD.com iri saýda platformalarynda tabysty jumys istep tur, Douyin alańynda pavılon ashý, Qazaqstanda tsıfrlyq saýda arnalary arqyly logıstıkany jeńildetý úshin bond qoımalary men keshendi qoıma ınfraqurylymyn salý boıynsha jumystar júrgizilýde», – dedi ol.
Sondaı-aq Bektenovtiń sózinshe, Qytaıdan Eýropaǵa jerústi tasymalynyń 80%y Qazaqstannan ótedi.
«Qazirgi tańda «Batys Eýropa – Batys Qytaı» halyqaralyq tranzıttik avtodálizi, Lıanıýngan portyndaǵy logıstıkalyq ortalyq, Sıan qurǵaq portyndaǵy júk termınaly, Qytaımen shekaradaǵy úshinshi temirjol ótkizý pýnkti jáne basqa da iri ınfraqurylymdyq jobalar transqurlyqtyq ekonomıkalyq dálizder júıesin jetildirýge, taýar aınalymyn ulǵaıtýǵa jáne eki el halqynyń ál-aýqatyn arttyrýǵa baǵyttalǵan», – dedi Premer-mınıstr.
Trend: «Toqaevtyń málimdemesi týraly tolǵam»
Taıaýda Ázerbaıjannyń Trend basylymy Ońtústik Kavkazdy zertteý ortalyǵynyń dırektory Farhad Mamedovtiń «BUU-ǵa balama joq: Prezıdent Toqaevtyń málimdemesi týraly oı» atty maqalasyn jarııalady. Onda sarapshy Memleket basshysy Qasym-Jomart Toqaevtyń ártúrli jıynda aıtqan sózin taldap, BUU-ǵa qatysty ustanymyn talqylaǵan.
«Jaqynda Qazan qalasynda (Reseı Federatsııasy – red.) BRIKS sammıti ótti. Jıyn týraly kóp aıtylǵanymen, bul joly baýyrlas Qazaqstan men onyń basshysynyń berik ustanymyna nazar aýdarǵym keledi. Uıym sammıti aldynda qazaqstandyq BAQ-ta Prezıdenttiń baspasóz hatshysy Berik Ýálıdiń pikiri jarııalandy. Ol ázir Qazaqstan uıymǵa múshe bolmaıtynyn ári Qasym-Jomart Toqaev BUU aıasynda damýdy negizge alatyny aıtqan-dy. Memleket basshysynyń ózi 17 qazan kúni ótken Astana Think Tank Forum-ynda BUU-ǵa erekshe mán berý arqyly istiń oraıyn ańǵartty», – dedi avtor.
Sondaı-aq maqalaǵa orta derjavalardyń BUU mártebesin nyǵaıtý jáne mýltılateralızm qaǵıdatyn ilgeriletý protsesindegi róli jaıyndaǵy Prezıdent sózi de qosylǵan:
«Birikken Ulttar Uıymyna keletin bolsaq, men ony nyǵaıtý kerek degen senimdemin. Óıtkeni onyń ornyn basatyn uıym joq. BUU-da kóptegen kemshilik bolǵanymen, bizde basqa balama joq. Sondyqtan Qazaqstan BUU rólin nyǵaıtý boıynsha osyndaı ustanymdaǵy barlyq elmen yntymaqtasa berýge nıetti. Aımaqtyq derjavalar men orta derjavalardyń úni, eń aldymen, Qaýipsizdik Keńesinde estilýge tıis. Qaýipsizdik Keńesi de reformaǵa muqtaj. Óıtkeni ol, ókinishke qaraı, tyǵyryqqa tireldi», – degen Toqaev sózin mysalǵa keltirgen.
Avtor Memleket basshysynyń ustanymy týraly QR-nyń Ázerbaıjan Respýblıkasyndaǵy Tótenshe jáne Ókiletti Elshisi Álim Baıeldiń pikirin bilgen eken. Elshi Prezıdent ustanymyn qoldap, mundaı kózqaras ózge memleket basshylarynyń pikirimen sabaqtas ekenin jetkizipti.
Anadolu: ALSTOM kompanııasy 2028 jylǵa deıin Qazaqstanǵa 117 lokomotıv ákeledi
Frantsııanyń ALSTOM kompanııasy QTJ-ǵa 2028 jylǵa deıin 117 lokomotıv jetkizedi. Satyp alynatyn elektrovozdar 1980 jylǵy úlgidegi eskirgen VL-80 lokomotıvterin aýystyrady degen boljam bar. Málimetti Anadolu agenttigi jazdy.
«Mámileniń kepili – Frantsııa qarjy mınıstrliginiń BPI France eksporttyq-kredıttik agenttigi. Frantsııanyń Société Générale banki lokomotıvterdi satyp alýǵa tómen mólsherlememen jeńildetilgen qarjylandyrý usynady», – delingen «Qazaqstan temir joly» ulttyq kompanııasy» aktsıonerlik qoǵamy málimetinde.
Salmaǵy 9000 tonnaǵa deıin jetetin júk poıyzyn tasymaldaýǵa qabiletti elektrovozdyń ereksheligi kóp. Lokomotıvtiń artyqshylyǵy: baǵasy qolaıly; elektr energııasyn únemdeýge jol ashady; senimdi ári qyzmet kórsetýge jumsalatyn shyǵyn az.
TASS: Astana men Parıj 36 qujatqa qol qoıdy
Qazaqstan men Frantsııa áriptestik týraly 36 qujatqa qol qoıdy. Onyń ishine jalpy somasy 2,2 mlrd dollardy quraıtyn 14 kommertsııalyq kelisim enedi. Oǵan qosa strategııalyq resýrstar men mıneraldar týraly Jol kartasy, «Samuryq-Qazyna» UÁQ men Societe Generale qarjy konglomeraty arasyndaǵy strategııalyq yntymaqtastyq týraly seriktestik kelisim jasalǵan. Bul týraly reseılik TASS aqparat agenttigi habarlady.
QR Prezıdenti Qasym-Jomart Toqaev pen Frantsııa prezıdenti Emmanıýel Makronnyń kelissózinen keıin readmıssııa týraly kelisim, memleketaralyq ınstıtýttar arasynda arheologııalyq jumystar týraly hattamaǵa qol qoıyldy.
Toqaev memlekettik sapar barysynda Astanada Frantsııa damý agenttiginiń (AFD) ókildigi ashylǵanyn da habarlady.
«Jaqynda Astanada Frantsýz damý agenttiginiń ókildigi ashyldy. Biz onyń jumysyna barynsha qolǵabys kórsetýge ýaǵdalastyq. Sondaı-aq halyqaralyq kólik dálizderin damytý mańyzdy ekenin atap óttik. Logıstıka ınfraqurylymy jáne qaıta óńdeý ónerkásibi sektoryndaǵy baılanysty keńeıtý máselelerin talqyladyq», – dedi Prezıdent.
Daryo: 2025 jylǵa arnalǵan zań jobalaý jumysy pysyqtalýda
QR Ádilet mınıstri Azamat Esqaraev qarashada ótken Úkimet otyrysynda 2025 jylǵa arnalǵan zań jobalaý jumystarynyń josparyn usyndy. Jobada ekonomıkalyq belsendilikti arttyrýǵa baǵyttalǵan bankter týraly jańa zań jáne oǵan ilespe zań jobasy ázirlenbek. Mınıstr sózin Daryo taratty.
Mınıstr sózinshe, quqyq buzýshylyqtardyń aldyn alý, ınnovatsııalyq jáne tsıfrlyq ádisterdi damytý úshin «Quqyq buzýshylyqtardyń aldyn alý týraly» zańnyń jańa redaktsııasy daıyndalady. Sondaı-aq keler jyly bazalyq memlekettik medıtsınalyq kómektiń biryńǵaı paketin damytý, telekommýnıkatsııalar men derekterdi óńdeý ortalyqtary máselesi boıynsha zań jobalaryn ázirleý kózdelgen.
«Jospar jobasyna sáıkes, 2025 jyly densaýlyq saqtaý, quqyq buzýshylyqtardyń aldyn alý, balamaly energetıka, telekommýnıkatsııa jáne basqa da salalarda 19 zań jobasyn ázirleý josparlanyp otyr. Onyń ishinde altysy jańa redaktsııada daıyndalsa, 13-i qoldanystaǵy zańdarǵa ózgerister engizýdi kózdeıdi.
Sonymen qatar, bıýdjettiń múmkindikterin eskere otyryp, bazalyq medıtsınalyq kómek jáne telekommýnıkatsııalar máseleleri boıynsha zań jobalary da ázirlenedi. Saılanbaly zańnamany jetildirý jáne balamaly energııa kózderin damytýǵa baǵyttalǵan zań jobalary da bar. Memlekettik qyzmetti damytýdyń 2024-2029 jyldarǵa arnalǵan tujyrymdamasyna sáıkes, «Memlekettik qyzmet týraly» zań jańa redaktsııada ázirlenedi. Bul zań servıstik jáne klıentke baǵdarlanǵan memlekettik qyzmet modelin qalyptastyrýǵa baǵyttalǵan, – dep tolyqtyrdy mınıstr.