Álemdik BAQ-taǵy Qazaqstan: TMU-daǵy tóraǵalyq, Reseımen sporttaǵy baılanys, bıýdjet tapshylyǵy
Apta ishinde jahandaǵy aqparat taratýshy ınternet-basylymdar Qazaqstandaǵy saıası oqıǵalardy qapy jibermedi. Sonyń ishinde Qazaqstan men Reseı qatynasy, memlekettiń bıýdjet tapshylyǵyn sheshý qadamy, polıetılen zaýytynyń JІÓ-ge áseri qyzý qaýzalǵan. Taqyrypqa qatysty aqpardy Kazinform tilshisiniń sholýynan oqyńyz.
Daryo: Qazaqstan bıýdjet tapshylyǵyn qalaı jeńbek?
QR Ulttyq ekonomıka mınıstri Nurlan Baıbazarov taqyrypqa qatysty túsinikteme berip, máseleni sheshýge baǵyttalǵan qadam jaıly aıtty. Mınıstr sózin Daryo taratty.
Vedomstvo basshysy el bıýdjeti eki deńgeıden turatynyn eske saldy. Birinshisi – respýblıkalyq bıýjet, keıingisi – jergilikti bıýdjet. Eki júıe ortaq bıýdjetti qalyptastyrady.
– Bıyl segiz aıda memlekettik bıýdjettiń kiris mejesi 94 protsent oryndaldy. Alaıda oń nátıjege qaramastan, respýblıkalyq bıýdjettiń kirisi tómendedi. Bul Úkimetten tapshylyqty jabý úshin qosymsha sheshimder izdeýdi talap etti, – dedi ol.
Mınıstr bıýdjet tapshylyǵyn joıýdyń tóte joly salyq júıesin kúsheıtý ekenin aıtty. Onyń sózinshe, bul qadam 900 mlrd teńgege jýyq qosymsha kiris ákelip, QQS-ǵa qatysty shyǵyndy óteýge jáne bıýdjettik alshaqtyqty jabýǵa baǵyttalatyn bolady.
Budan basqa, Úkimet memlekettik holdıngter men jergilikti bıýdjetterdiń shottaryna shoǵyrlanǵan ótimdilikti tıimdi basqarý tetikterin ázirleıdi. Jınaqtalǵan qarajatty tıimdi paıdalanýǵa múmkindik beretin qazynashylyq basqarmaǵa erekshe nazar aýdarylatyn bolady. Soǵan qaramastan, Baıbazarovtyń aıtýynsha, Úkimet aımaqtyq jáne ınvestıtsııalyq jobalardy qarjylandyrý úshin Ulttyq qordan túsetin transfertterdi paıdalanýǵa májbúr.
Nurlan Baıbazarov mınıstrlik Ulttyq qordan qosymsha transfertter suratýdy josparlap otyrǵanyn rastady, alaıda bıýdjet jobasy Parlamentte usynylǵannan keıin naqtylanady.
Trend: Polıetılen zaýyty Qazaqstandaǵy JІÓ-ni arttyrady
Atyraý oblysynda jylyna 1 mln 250 myń tonna polıetılen óndirýge qaýqarly jańa zaýyttyń qurylysy bastaldy. Oǵan 7,4 mlrd AQSh dollary kóleminde ınvestıtsııa tartylǵan. Jańa zaýytynyń boı kóterýi Qazaqstandaǵy JІÓ-ni 1,2 protsentke arttyrmaq. Bul týraly Trend bólisti.
Zaýyt Qazaqstandaǵy óńdeý ónerkásibindegi eń aýqymdy jobanyń biri. Qurylys kezeńinde 8000 jumys ornyn ashylsa, iske qosylǵannan keıin 800 turaqty jumys ornyn qamtamasyz etedi dep kútilýde.
Qurylysty aıaqtaý 2029 jylǵa josparlanǵan. Zaýyttyń jumysy polıetılen ımportyn otandyq ónimmen almastyrýǵa, sondaı-aq taýar eksportyn arttyrýǵa múmkindik beredi.
Joba Qazaqstan ekonomıkasyna aıtarlyqtaı áser etip, aralas salalardy damytýǵa jáne eldiń munaı-gaz-hımııa salasyndaǵy pozıtsııasyn nyǵaıtady.
Anadolu: Qazaqstannyń TMU-daǵy tóraǵalyǵynyń aralyq qorytyndysy talqylandy
QR Premer-Mınıstriniń orynbasary – Syrtqy ister mınıstri Murat Nurtileý Túrki memleketteri uıymynyń Bas hatshysy Kýbanychbek Omýralıevti qabyldady. Kezdesý barysynda taraptar «TURKTIME!» uranymen ótip jatqan Qazaqstannyń Uıymdaǵy tóraǵalyǵynyń aralyq qorytyndylaryn talqylaǵan. Bul jóninde Anadolu agenttigi jazdy.
Kezdesý barysynda Qyrǵyzstandaǵy kezekti sammıtke daıyndyq protsesi de sóz bolǵan. Mınıstr Qazaqstan Uıymdy qurý bastamashysy retinde túrki ıntegratsııasyn odan ári damytýǵa erekshe mán beretinin málimdedi. Sonymen qatar ol TMU-daǵy Qazaqstannyń tóraǵalyǵy túrki elderiniń ıgiligin, damýdyń tyń baǵyttaryn jáne baýyrlastyq baılanysty nyǵaıtyp, óńirdegi turaqtylyqty qamtamasyz etýge baǵyttalǵanyna nazar aýdardy.
Óz kezeginde Bas hatshy Qazaqstannyń TMU-daǵy tóraǵalyǵy aıasynda yntymaqtastyqtyń 30 túrli salasy boıynsha 80-nen astam is-shara ótkizilgenin habarlady. Negizgi is-shara retinde Astanada V Dúnıejúzilik kóshpendiler oıyndaryn ótkizý boldy. K.Omýralıev Oıyndarǵa qatysýshylardyń sanynyń ulǵaıýy túrki kóshpeli mádenıetine degen qyzyǵýshylyqtyń belgisi ekenin atap ótip, sharanyń uıymdastyrý deńgeıin joǵary baǵalady.
CentralAsia: Qazaqstan men Reseı sporttyq baılanysyn nyǵaıta túspek
Qos memleket olımpıadalyq bazany ortaq paıdalanýdy kózdeýde. QR Týrızm jáne sport mınıstri Erbol Myrzabosynov Dúnıejúzilik kóshpendiler oıyny aıasynda RF Sport mınıstri Mıhaıl Degtıarevpen jolyǵyp, taqyrypqa qatysty máseleni talqylady. Bul týraly CentralAsia habarlady.
– Keıingi eki jylda qazaqstandyq sportshylar Reseı aýmaǵynda 40-tan astam oqý-jattyǵý jıynyn ótkizdi. Bul eki el arasyndaǵy sporttyq baılanysty nyǵaıtatyny sózsiz. Qazaqstan olımpıadalyq daıarlyq ortalyǵy bazalaryn paıdalaný arqyly osy tájirıbeni jalǵastyrýdy usynady, – dedi mınıstr.
Kezdesý barysynda mınıstr eki eldiń yntymaqtastyǵynyń joǵary deńgeıde ekenin aıtyp, BRIKS elderiniń sporttyq oıyndary jáne «Azııa balalary» halyqaralyq sport oıyndary sekildi negizgi halyqaralyq sporttyq is-sharalardy ótkizýdegi jetistikterin atap ótti. Qazaqstan ulttyq quramasynan bıylǵy BRIKS elderi oıyndaryna – 108, «Azııa balalary» oıyndaryna 200 sportshy qatysty.
Sonymen qatar ulttyq sport túrlerin damytý máselesine de erekshe nazar aýdarylǵanyn aıta ketken jón. Máselen, V Dúnıejúzilik kóshpendiler oıyndarynyń baǵdarlamasyna Saha Respýblıkasynyń (ıAkýtııa) ulttyq sporty – mas-restlıng pen tatar halqynyń ulttyq kúresi – koresh engizildi. Oıyndarǵa Reseı Federatsııasynyń 197 ókili qatysty.
TASS: «Sheksiz baýyrlastyq-III»arnaıy maqsattaǵy bólimshelerdiń oqý-jattyǵýy ótip jatyr
Túrkistan oblysynda 6 eldiń arnaıy maqsattaǵy bólimsheleriniń kópultty oqý-jattyǵýy bastaldy. Jattyǵýǵa Iordanııa men Qyrǵyzstan Qarýly kúshteriniń ókilderi baqylaýshy retinde shaqyryldy. Bul týraly TASS málimdedi.
– Túrkistan oblysynyń «Orda» taýly oqý-jattyǵý polıgonynda Ázerbaıjan, Qazaqstan, Katar, Pákistan, Túrkııa jáne Ózbekstan arnaıy maqsattaǵy bólimsheleriniń oqý-jattyǵýy ótti. Jıynǵa Iordanııa men Qyrǵyzstan Qarýly kúshteriniń ókilderi baqylaýshy boldy, – dedi QR Qorǵanys mınıstrliginiń baspasóz qyzmeti.
Oqý-jattyǵý tájirıbe almasý, basqarý organdary men áskerı kontıngentterdiń jedel úılesimdilik deńgeıin arttyrýǵa baǵyttalǵan. Sondaı-aq bólimsheler jeke quramynyń bilimin arttyrýǵa da kómegi zor. Áskerı manevrge 300-ge jýyq áskerı qyzmetshi qatysýda. Sharada brondalǵan tehnıka, armııa avıatsııasy jáne ushqyshsyz ushý apparattary synaldy.
– El aýmaǵynda 6 memlekettiń arnaıy maqsattaǵy bólimsheleriniń qatysýymen mundaı formattaǵy oqý-jattyǵý alǵash ret ótkizilýde. Oqý-jattyǵý barysynda jınalǵan tájirıbe bólimshelerdiń jaýyngerlik daǵdysyn arttyrary sózsiz. Munyń barlyǵy memleketterdiń qorǵanys qabiletin ilgeriletýge yqpal etetinine senimdimin, – dedi Qazaqstan Qarýly Kúshteri arnaıy operatsııalar qolbasshysy Aıdos Myrzahmetov.
