Álemdik BAQ-taǵy Qazaqstan: sheteldik ınvestıtsııa, júk tasymaly jáne Lıýksembýrgpen baılanys
Qazan ortasynda Qazaqstan jaıly aqparattar álemdegi túrli basylymdarda jıi ushyrasty. Qazaqstan Prezıdenti Qasym-Jomart Toqaevtyń sheteldik ınvestıtsııalar jóninde aıtqany, ózge elderge júk tasymalynyń artqany, Lıýksembýrgpen júrgizilgen jańa kelisimder men respýblıka aýmaǵyndaǵy eń uzyn kópirdiń qurylysy sóz bolypty. Tolyǵyraq Kazinform tilshisiniń sholýynan oqı alasyz.
Daryo: Qazaqstan 400 mlrd dollar tikeleı sheteldik ınvestıtsııa tartty
Qazaqstan Prezıdenti Qasym-Jomart Toqaev Astanada ótken forýmda eldiń gúldenýi jáne qoǵamnyń demokratııalyq umtylystary boıynsha júrgizilip jatqan saıası reformalar týraly aıta kelip, memleket 400 mlrd dollar sheteldik ınvestıtsııa tartqanyn tilge tıek etti. Bul jańalyqty ózbekstandyq Daryo basylymy bólisti.
Áýeli Toqaev AES qurylysy boıynsha jaqynda ótken referendým Qazaqstannyń demokratııalyq qundylyqtarǵa adaldyǵyn kórsetkenin atap ótti. Ol sondaı-aq reformalar ishki turaqtylyqty da, ekonomıkalyq ósimdi de qamtamasyz etetinin alǵa tartqan.
Osy oraıda Qazaqstan tikeleı sheteldik ınvestıtsııa retinde 400 mlrd dollar tartqany jáne 2029 jylǵa qaraı Investıtsııalyq keńestiń basshylyǵymen jańa ınvestıtsııalyq tsıkldi iske qosý arqyly qosymsha 150 mlrd dollar tartýdy josparlap otyrǵany aıtyldy.
– Biz ınvestorlarǵa keshendi memlekettik qoldaý kórsetýdiń jáne jedel sheshim qabyldaýdyń mańyzdylyǵyn jaqsy túsinemiz, – dep málimdegen Memleket basshysy.
Buǵan deıin Qazaqstan Prezıdenti Qasym-Jomart Toqaev eldiń óńirlik saıasatqa jáne Ortalyq Azııadaǵy kórshilerimen yntymaqtastyqty nyǵaıtýǵa beıildigin rastaǵan. Ol ózara is-qımyldy keńeıtý óńirdiń barlyq elderi úshin paıdaly ekenin atap ótip, memleket basshylary yntymaqtastyǵynyń aıasynda keıingi 10 jylda Ortalyq Azııada eleýli ózgerister bolǵanyn arqaý etti.
Trend: Júk tasymaldaýǵa ótinimder 3,5 ese ósti
2024 jyldyń úshinshi toqsanynda ATI.SU halyqaralyq bırjasynyń platformasynda Qazaqstannan basqa elderge júk tasymaldaýǵa túsken ótinimder sany 3,5 eseden astam ósken. Buny Trend jarııa etti.
– 2024 jyldyń úshinshi toqsanynda ATI.SU platformasynda Qazaqstannan basqa elderge júk tasymaldaýǵa ótinimder sany 262 paıyzǵa ósti. Mundaı serpindi eki negizgi eksporttyq baǵyt – Reseı men Belarýs. Máselen, Reseıge tasymaldaýǵa ótinimder sany bir jylda 263 paıyzǵa jáne ekinshi toqsanmen salystyrǵanda 218 paıyzǵa artty. Belarýsqa júkterdi jetkizýge suranys bir jyl ishinde 641 paıyzǵa jetken, – delingen habarlamada.
ATI.SU-dyń qazaqstandyq ókildiginiń dırektory Renata Zobovanyń aıtýynsha, mundaı ósimniń eki negizgi sebebi bar. Birinshiden, eki eldiń temir joldaryndaǵy qýattylyqtyń tapshylyǵynan Qazaqstan men Reseı arasynda temir jolmen júk tasymaldaý kólemi tómendedi. Sebebi Qazaqstanda Transkaspıı halyqaralyq kólik baǵyty boıynsha temir jol tasymaly kólemi ósken. Birinshi jartyjyldyqta Qazaqstan, Reseı jáne Belarýs arqyly ótetin eýrazııalyq temir jol baǵytyndaǵy tranzıttik júk aǵyny ótken jylǵa qaraǵanda 66 paıyzǵa artty. Osynyń bári qazaqstandyq jetkizýshilerdi Reseı men Belarýsqa júk jetkizý úshin avtomobıldi belsendi paıdalanýǵa májbúrledi. Ekinshiden, atalǵan úsh elde de tsıfrlyq logıstıkalyq servıster belsendi damýda.
Qalǵan eksporttyq baǵyttar boıynsha suranys 2024 jyldyń sońyna deıin turaqty bolmaq.
Anadolu: Qazaqstan men Lıýksembýrg ekonomıkalyq baılanystardy jaqsartýǵa nıetti
Qazaqstan Premer-Mınıstriniń orynbasary, Syrtqy ister mınıstri Murat Nurtileý Lıýksembýrgke resmı saparmen bardy. Aqparatty Anadolu agenttigi taratty.
Sapar barysynda qazaqstandyq syrtqy saıasat vedomstvosynyń basshysy Lıýksembýrg premer-mınıstri Lıýk Frıdenmen jáne Lıýksembýrg premer-mınıstriniń orynbasary, syrtqy ister jáne syrtqy saýda mınıstri Ksave Bettelmen kezdesýler ótkizdi.
Taraptar ekijaqty yntymaqtastyqtyń negizgi máselelerin, sondaı-aq qarjy tehnologııalary, «jasyl» energetıka, farmatsevtıka jáne kóliktik ınfraqurylymdyq jobalar arqyly turaqty damý baǵyttaryn talqylady. Eki eldiń bıznes-qoǵamdastyǵy úshin ekonomıkalyq baılanystardy tereńdetý jáne múmkindikterdi keńeıtý qajettigi de aıtylǵan.
Premer-mınıstr Lıýk Frıden «Lıýksembýrg Qazaqstandy iskerlik yntymaqtastyqtyń eleýli áleýetin eskere otyryp, Ortalyq Azııadaǵy senimdi seriktes retinde qarastyratynyn» atap ótip, sondaı-aq ekonomıkanyń negizgi sektorlaryn jańǵyrtýǵa, ozyq tehnologııalardy engizýde qazaqstandyq tarapty qoldaýǵa daıyn ekenin bildirdi.
Óz kezeginde Qazaqstannyń Syrtqy ister mınıstri Lıýksembýrg Qazaqstannyń Eýropalyq Odaqtaǵy mańyzdy seriktesi bolyp sanalatynyn jetkizgen.
Taraptar saýda-ekonomıkalyq baılanystardy jaqsartyp, sondaı-aq Ortalyq Azııadaǵy qaýipsizdik pen turaqtylyq máselelerindegi yntymaqtastyqqa nazar aýdaryp, Qazaqstan men Eýropalyq Odaqtyń ózara is-qımylyna zer salǵan. Sonymen qatar, halyqaralyq kún tártibindegi ózekti máseleler jóninde pikir almasqan.
Lıýksembýrgtiń syrtqy ister mınıstri Bettel óz eliniń Astananyń óńirlik qaýipsizdikti nyǵaıtýdaǵy kúsh-jigerin joǵary baǵalaıtynyn atap ótti. Lıýksembýrgtiń Qazaqstanmen halyqaralyq qaýipsizdik jáne ornyqty damý máseleleri boıynsha yntymaqtastyqty keńeıtýge daıyndyǵy týraly habarlandy.
Kezdesý sońynda taraptar negizgi óńirlik jáne jahandyq syn-qaterlerdi sheshý úshin barlyq deńgeıdegi ekijaqty qarym-qatynastardy nyǵaıtýǵa jáne halyqaralyq uıymdar sheńberinde belsendi ózara is-qımyl jasaýǵa nıet tanytty.
Jalpy, 2005 jyldan bastap Lıýksembýrgten Qazaqstan ekonomıkasyna tikeleı ınvestıtsııalar kólemi 2,9 mlrd dollardy qurady.
CentralAsia: Qazaqstannyń eń uzyn kópiriniń beriktigin 15 aýyr júk kóligi synady
Shyǵys Qazaqstan oblysynda uzyndyǵy 1316 metrlik Buqtyrma sý qoımasy arqyly ótetin eki jolaqty kópir synaqtan sátti ótti. Jańalyqty Qazaqstannyń Kólik mınıstrligine silteme jasaı otyryp, CentralAsia bólisti.
Bul – ázirge Qazaqstandaǵy eń uzyn kópir sanalady. Myqtylyǵyn tekserý úshin jalpy salmaǵy 450 tonna júk tıelgen 15 samosval paıdalanylǵan. Arnaıy datchıkter kópirdiń qaýipsizdik-normatıvtik talaptarǵa sáıkestigin rastap, deformatsııa, diril jáne júktemeni bólý kórsetkishterin tirkepti.
Kópir oblystyń Jarma, Qatonqaraǵaı, Kúrshim, Kókpekti, Zaısan jáne Altaı aýdandarynyń arasyn jalǵaıdy. Osylaısha, óńirler arasynda baılanys jaqsaryp, úzdiksiz kólik qozǵalysyn qamtamasyz etpek.
