Álemdik BAQ-taǵy Qazaqstan: Orta dáliz, alıýmınıı eksporty jáne Túrki memleketterimen kelisim
Bul aptada Qazaqstan álemdik saıası arenada óziniń ornyqty pozıtsııasy bar ekenin aıshyqtaı aldy. Qazaqstan Prezıdentiniń maqalasy jahandyq basylymdardyń nazarynan túspedi. Sondaı-aq sheteldik medıa elimizdiń Ózbekstanmen eksportyn, Ázerbaıjan jáne Túrkııamen jasalǵan kelisimderdi, KQK arqyly tasymaldanyp jatqan qazaqstandyq munaıdyń kólemi jóninde jazdy. Tolyǵyraq Kazinform tilshisiniń sholýynan oqyńyz.
Trend: Toqaev Qazaqstan seriktesterimen birge THKB-ny belsendi damytyp jatqanyn aıtty
Qazaqstan áriptesterimen birlesip Transkaspıı halyqaralyq kólik baǵdaryn (THKB, nemese Orta dáliz) belsendi damytýda. Jańalyqty Qazaqstan Prezıdenti Qasym-Jomart Toqaevtyń «Ortalyq Azııa renessansy: ornyqty damý men órkendeý joly» atty maqalasyna silteme jasaı otyryp ázerbaıjan basylymy Trend habarlady.
– Ortalyq Azııa aımaǵy kún ótken saıyn jahandyq kólik qatynastarynyń basty tarmaǵyna aınalyp keledi. Bul rette eń aldymen, Qytaıdyń bastamasymen qolǵa alynǵan, bolashaǵynan zor úmit kúttiretin «Bir beldeý, bir jol» jobasyn jáne «Soltústik – Ońtústik» halyqaralyq kólik dálizin atap ótýge bolady. Bul jobalarǵa óńirdegi elderdiń bári belgili bir deńgeıde qatysyp jatyr. Qazir bizdiń memleketterimiz jańa kólik dálizderin qalyptastyrýǵa qatysty basqa da mańyzdy ıdeıalardy júzege asyrýǵa kiristi. Qazaqstan óziniń seriktesterimen birlesip, Transkaspıı halyqaralyq kólik baǵdaryn (Orta dáliz) barynsha damytyp jatyr. Osy baǵytpen tasymaldanatyn júk kólemi orta merzimde bes esege artýy múmkin, – dep keltirgen Toqaevtyń sózin.
Qazaqstan Prezıdenti óńirdiń jahandaǵy mańyzdy kólik-logıstıkalyq jáne tranzıttik habtardyń birine aınalýǵa barlyq múmkindikteri bar ekenin alǵa tartqan.
Daryo: Qazaqstannyń Ózbekstanǵa alıýmınıı eksporty 10 ese ósti
Alıýmınıı eksporty 2024 jyldyń alǵashqy tórt aıynda 10 esege artyp, 2100 tonnaǵa jetken. Mamandar bul úrdisti óndirisi belsendi damyp kele jatqan Ózbekstanda alıýmınııge suranystyń ósýimen baılanystyrady. Bul jóninde Daryo jazdy.
Byltyr Tashkent mańynda alıýmınıı profılderin shyǵaratyn jańa zaýyt ashyldy. Zaýyt qazir óz ónimderin álemniń 50 eline, sonyń ishinde Qazaqstanǵa da eksporttap jatyr. Zaýyt eki óndiristik jelimen jabdyqtalǵan, olardyń árqaısysy 10 gektardy alyp jatyr, al onyń qýattylyǵy jylyna 50 myń tonna daıyn ónim shyǵarýǵa qaýqarly.
Zaýyttyń negizin qalaýshy Tahır Sháripov Qazaqstannan alıýmınıı jetkizý úzdiksiz júrip jatqanyn, al kedendik bajdardyń joqtyǵy men tıimdi geografııalyq ornalasýy kólik shyǵyndaryn tómendetetinin atap ótti. Zaýyt jaqyn arada óz qýatyn eki esege arttyrýdy josparlaýda.
Óndiriletin ónimge qurylys materıaldary, jıhaz, turmystyq tehnıka men avtoónerkásip bólshekteri kiredi. Negizgi tapsyrys berýshiler – ózbekstandyq kompanııalar, biraq zaýyt sheteldik naryqty, sonyń ishinde AQSh pen Eýropa elderin belsendi ıgerýde.
Óz kezeginde, zaýyttyń Baqylaý jáne sapa basqarmasynyń basshysy Kamel Mılıev óndiris úshin shıkizat shetelden, onyń ishinde Reseı men Qazaqstannan satyp alynatynyn atap ótti.
Qazaqstandyq alıýmınııdiń Ózbekstanǵa eksportynyń qarqyndy ósýi jáne óndiristik qýattardyń damýy eki memleket arasyndaǵy taýar aınalymynyń ósýine yqpal etpek.
Trend: Qazaqstan men Ázerbaıjan kıberqaýipsizdik salasynda memorandým jasasty
Atalǵan eki eldiń ókilderi kıberqaýipsizdik salasyndaǵy ózara túsinistik týraly memorandýmǵa qol qoıǵanyn Trend basylymy habarlady.
Ázerbaıjannyń Tsıfrlyq damý jáne kólik mınıstrligi janyndaǵy Elektrondyq qaýipsizdik qyzmetiniń derekterine sáıkes, memorandýmǵa Qazaqstanǵa jumys sapary aıasynda qol qoıylǵan.
Qujat aqparattyq qaýipsizdik jáne kıberqaýipsizdik salasyndaǵy birlesken qyzmetti, sondaı-aq taraptar arasynda derekter men tájirıbe almasýdy kózdeıdi. Elektrondyq qaýipsizdik qyzmeti Ázerbaıjan Prezıdentiniń 2023 jylǵy 28 tamyzdaǵy Jarlyǵymen bekitilgen «2023-2027 jyldarǵa arnalǵan Ázerbaıjan Respýblıkasynyń aqparattyq qaýipsizdik jáne kıberqaýipsizdik strategııasyna» sáıkes, basqa elderdiń uqsas uıymdarymen yntymaqtastyq ornatý boıynsha jumysyn jalǵastyryp jalǵastyryp jatqanyn habarlady.
Anadolu: Qazaqstan men Túrkııa jasandy ıntellekt, ǵarysh jáne spýtnıktik tehnologııalar salasyndaǵy yntymaqtastyqty kúsheıtedi
Túrkııanyń Ónerkásip jáne tehnologııalar mınıstri Mehmet Fatıh Qajyr Qazaqstannyń tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıevpen kezdesti. Bul jóninde Anadolu agenttigi jarııa etti.
Aqparatqa sáıkes, Qazaqstannyń tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıevpen kezdesýde mańyzdy sheshimderge qol jetken.
– Biz Túrki memleketteri uıymy aıasynda jáne ekijaqty deńgeıde jasandy ıntellekt, ǵaryshtyq, spýtnıktik tehnologııalar, tehnologııalyq kásipkerlik jáne ınnovatsııalar salasyndaǵy yntymaqtastyqty tereńdetýge kelistik. Osy turǵyda biz birlesken jobalardy iske asyrý jáne ózara aqparat almasý boıynsha mańyzdy sheshimder qabyldadyq. Ekijaqty jáne kópjaqty yntymaqtastyǵymyzdyń moraldyq negizin bolashaqta nyǵaıtatyn kelisimderge qol qoıý boıynsha tolyq konsensýsqa qol jetkizdik, – degen Mehmet Fatıh Qajyr.
Sondaı-aq mınıstrler bul yntymaqtastyq óńirdiń tehnologııalar men ınnovatsııalar salasyndaǵy áleýetin odan ári arttyratynyna senim bildirgen.
TASS: KQK 7 aıda Teńiz kenishinen 16 mln tonna munaı tasymaldady
Kaspıı qubyr konsortsıýmy qańtar-shilde aılarynyń aralyǵynda Qazaqstandaǵy Teńiz ken ornynan 16 mln tonna munaı tasymaldaǵan. Aqparatty reseılik TASS aqparat agenttigi jarııa etti.
Agenttiktiń málimetinshe, KQK basshysy Nıkolaı Gorban men «Teńizshevroıl» kompanııasynyń marketıng jáne kólik jónindegi bas menedjeri Lorı Saskonyń kezdesýiniń qorytyndysynda atalǵan derek aıtylǵan.
«Teńizshevroıl» munaı óndirý kólemin ulǵaıtý úshin saǵalyq qysymdy basqarý jobasyn iske asyrýda. Óz kezeginde qubyr qosymsha kólemdi tasymaldaýǵa ázir turǵany aıtylǵan. KQK bas dırektory atap ótkendeı, munaı qubyry júıesi qazaqstandyq aýmaqtan jylyna shamamen 72,5 mln tonna munaı jáne Reseı arqyly jylyna 83 mln tonnaǵa deıin munaı tasymaldaýǵa qaýqarly.
