Álemdik BAQ-taǵy Qazaqstan: Mıshýstın sapary, Atyraýdan tabylǵan artefakt jáne Gollıvýdtaǵy qazaqtar
Qazaqstan qańtar aıynyń sońǵy aptasynda álemdik medıanyń nazarynan túspedi. Elge qatysty saıası-ekonomıkalyq, tarıhı jańalyqtar kóp aıtylǵanyn baıqadyq. RF Úkimeti basshysy Mıhaıl Mıshýstınniń saparynda qabyldanǵan sheshimder, «Qashaǵannan» bastalǵan munaı tranzıti, talqydaǵy salyq ózgerisi sekildi aqpar taraldy. Arasynda Atyraýdan tabylǵan tarıhı jádiger men Gollıvýdtaǵy qazaq kaskaderlerdiń jetistigi de bar. Tolyǵyraq Kazinform tilshisiniń sholýynan oqyńyz.
TACC: Reseımen jan-jaqty seriktestik damymaq
Qazaqstan Reseımen barlyq baǵyttar boıynsha tolyqqandy qarym-qatynasty damytýǵa daıyn. Mundaı pikirdi QR Premer-mınıstri Oljas Bektenov reseılik áriptesi Mıhaıl Mıshýstınmen kezdesý barysynda málimdegen. Úkimet basshysynyń sózin TACC bólisti.
Osy aptada Mıhaıl Mıshýstın jumys saparymen Qazaqstanǵa keldi. Reseı Úkimetiniń tóraǵasy Qazaqstan Prezıdenti Qasym-Jomart Toqaev jáne Premer-mınıstr Oljas Bektenovpen kezdesip, Almatydaǵy Eýrazııalyq úkimetaralyq keńes otyrysy men Digital Almaty 2025 tehnologııalyq forýmyna qatysty.
«Memleket basshylary Qasym-Jomart Toqaev pen Vladımır Pýtınniń birlesken kúsh-jigeriniń arqasynda ekijaqty yntymaqtastyǵymyz sapaly jańa deńgeıge kóterildi. Mańyzdy mindet – joǵary deńgeıde qol jetkizilgen ýaǵdalastyqtardyń is júzinde oryndalýyn qamtamasyz etý. Qazaqstan Úkimeti tyǵyz ózara is-qımyl jasaýǵa jáne barlyq salada yntymaqtastyqty damytýǵa daıyn», — dep atap ótti Oljas Bektenov.
Óz kezeginde Mıshýstın Qazaqstandy Reseıdiń strategııalyq seriktesi jáne odaqtasy dep atap ótti. Onyń aıtýynsha, Vladımır Pýtınniń Qazaqstanǵa memlekettik sapary ekijaqty qarym-qatynasty odan ári damyýǵa septesip, mańyzdy ýaǵdaǵa qol jetkizýge yqpal etken. Sondaı-aq qos el Úkimetiniń mindeti – memleket basshylary jasaǵan kelisimniń naqty oryndalýyn qamtamasyz etý ekenin aıtty.
Report: SOCAR munaı tranzıtin bastaıdy
Jyl saıyn «Baký-Tbılısı-Djeıhan» munaı qubyry arqyly «Qashaǵan» ken ornynan 240 myń tonna munaı tasymaldanady. Munda negizgi tasymaldy Ázerbaıjan memlekettik munaı kompanııasy (SOCAR) júrgizetini taǵy bar. Bıyl da tasymal jalǵaspaq. Bul týraly Report aqparat agenttigi habarlady.
«SOCAR «Baký-Tbılısı-Djeıhan» qubyry arqyly munaı tranzıtin bastaıdy. 25 qańtarda Aqtaý portynan kólemi 6 myń tonnaǵa jýyq «Qashaǵan» ken ornynyń munaıy tankerge tıeldi, alǵashqy partııasy 27 qańtarda Sangachal termınalyna kelip jetti. «Qashaǵan» ken ornynan shyqqan munaıdy Aqtaý portynan Bakýge deıin Qazaqstannyń Taraz tankeri jetkizgen. Keıin «Djeıhan» portyna qubyr arqyly tasymaldanady. Este bolsa, bıyl 15 qańtarda SOCAR Midstream Operations LLC (SOCAR-dyń enshiles qurylymy) men KMG Trading («QazMunaıGaz»-dyń enshiles kompanııasy) arasynda kelisim jasaldy. Oǵan sáıkes jylyna 240 myń tonna «Qashaǵan» munaıyn tranzıtteýge jol ashylmaq», – delingen habarlamada.
Aıta keteıik, 2022 jyly qarashada SOCAR men QMG arasynda «Teńiz» ken ornynan jylyna 1,5 mln tonna munaı tranzıtin júzege asyrý týraly kelisimge qol qoıylǵan. 2024 jylǵy aqpanda taraptar Ázerbaıjan aýmaǵy arqyly qazaqstandyq munaı tranzıtiniń kólemin kezeń-kezeńmen ulǵaıtý týraly kelisti. Sol jyly naýryz aıynda eki memleket Ázerbaıjan aýmaǵy arqyly munaı tranzıtin jylyna 2,2 mln tonnaǵa deıin ulǵaıtýǵa ýaǵdalasqan bolatyn.
Daryo:QQS-ny 20 paıyzǵa kóterý máselesi talqylanyp jatyr
Qazaqstan qosylǵan qun salyǵyn 12 paıyzdan 20 paıyzǵa kóterýi múmkin. Bul ózgeris naryqtaǵy taýar baǵasynyń ósýine ákelip, ekonomıkaǵa teris áser etýi yqtımal degen kúdik joq emes. Aqparatty Daryo jarııalady.
Qazirdiń ózinde taqyrypqa qatysty sarapshylar pikiri alańdatarlyq. Nan, sút sekildi mańyzdy azyq-túlik qymbattaıdy dep otyr. Máselen, nanyń kelisi 266 tengeden (0.51 AQSh dollary) 333 tengege (0.64 AQSh dollary) deıin ulǵaıady. Kásipkerler de baǵanyń ósetinin jasyrmaıdy.
Ekonomıst Jangeldi Súleımenovtiń aıtýynsha, qarapaıym naýbaıhana nan ónimin daıyndaýǵa arnalǵan shıkizatty 20 paıyzǵa qymbat satyp alatyn bolady. Kásipke shyǵyn kelse, ony halyq qaltasynan tóleýge májbúr. Sarapshylar ózgeris kásipkerlerge ǵana emes, halyqtyń tólem qabiletine de áser etetinin aıtýda.
Anadolu: Qazaqstanda ǵasyrlyq tarıhy bar jádigerler tabyldy
Buǵan deıin Atyraý oblysy mańynda sarmat qabirlerine qazba jumysy júrgizilgen edi. Zertteý nátıjesinde kóp ǵasyrlyq tarıhy bar qundy jádigerler tabylǵan. Bul olja «Qarabaý-2» qorǵanynan tabylǵan mańyzdy artefakt qatarynda. Súıinshi jańalyqty Anadolu aqparat agenttigi jetkizdi.
Jádigerler Atyraý aımaqtyq jáne tarıhı murajaıyndaǵy kórmede alǵash ret kórermen nazaryna usynyldy. Іshinde qos qaptalyna taý barysy beınelengen salmaǵy 370 gramm bolatyn altyn bilezik erekshe daralanǵan.
Arheolog Marat Qasenovtiń aıtýynsha, Atyraý aımaǵy – Sarmat ımperııasy bılik etken meken. Ǵalymdar arasyndaǵy bul boljamdy arheologııalyq qazba jumystary dáleldep úlgergen.
«Tabylǵan kóne jádigerlerdiń jalpy sany (Sarmat kezeńine jatatyn) shamamen 1000-dy quraıdy. Olardyń 100-i – altyn áshekeıler. Áshekeılerde sol kezde aımaqta mekendegen jyrtqysh janýarlar – qaban men jolbarys beınelengen. Jaqynda júrgizilgen qazba jumystarynyń nátıjesinde aǵashtan jasalǵan 2 tostaǵan taptyq, olar jaqsy saqtalǵan», – dedi ol.
Euronews: Gollıvýd motıvinen kınonyń altyn dáýirine deıin
Euronews telearnasynyń saıtynda unamdy dástúr bar. Keıingi ýaqytta Modern Nomads aıdarymen shetelde tabysqa kenelip júrgen qazaqstandyqtar týraly habar taratýǵa bet alǵan. Bul jolǵy tilshiler nysany Nomad Stunts stýdııasy bolypty.
Búgingi qazaqtyń kóshpeli tarıhy men tamyryn kıno álemine dendete engizip júrgen úzdik kaskaderler men rejısserler jeterlik. Olar ózindik obrazyn qalyptastyryp úlgerdi. Ásirese, kóshpeli murany jahandyq ónermen ushtastyrýa otyrý arqyly kınematografııa ortalyǵyna aınalyp keledi. Búginde «Napoleon» jáne «Mýlan» sekildi fılmderde qoldanylǵan trıýkter, men «Dala qasqyry» sekildi fılmderde qazaqtardyń qoltańbasy bar.
Jaıdarbek Kúnǵojınov jetekshilik etetin Nomad Stunts stýdııasy kıno áleminde tanymal kaskader sheberlikti damytýda. Al Ádilhan Erjanov sekildi rejısserler kıno áleminde iz qaldyryp keledi. Synshylar bul úrdisti memleket qoldaýy men shyǵarmashylyq básekeniń nátıjesi ekenin joqqa shyǵarmaıdy. Tipti eliniń mádenıeti men shyǵarmashylyq áleýetin kórsete bilgen býyn qazaq kınematografııasynyń altyn ǵasyryn qalyptastyrýda.