Álemdik BAQ-taǵy Qazaqstan: mınıstrlerdiń kezdesýi, áskerı oqý-jattyǵý jáne qarjy pıramıdasyn joıý
ASTANA. KAZINFORM – Ádettegideı alys-jaqyn elderdegi baspasóz betterinde Qazaqstan jaıly az jazylǵan joq. Ásirese, Almatyda TMD memleketteriniń Syrtqy ister mınıstrleriniń bas qosýy, Qazaqstan men Ázerbaıjannyń qarjy baǵytyndaǵy yntymaktastyqty damytýy erekshe kózge tústi. Budan bólek, ázerbaıjandyq tarap elimizben áskerı baǵytta da kezdesýler ótkizdi. Tolyǵyraq Kazinform tilshisiniń sholýynan oqı alasyz.
Anadolu: Almatyda TMD Syrtqy ister mınıstrleri keńesiniń otyrysy ótip jatyr
Aıtýly kezdesý barysynda dostastyq aıasyndaǵy yntymaqtastyqty odan ári nyǵaıtýǵa baǵyttalǵan keń aýqymdy máselelerdi talqylaý josparlanýda. Mınıstrler keńesiniń otyrysy «Ortalyq Azııa – Reseı» formatynda ótip jatyr. Jańalyqty Anadolu jazdy.
Resmı bólim bastalar aldynda Qazaqstan Premer-Mınıstriniń orynbasary – Syrtqy ister mınıstri Murat Nurtileý delegatsııa múshelerin qarsylap aldy. Іs-shara dástúrli protokoldyq fotosessııadan bastaldy, odan keıin mınıstrler óńirlik jáne halyqaralyq yntymaqtastyqtyń negizgi máselelerin talqylaýǵa kiristi.
Nurtileý óz sózinde 2025 jyl dostastyq rýhynda sovet-german soǵysyndaǵy jeńistiń 80 jyldyǵy aıasynda ótip jatqanyn aıtty.
«Qazaqstan strategııalyq tyl retinde erekshe ról atqardy. Bizdiń respýblıkadan maıdanǵa 1,2 mıllıon sarbaz jumyldyryldy, bul elimizdiń barlyq halqynyń shamamen 25%-yn qurady. Biz armııany udaıy azyq-túlikpen qamtamasyz ettik: soǵys jyldary maıdanǵa 5 mıllıon tonnadan astam nan men 800 myń tonna et jóneltildi», – dedi ol.
Dostastyq sheńberindegi yntymaqtastyqty odan ári nyǵaıtýǵa baǵyttalǵan keń aýqymdy máselelerdi talqylaý josparlanýda. Saıası, saýda-ekonomıkalyq, mádenı-gýmanıtarlyq jáne ózara is-qımyldyń ózge de salalaryndaǵy kúsh-jigerdi úılestirýge erekshe nazar aýdarylatyn bolady.
Syrtqy ister mınıstrleriniń «Ortalyq Azııa – Reseı» formatyndaǵy kezekti kezdesýi aıasynda óńir elderiniń saýda-ekonomıkalyq jáne ınvestıtsııalyq, kólik-logıstıkalyq jáne mádenı-gýmanıtarlyq salalardaǵy, sondaı-aq óńirlik qaýipsizdikti qamtamasyz etý salasyndaǵy ózara is-qımylynyń ózekti máselelerin talqylaý josparlanǵan.
Sonymen qatar, TMD bas hatshysy Sergeı Lebedev TMD Syrtqy ister mınıstrleri keńesiniń kún tártibine 13 suraq pen 17 jobalyq qujat engizilgenin habarlady.
Onyń aıtýynsha, otyrysqa qatysýshylar maquldaǵan jaǵdaıda osy qujattardyń altaýy Memleket basshylary keńesiniń qaraýyna shyǵarylady. Atap aıtqanda, TMD-nyń «1941-1945 jyldardaǵy eńbek dańqy qalasy» qurmetti ataǵyn berý týraly 13-shi máseleni 2025 jylǵy 9 mamyrǵa deıin aıaqtaý úshin jumys tártibimen memleket basshylaryna qol qoıýǵa jiberý usynylady.
Sondaı-aq, Sergeı Lebedev memlekettik ishki protsedýralardyń aıaqtalmaýyna baılanysty kún tártibinen úsh másele alynǵanyn atap ótti. Alaıda olarmen jumys jalǵasýda jáne olar Dostastyqtyń kún tártibinde qalady, biraq keıinge qaldyrylady. Budan basqa, aldaǵy ýaqytta qaraýǵa taǵy da bes qujat engizý josparlanyp otyr.
«Búgin qaralyp jatqan qujattar boıynsha barlyq usynystar men eskertýler keshe ótken keńeste qatysýshy memleketterdiń ókilderimen aldyn ala kelisildi. Osylaısha, barlyq qujattar saraptamalyq pysyqtaýdan jáne qajetti kelisýden ótti jáne eskertýlersiz qaraýǵa daıyn», – dep atap ótti Lebedev.
Shaǵyn quramdaǵy otyrys aıasynda delegatsııa basshylary ózekti halyqaralyq máseleler boıynsha, sondaı-aq TMD aıasyndaǵy ózara is-qımyl máseleleri boıynsha pikir almasady.
Keńeıtilgen quramda 2026-2030 jyldarǵa arnalǵan syrtqy shekaralarda shekara qaýipsizdigin nyǵaıtý jónindegi TMD memleketteriniń yntymaqtastyq baǵdarlamasynyń jobasyn, sondaı-aq TMD-daǵy eriktiler qozǵalysyna qatysty máselelerdi talqylaý josparlanyp otyr. Otyrysty kelisilgen qujattarǵa qol qoıý rásimi aıaqtaıdy.
Trend: Ázerbaıjan men Qazaqstannyń qarjy qurylymdary arasyndaǵy yntymaqtastyqty keńeıtý talqylandy
Madına Ábilqasymova bastaǵan QR Qarjy naryǵyn retteý jáne damytý agenttiginiń delegatsııasy Ázerbaıjanǵa bas suqty. Sársenbi kúni Trend Ázerbaıjan Ortalyq bankine silteme jasap habarlaǵandaı, Ortalyq bank tóraǵasy Taleh Kıazımov qazaqstandyq delegatsııamen kezdesken.
Kezdesýde Ortalyq bank tóraǵasy qazaqstandyq delegatsııaǵa bank júzege asyryp jatqan «2024-2026 jyldary qarjy sektoryn damytý strategııasy» jáne onyń sheńberinde atqarylyp jatqan strategııalyq bastamalar týraly aýqymdy aqparat jetkizdi.
Kezdesý barysynda QR Qarjy naryǵyn retteý jáne damytý agenttiginiń tóraǵasy qarjylyq turaqtylyqty, banktik jáne saqtandyrýdy qadaǵalaýdy qamtamasyz etý salasynda qoldanylatyn tásilder týraly, sondaı-aq Qazaqstan Respýblıkasynyń qarjy naryqtaryn retteý salasyndaǵy tájirıbesi týraly egjeı-tegjeıli aqparat berdi. Sondaı-aq, Qazaqstanda tsıfrlandyrý boıynsha júzege asyrylyp jatqan jobalardyń jáne osy baǵytta atqarylǵan jumystardyń tusaýkeseri ótti.
Kezdesý qurylymdar arasyndaǵy yntymaqtastyqty keńeıtý múmkindikterin, sondaı-aq ózara qyzyǵýshylyq týdyratyn basqa da máselelerdi talqylaýmen jalǵasty.
Report: Qazaqstan men Ázerbaıjan «Hazrı-2025» birlesken taktıkalyq oqý-jattyǵýy boıynsha konferentsııa ótkizdi
Ázerbaıjan Respýblıkasynyń Qorǵanys mınıstrligi men Qazaqstan Respýblıkasynyń Qorǵanys mınıstrligi arasynda qol qoıylǵan birlesken is-qımyl josparyna sáıkes, eki eldiń Áskerı-teńiz kúshteriniń korablderi men áskerı qyzmetshileriniń qatysýymen «Hazrı-2025» birlesken taktıkalyq oqý-jattyǵýyn ótkizýge baılanysty josparlanǵan konferentsııa ótti. Aqparatty Report taratty.
Ázerbaıjan Qorǵanys mınıstrligi habarlaǵandaı, is-sharaǵa Qazaqstan áskerı teńiz kúshteriniń bas qolbasshysynyń birinshi orynbasary – Bas shtab bastyǵy, 1-dárejeli kapıtan Qanat Nııazbekov jáne Ázerbaıjan ÁTK qolbasshysynyń birinshi orynbasary – shtab bastyǵy 1-dárejeli kapıtan Teımýr Mýrshýdov bastaǵan delegatsııalar qatysty.
Kezdesý qorytyndysy boıynsha Kaspıı teńiziniń qazaqstandyq sektorynda ótetin birlesken taktıkalyq oqý-jattyǵýlardy ótkizý jónindegi konferentsııanyń qorytyndy hattamasyna qol qoıyldy. Oqý-jattyǵýdyń maqsaty – Ázerbaıjan men Qazaqstannyń áskerı teńizshileriniń kásibıligin arttyrý jáne tájirıbe almasý.
TASS: Qazaqstanda Qnet qarjylyq pıramıdasyn uıymdastyrýshylar sottaldy
Qazaqstandaǵy Qnet qarjylyq pıramıdasyn uıymdastyrýshylar 6 jyldan 7 jylǵa deıin bas bostandyǵynan aıyryldy. Olardyń Astanadaǵy 7 páteri men avtokóligi tárkilendi. Bul týraly respýblıkanyń qarjy monıtorıngi jónindegi agenttik departamentine silteme jasaı otyryp, reseılik TASS málimdedi.
«Qnet qarjylyq pıramıdasynyń qurylymdyq bólimshesin uıymdastyrý týraly is boıynsha úkim shyǵaryldy. Sot úkimimen qarjy pıramıdasyn uıymdastyrýshylar kináli dep tanylyp, olarǵa 6 jyldan 7 jylǵa deıin bas bostandyǵynan aıyrý jazasy taǵaıyndaldy», – delingen habarlamada.
Іs boıynsha aıyptalýshylar azamattardy kóp deńgeıli marketıngtik jelige jáne elektrondyq kommertsııaǵa aqsha ınvestıtsııalaýǵa, sonyń ishinde QVI Tripsaver saıahat kartalaryn jáne zergerlik buıymdardy satyp alýǵa kóndirgen. Salymdar somasy 840 myńnan 4 mln teńgege deıin bolǵan, mindetti shart - ádettegideı basqa adamdardy tartý. Qarjylyq pıramıdaǵa 63 mln teńgeden astam qarjy salynǵan, 51 azamat tartylǵan. Sot kinálilerden 301 mln teńgeniń múlkin tárkiledi.