Álemdik BAQ-taǵy Qazaqstan: Kórshimen qatynas, altyn saýdasynyń artýy jáne sheteldik uıymdar
Bul aptada álemdik medıa keńistikte Qazaqstanǵa qatysty jańalyq azaıǵan joq. Sebebi elge Reseı qaýipsizdik keńesiniń hatshysy Sergeı Shoıgý, Tájikstannyń Syrtqy ister mınıstri Sırodjıddın Mýhrıddın keldi. Sheteldik uıymdarǵa qatysty Májilistegi pikir, altyn saýdasynyń kólemi de kóp aıtyldy. Tolyǵyraq Kazinform tilshisiniń sholýynan oqyńyz.
Anadolu: Reseımen seriktestik máselesi talqylandy
Prezıdent Qasym-Jomart Toqaev Reseıdiń qaýipsizdik keńesiniń hatshysy Sergeı Shoıgýdy qabyldady. Kezdesýde Qazaqstan men Reseıdiń túrli baǵyttaǵy ekijaqty seriktestigi jáne óńirlik qaýipsizdik boıynsha yntymaqtastyq máseleleri talqylanǵan. Aqparatty Anadolu aqparat agenttigi bólisti.
Buǵan deıin Reseı tarapy Qaýipsizdik keńesiniń hatshysynyń jumys saparymen Qazaqstanǵa baratynyn jáne eki eldiń qaýipsizdik keńesteriniń keńseleri arasynda konsýltatsııalar ótetinin habarlaǵan bolatyn.
Astanaǵa arnaıy kelgen Sergeı Shoıgýdy Memleket basshysy qabyldap, elaralyq ahýalǵa baǵa berdi.
«Reseı Federatsııasy Prezıdentiniń byltyr qarasha aıynda Qazaqstanǵa jasaǵan memlekettik sapary aıryqsha mánge ıe. Elderimizdiń ekonomıkalyq baılanystary tabysty ilgerilep kele jatyr. 171 joba boıynsha ýaǵdalastyqqa qol jetkizdik. Onyń ishinde 50-den astam joba júzege asyrýdyń sońǵy kezeńine jetti. Búginde Reseı Qazaqstan ekonomıkasynyń negizgi ınvestorlarynyń birine aınaldy. Memleketterimizdiń quqyq qorǵaý organdary, áskerı vedomstvolarynyń arasyndaǵy baılanys ta oıdaǵydaı órkendeıdi dep sanaımyn. Meniń oıymsha, Sizdiń saparyńyz ekijaqty yqpaldastyǵymyzǵa sholý jasap, ózara is-qımyldyń jańa baǵyttary boıynsha kelisimge kelýge ońtaıly múmkindik beredi», – dedi Qasym-Jomart Toqaev.
Jıynda Qazaqstan-Reseı qaýipsizdik salasyndaǵy yqpaldastyqtyń tıimdiligin arttyrý máselesi talqylanyp, Qasym-Jomart Toqaev Reseı Prezıdenti Vladımır Pýtınge sálem joldady.
Reseı qaýipsizdik keńesiniń hatshysy kezdesýge jáne óńirlik qaýipsizdikke qatysty ózekti máselelerdi talqylaýǵa múmkindik jasaǵany úshin Qazaqstan Prezıdentine alǵys aıtty.
«Baýyrlas halyqtarymyzdyń, elderimizdiń arasynda qalyptasqan qarym-qatynasqa únemi joǵary deńgeıde qoldaý kórsetiledi. Taýar aınalymy men birlesken jobalardyń aýqymy qomaqty. Árıne, bizdiń baılanystarymyz tek ekijaqty qarym-qatynaspen shektelmeıdi. Biz Shanhaı yntymaqtastyq uıymy, UQShU, TMD jáne EAEO aıasynda belsendi jumys atqaryp kelemiz. Qazaqstannyń bastamasymen qolǵa alynǵan jobalar tabysty ári belsendi iske asyrylyp jatyr», – dedi Sergeı Shoıgý.
Daryo:Qazaqstandyqtar 8 tonnaǵa jýyq altyn satyp alǵan
2017 jyly iske qosylǵan tazartylǵan altyn quımalardy satý jáne satyp alý baǵdarlamasy júzege asyryla bastaǵaly Qazaqstanda 8 tonnaǵa jýyq ónim satyldy. Jýyrda Ulttyq bank deregin ózbekstandyq Daryo taratty.
Ulttyq banktiń málimetinshe, baǵdarlama bastalǵaly beri jalpy salmaǵy 7,9 tonnany quraıtyn 222 680 altyn quımasy satyldy. Ótken jyly bankter men aıyrbastaý pýnktteri 47 395 quıma satqan – 1,7 tonna altyn.
2024 jyly quımalar kóp satylǵan óńirler:
· Almaty (32 735 dana, 69 paıyz),
· Shymkent (5 200 dana, 11 paıyz)
· Qaraǵandy (2 209 dana, 5 paıyz).
Eń tanymal altyn – 10 gramdyq quımalar. Olardyń úlesine satylymnyń 25 paıyzy (54 875 dana) tıesili. Kelesi kezekte:
· 5 gramdyq – 49 145 birlik (22 paıyz);
· 100 gramdyq – 47 943 birlik (22 paıyz);
· 20 gramdyq – 40 843 birlik (18 paıyz);
· 50 gramdyq – 29 874 birlik (13 paıyz) altyn bar.
Osylaısha, qazaqstandyqtardyń ınvestıtsııalyq altynǵa degen qyzyǵýshylyǵy artyp keledi. Al eń iri naryqty burynǵysha Almaty qalasy bastap tur.
Aıta keteıik, Qazaqstanda altynnyń barlanǵan qory óndirý deńgeıinen asyp túsedi. Al toltyrý koeffıtsıenti 1,2-ni quraıdy. QR Ónerkásip jáne qurylys mınıstri Qanat Sharlapaev aıtqandaı. eldiń mıneraldyq-shıkizat bazasynda qatty paıdaly qazbalardyń 987 ken orny bar jáne olardy barlaý qarqyndy júrýde. Business Insider derekteri boıynsha, Qazaqstan men Ózbekstan sırek kezdesetin metaldardyń álemdik naryǵyndaǵy pozıtsııasyn kúsheıtip keledi.
CentralAsia: Toqaev Tájikstan SІM basshysymen kezdesti
Qasym-Jomart Toqaev Astanaǵa resmı saparmen kelgen Tájikstannyń Syrtqy ister mınıstri Sırodjıddın Mýhrıddınmen kezdesti. Taraptar elaralyq qarym-qatynastyń damý deńgeıine baǵa berip, saýda-ekonomıkalyq, qaýipsizdik salasyndaǵy baılanysty talqylady. Málimetti CentralAsia habarlady.
Memleket basshysy byltyr qol qoıylǵan Odaqtastyq qatynastar týraly shart Astana men Dýshanbeniń san qyrly jáne tabysty yntymaqtastyǵynyń mańyzdy kezeńi bolǵanyn eske saldy.
«Biz Tájikstanmen dostyqqa qurylǵan qatynastardy joǵary baǵalaımyz. Eki eldiń arasynda sheshimin tappaǵan eshqandaı másele joq. Qazaqstan jurtshylyǵy baýyrlas tájik halqyna erekshe yqylas tanytady. Elderimiz árdaıym bir-birine qoldaý kórsetip keledi. Bul ekijaqty baılanysty belsendi damytýǵa umtylysymyzdan da baıqalady», – dedi Prezıdent.
Sırodjıddın Mýhrıddın táýelsizdik jyldarynda Qazaqstan men Tájikstan ózara tıimdi yqpaldastyq ornatqanyn, ol baýyrlas halyqtardyń múddesi úshin dostyq pen odaqtastyq rýhynda udaıy damyp kele jatqanyn jetkizdi.
«Tájikstan Qazaqstanmen aradaǵy baýyrlastyq ári tyǵyz baılanysty erekshe qurmet tutady. Sizdiń el bizdiń mańyzdy seriktesimiz. Ekijaqty yntymaqtastyqtyń barlyq baǵyty boıynsha ózara túsinistik bar. Eki el qatynastary úshin byltyr aıtýly jyl boldy, yqpaldastyǵymyz odaqtastyq deńgeıine kóterildi», – dedi mınıstr.
Áńgimelesý barysynda buǵan deıin joǵary deńgeıde qol jetkizilgen ýaǵdalastyqtardy júzege asyrý máseleleri qarastyryldy. Ásirese, ekonomıka, saýda, tranzıt, tsıfrlandyrý, bilim jáne mádenıet salalaryndaǵy yqpaldastyqty nyǵaıtý perspektıvasyna aıryqsha mán berildi.
Report: Depýtattar sheteldik ÚEU statýsyn qaıta qaraýdy usyndy
«Qazaqstan halyq partııasy» fraktsııasynyń depýtattary depýtattyq saýal qoıyp, eldegi sheteldik úkimettik emes uıymdardyń mártebesin qaıta qaraýǵa shaqyrdy. Buǵan AQSh-tyń Halyqaralyq damý jónindegi agenttiginiń (USAID) Qazaqstandaǵy qyzmeti sebep bolǵan. Málimetti Report aqparat agenttigi saýal mátinine silteme jasap jetkizdi.
Qazaqstandyq saıasattanýshy Talǵat Qalıev el azamattary aktsııalar men is-sharalardyń qalaı qarjylandyrylatynyn, qandaı shet memleketterdiń qarajatyna jumsalatynyn bilýge quqyly dep sanaıdy.
«Qarjylandyrý kózin ataý normaǵa aınalýy tıis. Kez kelgen medıa joba, eger ol sheteldik bolsa nemese sheteldik qorlar qarjylandyratyn bolsa, ol týraly óz erkimen málimdeýi tıis.
Bizde túrli másele boıynsha qoǵamnyń qatań polıarızatsııasy bar. Mundaı japsyrmalar áleýmettik shıelenis áleýetiniń ósýine alyp kelýi múmkin. Sondaı-aq múgedektik, áıelderdiń quqyn qorǵaý boıynsha kóptegen áleýmettik joba bar, sondyqtan barlyq qyzmetin aıyptaýǵa bolmaıdy», – dedi ol.
Euronews: Gollıvýd motıvinen kınonyń altyn dáýirine deıin
Euronews telearnasynda Voices From Central Asia aıdary bar. Osy aptadaǵy shyǵarylym qazaqstandyq sýretshi-ıllıýstrator Áıgerim Káribaevanyń shyǵarmashylyǵyna arnalypty. Baǵdarlamada qylqalam sheberi etno-modernızm stılin qalaı damytqanyn ári óner men dástúrdi toǵystyrý jolyn usynǵan eken.
«Adamzat ónersiz ómir súre almaıdy. Sebebi bar jarqyn sát ónerde jatyr. Al meniń jaryq sátke qadam basýyma – ónerge kelýime kókemniń kómegi kóp tıdi. Ol kisi qazir de sýretshi. Aldyńǵy býynnyń áserimen sýret salýǵa degen yntam artyp, búginde etno-modernızm baǵytyn damytyp kelemin.
Bizdiń stılimiz – mádenıetimizden túlegen janr. Bul baǵytqa bet burý ulttyq jádigerlerimizge degen janashyrlyqtan, qazaqy naqyshtarǵa degen qyzyǵýshylyqtan týyndady desek bolady», – dedi sýretshi.
Baǵdarlamada Áıgerimniń shyǵarmashylyǵyndaǵy dástúr elementi taldanǵan. Sondaı-aq zamanaýı ádisterdi qoldaný arqyly avtordyń kórkem sheshimderdi tabý joly saralanypty. Qazirgi tańda sýretshiniń jumystaryna tapsyrys beretin alys-jaqyn sheteldegi jankúıerleri qalyptasqan.