Álemdik BAQ-taǵy Qazaqstan: Koreıa hám Ózbekstanmen baılanys, qant zaýyty jáne eksport
Shilde aıynyń ortasynan asqan tusta alys-jaqyn shetelderdegi buqaralyq aqparat quraldary Qazaqstanǵa qatysty kóptegen jańalyq jarııalady. Onyń ishinde elimizdiń Ońtústik Koreıa jáne Ózbekstanmen baılanysyn damytyp jatqanyn, túrkııalyq alpaýyt kompanııanyń Qazaqstanda qant zaýytyn salý jobasyn qolǵa alǵanyn atap ótýge bolady. Buǵan qosa, keı eldermen eksporttaǵy kórsetkishterdiń tómendeý jaıy da jazylǵan. Tolyǵyraq Kazinform agenttiginiń sholýynan oqı alasyz.
Anadolu: Qazaqstan men Ońtústik Koreıa ózara baılanystaryn nyǵaıtpaq
23 shildede Qazaqstan Prezıdenti Qasym-Jomart Toqaev pen Koreıa Respýblıkasynyń Prezıdenti Lı Chje Meń telefon arqyly sóılesti. Bul aqparatty Aqordaǵy silteme jasap, túrkııalyq Anadolu basylymy jarııa etken.
Áńgime barysynda eki memleket basshylary qazaq-koreı kópqyrly qatynastaryn odan ári nyǵaıtýǵa beıildi ekenin aıtqan. Ekijaqty yntymaqtastyqtyń keń aýqymdy baǵyttary boıynsha jan-jaqty pikir almasý ótti.
Saýda-ekonomıkalyq jáne mádenı-gýmanıtarlyq salalardaǵy ózara is-qımyldy jandandyrýǵa qyzyǵýshylyq bar. Ónerkásip, energetıka, avtokólik jasaý, bilim berý jáne medıtsına salalaryndaǵy qazirgi jáne keleshektegi jobalardy tıimdi júzege asyrýdyń mańyzdylyǵy da atalyp ótti.
Prezıdent Lı Chje Meń Qazaqstan Prezıdentin Koreıa Respýblıkasyna resmı saparmen kelýge shaqyrdy.
Qasym-Jomart Toqaev ońtústikkoreıalyq kóshbasshynyń shaqyrýyn rızashylyqpen qabyldap, 2026 jyly Seýlde ótetin «Ortalyq Azııa – Koreıa Respýblıkasy» formatyndaǵy sammıtke qatysýǵa daıyn ekenin jetkizdi.
Report: Túrkııalyq kompanııa Qazaqstanda qant zaýytyn turǵyzbaq
Túrkııanyń iri ónerkásiptik holdıngteriniń biri sanalatyn Safi Holding Qazaqstanda joǵary tehnologııaly qant zaýytyn salý múmkindigin qarastyryp jatyr. Jańalyqty elimizdiń Aýyl sharýashylyǵy mınıstrligine silteme jasaı otyryp, ázerbaıjandyq Report agenttigi jazdy.
Bul másele vedomstvo basshysy Aıdarbek Saparov pen Safi Holding kompanııasynyń bas dırektory Safı Atakan arasyndaǵy kezdesý barysynda talqylanǵan.
Jobanyń jalpy ınvestıtsııalyq kólemi - 150-200 mln dollar. Bolashaq kásiporynnyń josparlanǵan qýattylyǵy jylyna 140 myń tonna qant ekeni aıtyldy. Bul úshin shamamen 1 mln tonna qant qyzylshasy óńdelmek.
Qazir zaýyt salýǵa qolaıly óńir tańdaý jumystary júrip jatyr. Bul rette basty ólshemder – egistik alqaptardyń bolýy jáne ınfraqurylymnyń damyǵandyǵy. Mınıstrlik jobaǵa jan-jaqty qoldaý kórsetýge, sonyń ishinde memlekettik qoldaý sharalaryn usynýǵa daıyn ekenin atap ótti.
Uza: Qazaqstan men Ózbekstan óńirlik baılanystardy jańa deńgeıge kóterip jatyr
Ózbekstannyń Qazaqstandaǵy Tótenshe jáne Ókiletti Elshisi Bahtıer Ibragımov bastaǵan dıplomatııalyq mıssııa delegatsııasy issaparmen Shyǵys Qazaqstan oblysyna bardy. Sapar aıasynda delegatsııa Shyǵys Qazaqstan oblysynyń ákimi Nurymbet Saqtaǵanovpen kezdeskenin Uza agenttigi bólisti.
Qazaqstan tarapy óńirdiń ekonomıkalyq jáne ınvestıtsııalyq áleýetin tanystyryp, Ózbekstanmen saýda-ekonomıkalyq qatynastardy damytýǵa qyzyǵýshylyq kórsetken.
Ózbekstandyq dıplomattar sapar barysynda osy óńirde turyp jatqan ózbekstandyq azamattarmen de júzdesti. Kezdesý kezinde Ózbekstanda júzege asyrylyp jatqan áleýmettik-ekonomıkalyq reformalar, sheteldegi otandastardy qoldaýǵa baǵyttalǵan sharalar jóninde keńinen aqparat berildi. Sonymen qatar, konsýldyq-quqyqtyq máseleler boıynsha tıisti keńester berilip, Qazaqstannyń kóshi-qon zańnamasyn qatań saqtaý qajettigi erekshe atalyp ótti.
Sapar aıasynda Ózbekstan elshiliginiń delegatsııasy Shyǵys Qazaqstan oblysy ákimdigi uıymdastyrǵan óńirlik ınvestıtsııalyq forýmǵa da qatysqan.
Forýmda Qazaqstan tarapy birlesip júzege asyrýǵa daıyn birqatar perspektıvaly jobany tanystyrdy. Sonymen qatar, Ózbekstan delegatsııasyna 2025 jyldyń qyrkúıek aıynda ótetin «Altai Invest-2025» ınvestıtsııalyq forýmyna qatysý usynyldy.
Dıplomatııalyq mıssııa aıasynda elshilik ókilderi Daýlet Serikbaev atyndaǵy Shyǵys Qazaqstan tehnıkalyq ýnıversıtetine baryp, stýdent jastarmen kezdesken. Ýnıversıtet ujymy ǵylymı-zertteý jobalaryn tanystyryp, medıtsına, aýyl sharýashylyǵy, metallýrgııa jáne óndiris salalaryndaǵy ınnovatsııalyq ıdeıalarmen bólisti.
Jalpy bul sapar Ózbekstan men Qazaqstan arasyndaǵy óńiraralyq yntymaqtastyqty tereńdetýge, naqty ınvestıtsııalyq, óndiristik jáne áleýmettik-gýmanıtarlyq jobalardy júzege asyrýǵa tyń serpin bergeni jazylǵan.
Trend: Iranǵa Qazaqstannan jetkiziletin taýar kólemi azaıǵan
Iran bıyl úsh aıda, naqtyraq, 2025 jyldyń 21 naýryzynan 21 maýsymǵa deıin Qazaqstannan jetkiziletin ónim ımporty ótken jyldyń sáıkes kezeńimen salystyrǵanda azaıǵanyn jarııa etti. Kórsetkishterdiń kemýi qundyq jaǵynan – 58,1 paıyz, al salmaq boıynsha – 47,2 paıyz. Bul jóninde ázerbaıjandyq Trend agenttigi Iran Keden basqarmasynyń málimetterine silteme jasap habarlaǵan.
Atalǵan kezeńde Qazaqstannan Iranǵa jetkizilgen ónimniń quny shamamen 8,69 mln dollar, al jalpy salmaǵy 27 500 tonna boldy. Salystyryp qarasaq, ótken jyldyń dál osy úsh aıynda ımport kólemi 20,8 mln dollar bolyp, taýar salmaǵy 52 200 tonnaǵa jetken.
Qazaqstannan Iranǵa eń kóp jetkizilgen taýarlar qatarynda bıdaı, arpa, túrli jabdyqtar men basqa da ónimder boldy.
Osy úsh aıda Iran men Qazaqstan arasyndaǵy jalpy taýar aınalymy 60,7 mln dollar (123 myń tonna) bolǵan. Ótken jylmen salystyrǵanda qun jaǵynan tıisinshe 27,7 paıyzǵa, al salmaǵy jóninen 25,3 paıyzǵa tómen.
Jalpy, úsh aıda Iran munaı ónimderin esepke almaǵanda jalpy kólemi 9 mln tonna ónim ımporttaǵan. Quny 13 mlrd dollar boldy. Bul rette munaıǵa jatpaıtyn ónimderdiń ımporty quny jaǵynan 11,7 paıyzǵa, al salmaǵy boıynsha 4,35 paıyzǵa qysqardy.
Bunyń sebebi retinde Iran bıliginiń negizgi qajetti taýarlardy ǵana ımporttaýǵa basymdyq berip, el ishinde óndiriletin ónimderdiń ákelinýine shekteý engizýdi jalǵastyryp otyrǵanyn aıtýǵa bolady.