Álemdik 86 ýnıversıtettiń grantyn jeńip alǵan Aısultan Italııada bilim alǵysy keledi

TÚRKІSTAN. KAZINFORM – Arystyq túlek 4 614 000 AQSh dollary kóleminde grant jeńip aldy.

Arys qalasynda ornalasqan «Bilim-Innovatsııa» lıtseıiniń 11-synyp oqýshysy Aısultan Altynbek qazaqstandyq oqýshylar arasynda rekord ornatty. Qazirdiń ózinde ony álemniń úzdik 86 ýnıversıteti oqýǵa shaqyryp otyr. Olardyń arasynda AQSh, Majarstan, Ulybrıtanııa, Ispanııa, Malaızııa, Aýstralııa, Kanada, Germanııa jáne Ońtústik Koreıa memleketterindegi halyqaralyq deńgeıde bedelge ıe 10 jetekshi ýnıversıtet bar. Atap aıtar bolsaq, Budapest University of Technology and Economics, Eötvös Loránd University, University of East London, Albion College, Hampshire College, Drexel University, DePaul University, CU Boulder (University of Colorado Boulder), Drake University, Temple University sekildi oqý oryndarynyń arystyq túlekke tańdaýy túsken. Bul joǵary oqý oryndary ǵylym, tehnologııa, bıznes jáne áleýmettik ǵylymdar salasynda aldyńǵy qatarda.

– Internet arqyly test tapsyrdym. Sondaı-aq keıingi jyldardaǵy sabaq úlgerimimniń nátıjelerin test qorytyndysyna qosyp, oqý oryndarynyń poshtalaryna joldadym. Qazirgi kezde kópshiliginen shaqyrtý alyp otyrmyn. Negizi ózimniń bala kúngi armanym Vengrııada oqý edi. Degenmen bul oıymnan qazir aınyp otyrmyn. Búgingi tańdaýym Italııa men Malazııa memleketterine tústi, - deıdi Aısultan.

Túlek bolashaǵyn ІT salasymen baılanystyrǵysy keledi. Bul jolda kóp izdenip, kóp eńbektenip júr. Al, armany – qazaq tilinde saıt jasaý. Bul platforma arqyly shetelde bilim alýdy armandaıtyn túlekterge kómek bermek. Halyqaralyq emtıhandarǵa daıyndyq, qujattar jınaý jáne ýnıversıtet tańdaý boıynsha aqparat osy jerde shoǵyrlanady.

– Qarapaıym aýyl mektebinde oqıtyn balalarǵa kómekshi qural qajet. Olar da shetelde oqyǵysy keledi. Biraq jolyn bilmeıdi. Men qolǵa alyp otyrǵan jobada árbir oqýshylar óz ana tilinde aqparatty erkin alatyn bolatyn. Sonymen qatar shetelde oqý boıynsha túrli keńes beremin, - deıdi ol.

Aısultanǵa usynylǵan jalpy grant somasy – 4 614 000 AQSh dollaryn quraıdy. Bul habardy alǵash estigende qatty qýanǵandardyń biri ata-anasy bolǵan. 

– Úıde jalpy jeti aǵaıyndymyz. Menen keıingi eki qaryndasym bar. Biri Shymkenttegi Nazarbaev zııatkerlik mektebinde oqıdy. Ekinshi qaryndasym – birinshi synyptyń oqýshysy. Al, menen úlken aǵalarymnyń barshasy óz aldyna otaý quryp shyqqan. Meniń shetelde oqýyma týystarym men ata-anam eshqandaı qarsy bolǵan joq. Qaıta qoldaý bildirip, kómegin berip jatyr, - deıdi ol. 

Al, Aısultannyń synyp jetekshisi Eraıdyn Paıyzhan shákirtiniń bolashaǵynan úlken úmit kútedi. 

– Aısultan «shetelge oqýǵa túsem» degen aldyna maqsat qoıǵan bolatyn. Maqsatyna jetti. Bul – onyń tabandylyǵynyń, ata-anasynyń qoldaýy men ustazdarynyń eńbeginiń nátıjesi. Bul tabys strategııa men qajyrly eńbek kez kelgen esikti ashatynyn dáleldeıdi. Biz osyndaı shákirtimizben maqtanamyz. Onyń jetistigi qurdastaryna da shabyt berdi, - deıdi Eraıdyn Paıyzhan.

Aıta keteıik, budan buryn Abaı oblysynda 10-synyp oqýshysy bir aptada erekshe mobıldi oıyn jasap shyǵarǵanyn jazǵan bolatynbyz.