Álemdik oqýlyqtardy aýdarýda ulttyq jadyny esten shyǵarmaý qajet - Bolat Kómekov

ASTANA. QazAqparat - Álemdik deńgeıde tanymal oqýlyqtardy qazaq tiline tikeleı aýdarý barysynda ulttyq jadyny da esten shyǵarmaý qajet. Mundaı pikirdi QR Ulttyq ǵylym akademııasynyń akademıgi Bolat Kómekov bildirdi, dep habarlaıdy QazAqparat.

«Qazirgi ýaqytta «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda eki baǵytta jumys istegen abzal. Birinshiden, atalǵan oqýlyqtardy aýdarý esebinen álemdik standarttar deńgeıine jetýimiz qajet. Ekinshiden, bizge ulttyq jadymyzdy saqtap qalý mańyzdy. Óıtkeni, jaratylystaný ǵylymynda ult joq. Bıologııa, fızıka, hımııa syndy salalardaǵy kitaptardy erkin aýdarýǵa bolady. Al qoǵamdyq-gýmanıtarlyq ǵylymǵa kelgende bizdiń ulttyq qundylyqtarymyzdy, salt-dástúrimizdi, ulttyq jadymyzdy eskerýimiz qajet», - dedi  akademık  L.Gýmılev atyndaǵy Eýrazııa ulttyq ýnıversıtetinde ótken «Rýhanı jańǵyrý» baǵdarlamasynyń ortalyq sarapshylyq keńesi aıasynda BAQ ókilderine bergen suhbatynda.

Onyń atap ótýinshe, batys áleminde qazaq halqyna ǵan tán kóptegen túsinikter joq. Máselen, «dala órkenıeti» túsinigin qoldanbaıdy. Al ony biz oqýlyqtardy aýdarý barysynda tıimdi qoldanýymyz qajet.

«Al bul máselege kelgende avtorlarmen hat almasyp, olardyń pikirlerin naqtylaý qajet. Sonymen qatar olardyń ruqsatymen bul jumystardy júrgizip, tipti bolmasa kitapqa redaktorlyq eskertpe retinde tómengi jaǵyna qosqan jón. Degenmen, munyń ózin atalǵan oqýlyqtardyń avtorlarmen kelisip otyrý qajet jáne qoǵamdyq ǵylym salasynda bizdiń jetistikterimizdi de qosý kerek», - dedi Bolat Kómekov.