Álemdegi stýdentter sport qaýymdastyqtarynyń ókilderi Almaty Ýnıversıadasynyń bastalýyn asyǵa kútýde (FOTO)
Jınalysta EUSA Bas hatshysy Matıaj Pechovnık eýropalyq memleketterdiń qatysýy jáne 2017 jylǵy Ýnıversıadanyń mol murasy jaıly sóz qozǵady.
«2017 jyly Almaty qalasynda ótetin qysqy Ýnıversıadaǵa kóptegen eýropalyq memleketterdiń qatysatynyna qýanyshtymyn. Ýnıversıadaǵa qatysý - jas sportshylar úshin úlken tájirıbe. Ýnıversıadanyń sporttyq nysandary jarys aıaqtalǵan soń Almaty turǵyndaryna qoldanysqa beriletindigine rızamyn. Ózim de, aldaǵy Ýnıversıadanyń bastalýyn asyǵa kútip júrmin», - dedi Matıaj Pechovnık.
Sonymen qatar, jınalys barysynda shet eldik stýdentter sporty federatsııalarynyń ókilderi Almaty qalasynda ótetin Ýnıversıadaǵa qatysý jaıly óz oılaryn ortaǵa saldy.
«Ulybrıtanııa delegatsııasy 80-ge jýyq sportshydan turady. Bizdiń sportshylar hokkeı (erler jáne áıelder arasynda), kerlıng (erler jáne áıelder), taý-shańǵy sporty, shańǵy jarysy, snoýbord, frıstaıl jáne mánerlep syrǵanaýdan jaqsy nátıje kórsetedi degen senimdemiz. Aldaǵy jarysty asyǵa kútip jatyrmyz», - dedi óz sózinde Brıtan ýnıversıtetteri men kolledjderindegi sporttyq odaqtyń halyqaralyq baǵdarlamalary bóliminiń jetekshisi Nıl Rodjers.
Germanııanyń Ulttyq stýdentter sporty federatsııasynyń basshysy Felıks Arnold jarysqa eń jas quramdy jiberetindikterin jetkizdi.
«Bizdiń qurama 30-40 sportshydan turýy múmkin. Árıne, biz eń myqty quramdy jibergimiz-aq keledi. Biraq biz eń jas quramdy jiberýdi uıǵardyq. Osylaıshy, jas sportshylarymyzdy aldaǵy ýaqytta bolatyn úlken dodalarǵa daıyndaǵymyz keledi. Dál qazirgi ýaqytta bizdiń sportshylar úzdik nátıje kórsetý úshin daıyndalyp jatyr. Almatyǵa kelýdi taǵatsyzdana kútip júrmiz", - dedi ol.
Aıta ketelik, Ýganda sportshylary qysqy Ýnıversıada oıyndaryna tuńǵysh ret qatysady.
Afrıkanyń Stýdentter sport federatsııasynyń ókili Alıgavesa Kabenge jarysqa qatysýdyń mańyzdylyǵyna toqtaldy.
«Almatydaǵy Ýnıversıadaǵa qatysatyndyǵymyz bizdi qýanyshtty. Bul Ýnıversıada biz úshin erekshe bolaıyn dep otyr. Bizdiń keıbir stýdentter shet elde oqyp, qysqy sport túrlerimen aınalysqan. Endi olar osyndaı úlken dodaǵa qatysyp, Ýgandanyń namysyn qorǵaıdy», - dedi ol.
Qytaıdyń stýdentter sporty federatsııasy dırektorynyń orynbasary Shen Chjenniń aqparaty boıynsha, Qytaı aldaǵy Ýnıversıadaǵa óz tarıhynda tuńǵysh ret eń myqty quramdy jibermek nıette.
«Almatyda Azııa oıyndarynyń qalaı ótkendigine qarap, biz bul qalanyń Ýnıversıadany da joǵary deńgeıde ótkizetindigine senimdimiz. Qysqy Ýnıversıada tarıhynda Qytaı osy joly óziniń eń myqty quramyn jiberedi. Meniń bilýimshe, Almatyda keremet sport nysandary men Atletter qalashyǵynyń qurylysy júrip jatyr. Qytaı delegatsııasy 150 sportshydan jáne resmı ókilderden quralady», - dedi QHR stýdentter sporty federatsııasynyń ókili.
Jınalys barysynda, Grýzııanyń stýdentter sporty federatsııasynyń ókili Aleksandr Gýgava óz eliniń sportshylarynyń daıyndyǵy jaıly: «Dál qazir aldaǵy jarysqa qyzý daıyndyq ústindemiz. Biz skaı kross, snoýbord kross, sloýpstaıl jáne taý-shańǵy sportynyń barlyǵyna qatysamyz. 2017 jyly Ýnıversıada Almaty qalasynda ótetindigine qatty qýanyshtymyz», - dedi.
Al Ýkraınanyń fızıkalyq bilim men sport komıtetiniń basshysy Mıhaılo Melnık dál qazirgi ýaqytta sportshylar aldaǵy jarysqa daıyndalyp jatqandyǵyn jetkizdi.
ıÝkraına delegatsııasy 70-80 sportshydan quralady. Aldaǵy oıyndarǵa qyzý daıyndyq júrgizýdemiz. Biz bıatlonnan, shańǵy qossaıysy jáne mánerlep syrǵanaýdan medal alamyz degen senimdemiz. Biz Qazaqstannyń qonaqjaılylyǵyn bilemiz, Almatyǵa kelýdi asyǵa kútýdemizı, - dedi M. Melnık.
Reseıdiń stýdentter sporty odaǵynyń atqarýshy dırektory Dmıtrıı Kıselev bolsa, Almatydaǵy jarysqa 300 adamnan turatyn delegatsııa keletindigin aıtty.
«Bul eń úlken ulttyq qurama bolmaq. Reseı erteden Búkilálemdik Ýnıversıadaǵa qatysýǵa asa úlken jaýapkershilikpen qaraıdy. Biz únemi álemdik deńgeıde onsha damymaǵan qysqy sport túrlerine aldaǵy ýaqytta tájirıbe jınaqtaý úshin qatysamyz. Reseı quramasy Almatyǵa tolyq qurammen kelýge tyrysady. Bizden 300-ge jýyq ókil keledi. Qazaqstan - bizdiń erteden bergi áriptesimiz. Osy Ýnıversıada arqyly, bolashaqta Olımpıada oıyndarynda saıysqa túsetin quramamyzdy jasaqtap alýǵa tyrysamyzı, - dedi sóz sońynda D. Kıselev.
Aıta ketelik, Almaty qalasyndaǵy qysqy Ýnıversıada 2017 jyldyń 29-shy qańtary men 8-shi aqpany aralyǵynda ótedi.
Oǵan álem elderinen 2000-ǵa jýyq sportshy qatysady dep kútilýde. Jarystar 8 sport nysanynda sporttyń 12 túrinen: bıatlon, shańǵy sporty, kerlıng, konkımen jarys, shańǵy qossaıysy, shańǵy saıysy, shańǵymen tuǵyrdan sekirý, snoýbord, mánerlep syrǵanaý, frıstaıl, shaıbaly hokkeı jáne short-trekten ótedi.
Ýnıversıada barysynda 3000 volonter jumys atqarady.
Shet elderden 30 myńǵa jýyq týrıst keledi degen boljam bar. Translıatsııa álemniń 80 elinde júrgiziledi. Jarystardy 1 mlrd jýyq kórermen tamashalaıdy. 
