Álemdegi eń uzyn tas joldyń sý astyndaǵy týnneli qazyla bastady - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Uly qolbasshy Ámir Temirdi eske alý is-sharasy ótti – ÓzA
Samarqandta uly qolbasshy Ámir Temirdiń týǵanyna 689 jyl tolýyna oraı rýhanı-mańyzdy is-shara uıymdastyryldy. Bul týraly «ÓzA» aqparat agenttigi málimdedi.
Habarlamada aıtylǵandaı, oblys jáne qala basshylary, qoǵam belsendileri eń aldymen Ámir Temir kesenesine baryp, zııarat etti. Quran oqylyp, rýhyna taǵzym jasalǵan.
Odan keıin qala ortalyǵyndaǵy Ámir Temir eskertkishine gúl shoqtary qoıyldy.
- 1996 jyly Ámir Temirdiń 660 jyldyǵyna oraı Samarqandtyń dál ortalyǵynda eńseli eskertkish ornatylyp, kesene men onyń aınalasy abattandyrylǵan bolatyn. Búginde bul meken otandastarymyz ben sheteldik týrıster eń jıi keletin tarıhı-mádenı orynǵa aınalǵan, - dep jazady ózbekstandyq BAQ.
Alashankoý keden beketinen kirip-shyqqan kólik sany kóbeıdi – Harajorga
Shyńjańnyń Alashankoý keden beketinen(«Alashankoý-Dostyq» keden beketinen – avt.) jyldyń 1-shy toqsanda shekaradan kirip-shyqqan avtokólikter sany 27 myńǵa jýyqtap, ótken jylǵy sáıkes mezgildegiden 37,21% artty, dep habarlandy qytaılyq Harajorga aqparattyq jelisinde.
Atalǵan BAQ-tyń keltirgen derekterine súıensek, Qytaıdyń Alashankoý keden beketi shekara qorǵanys tekserý pýnktynyń málimetinshe, bıyl 1-toqsanda Alashankoýdaǵy shekara ótkelinen kirip-shyqqan avtókolikter sany 26 myń 999-ǵa jetip, ótken jylǵy sáıkes mezgildegiden 37,21% artqan. Shekaradan kirip-shyqqan adam sany 41 myń 568 adamǵa jetip, bulda ótken jylǵydan 20,19% artqan. Shekaradan kirip-shyqqan avtokólikter men adamdarǵa tıimdi tásilder jolǵa qoıylyp, shekara ótkelderiniń kedennen ótý ónimdiligi kórnekti joǵarlaǵan.
Atap aıtqanda, bıyl jyl basynan beri «Bir beldeý, bir jol» halyqaralyq baǵdarlamasynyń aıasynda Qytaı men Qazaqstan arasyndaǵy adamdardyń shekaradan kirip-shyǵýy kún saıyn artyp, shekara attaǵan saıahat deńgeıi joǵarylaǵan. Júk kólikteriniń kedennen ótýi jaǵynda Alashankoý shekaralyq tekserý bólimderi júk avtokólikterin jyldam tekserýdi júzege asyrǵan.
Álemdegi eń uzyn tas joldyń sý astyndaǵy qalqan týnneli qazyla bastady – «Halyq gazeti»
Qytaıda álemdegi eń uzyn tas joldyń sý astyndaǵy qalqan týnneli qazyla bastady.
9 sáýirde ıAntszy ózeniniń teńizge quıylar tusyndaǵy Tszıansý ólkesi Nantýn Haımen aýmaǵyndaǵy 16 metrlik otandyq óte úlken dıametrli «Tszıanhaı» qalqan mashınasy jolǵa sátti shyqty. Bul Haımen-Taıtsan ıAntszy ózeni týnneliniń qalqandy qazý jumystary bastalǵanyn bildiredi. Ol - qazirgi ýaqytta álemdegi eń uzyn sý astyndaǵy tas jol qalqany týnneli, dep habarlaıdy «Halyq gazeti» basylymy.
Qytaılyq BAQ-tyń málimetinshe, týnnel Tszıansýdaǵy ıAntszy ózeniniń teńizge quıar saǵasynda ornalasqan. Ol Nantýnnyń Haımen aýmaǵy men Sýchjoýdyń Taıtsan qalasyn baılanystyrady.
- Bul jobalyq jyldamdyǵy saǵatyna 100 shaqyrym bolatyn eki baǵytty alty jolaqty jedel tasjol týnneli. Qalqan ýchaskesiniń jalpy uzyndyǵy 9315 metr, al eń tereń bóligi ıAntszy ózeniniń astynda 75 metr jerde ornalasqan. Onyń óte alys qashyqtyǵy, óte úlken dıametri, sýdyń óte joǵary qysymy, úlken kómý tereńdigi jáne kúrdeli jumys jaǵdaılary sııaqty erekshelikteri bar, - dep jazady «Halyq gazeti».
Sondaı osy aptada «Halyq gazeti» basylymynda «Shenıanda alǵashqy «Qytaı-Qazaqstan-Ózbekstan» transshekaralyq avtomobıl kóligi jelisi ashyldy» degen taqyryptaǵy aqparat jaryq kórdi.
Atap aıtqanda, 7 sáýirde Shenıan halyqaralyq avtomobıl kóligi qurastyrý ortalyǵynyń kedendik qadaǵalaý ornynan Lıaonın qalasyndaǵy jergilikti kásiporyndar shyǵarǵan 20 tonna balmuzdaq tıelgen eki TIR tońazytqysh júk kóligi jolǵa shyqty.
Qytaılyq BAQ-tyń dereginshe, kólik Shyńjańnyń Tarbaǵataıyndaǵy Baqty porty arqyly elden shyǵyp, Qazaqstandy basyp ótip, Ózbekstannyń astanasy Tashkentke jetedi. Joldyń uzaqtyǵy – 8-10 kún. Bul Shenıannyń alǵashqy «Qytaı-Qazaqstan-Ózbekstan» TIR transshekaralyq avtomobıl kóligi baǵytynyń resmı ashylýyn bildiredi.
Aıta keteıik, bul ótken jyly Shenıan halyqaralyq avtomobıl kóligin qurastyrý ortalyǵy qurylǵannan bergi Ortalyq Azııa elderine baǵyt alǵan alǵashqy kólik.
Iranda Batys Azııadaǵy eń úlken gúl kileminiń kórmesi ótti - ParsToday
Irannyń Karadj qalasyndaǵy Sháhıd Chamran saıabaǵyndaǵy gúl baǵynda Batys Azııadaǵy eń úlken gúl kilemi qoıylǵan 11-shi Karadj qyzǵaldaq festıvali ótip jatyr, dep jazdy ParsToday aqparat agenttigi.
ParsToday aqparat agenttiginiń málimeti boıynsha, 200 myńnan astam qyzǵaldaq badandary bar 11-shi Karadj qyzǵaldaq festıvali sáýirdyń 4-11 aralyǵynda gúlder men ósimdikterge áýesqoılardy qabyldaıdy.
Bul festıvalde 2700 sharshy metr aýmaqty alyp jatqan Taıaý Shyǵystaǵy eń úlken gúl kilemi kórsetilgen.
Keltirilgen derekterge súıensek, atalǵan festıvalde qyzǵaldaqtyń 20-dan astam túri ártúrli tústi, sonymen qatar maýsymdyq gúlder men shegirgúl men nartsıs sııaqty ósimdikter bar.
Iran munaıynyń Qytaıǵa eksporty rekordtyq kórsetkishke jetti - ParsToday
Jarııalanǵan derekter Irannyń Qytaıǵa munaı eksporty táýligine 1,8 mıllıon barrelden astam ósimge jetkenin kórsetedi.
Bıznesmender men sarapshylardyń derekteri Qytaıdyń Irannan munaı ımporty 2025 jyldyń naýryz aıynda kórnekti deńgeıde óskenin kórsetedi.
ParsToday agenttiginiń Mizan aqparat agenttigine silteme jasap habarlaýynsha, bul ósim AQSh-tyń Tehranǵa qarsy odan ári sanktsııalary jetkizýdi kúsheıtýi múmkin degen alańdaýshylyqpen baılanysty. Qytaıdyń Irannan munaı ımporty naýryz aıynda táýligine 1,8 mıllıon barrelden asty, bul tarıhtaǵy eń joǵary kórsetkish, dep habarlaıdy Vortexa keme baqylaý kompanııasy.
Irandyq BAQ-tyń málimetinshe, bul Qytaıdyń Shandýn provıntsııasyndaǵy táýelsiz munaı óńdeý ortalyǵyndaǵy túgendeý deńgeıiniń kóterilýimen sáıkes keledi.
Sonymen qatar Kpler analıtıkalyq fırmasynyń derekteri Irannyń Qytaıǵa munaı eksporty naýryz aıynda táýligine 1,71 mıllıon barrel boldy, bul aqpandaǵy táýligine 1,43 mıllıon barrelden 20 paıyzǵa joǵary jáne sońǵy bes aıdaǵy eń joǵary kórsetkish bolǵan.
Irannyń Qytaıǵa munaı eksportyn qadaǵalaıtyn taǵy eki saýda kózi naýryz aıyndaǵy ımportty kúnine sáıkesinshe 1,67 mıllıon jáne 1,8 mıllıon barrel dep baǵalady.
Qazaqstan Ulttyq mýzeıi eldi tanyp-bilgisi keletinderge biregeı múmkindik beredi - TRT
8 qabatty mýzeıge Qazaqstannyń san alýan tarıhı kezeńderi, osy jerlerdi mekendegen kóne órkenıetter damytqan mádenı baılyq jáne tamyry ortaq túrik tarıhynan syr shertetin 220 myńnan astam týyndy qoıylǵan. Murajaı sheteldik týrıster, ásirese elordaǵa keletin týrıster eń kóp keletin mekenjaılardyń biri retinde erekshelenedi.
Qazaqstannyń Ulttyq mýzeıi kelýshilerdi 220 myńnan astam tarıhı jádiger arqyly eldiń tamyry tereń tarıhymen jáne mádenı baılyǵymen tanystyrady.
Bul týraly osy aptada Túrkııa Radıo Televızııa portaly habarlady.
Túrkııalyq BAQ-tyń málimdeýinshe, shamamen 2500 jyl buryn saf altynnan jasalǵan myńdaǵan jádiger ornalasqan «Altyn» zal kelýshilerdi óziniń tamashalyǵymen tańǵaldyrady. Qazaqstannyń tuńǵysh «Altyn adamy» da osy zalda ornalasqan.
Túrkııa Radıo Televızııa portaly ary qaraı Qazaqstannyń Ulttyq mýzeıi týraly tolyǵyraq tanystyrǵan.