Álemdegi eń úlken otbasylyq serýen qaı elde ótetinin bilesiz be - sheteldegi qazaq baspasózi
ASTANA. KAZINFORM - Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstan men Qazaqstan yntymaqtastyǵy nyǵaıyp keledi – ÓzA
Qazaqstanǵa sapary aıasynda Ózbekstannyń Tsıfrlyq tehnologııalar mınıstrligi men IT Park Uzbekistan delegatsııasy «BILLZ» kompanııasynyń ókilderimen kezdesti. «Smart Point Almaty» ınnovatsııalyq ortalyǵynda ótken bul kezdesýde kompanııanyń óńirdegi qyzmeti men aldaǵy josparlary talqylandy, dep habarlaıdy «ÓzA» aqparat agenttigi.
Habarlamada aıtylýynsha, «BILLZ» - bólshek saýda jáne bıznesti basqarýǵa arnalǵan tsıfrlyq platformalar usynatyn kompanııa. Ózbekstanda negizi qalanǵan bul kompanııa búginde Qazaqstan naryǵynda da tabysty jumys istep jatyr.
Kompanııa bólshek saýda kásiporyndaryna satý úderisterin avtomattandyrýǵa, tutynýshylarmen jumysty jaqsartýǵa jáne bıznes tıimdiligin arttyrýǵa kómektesetin zamanaýı sheshimderdi usynady.
Kezdesýde «BILLZ» kompanııasynyń Qazaqstandaǵy jetistikteri, klıenttik bazasynyń keńeıýi, seriktestik jobalary jáne halyqaralyq naryqqa shyǵý strategııasy jaıly pikir almasylǵan.
Sondaı-aq osy aptada «ÓzA»-da «Ózbekstan men Qazaqstan munaı-gaz salasynda seriktestikti kúsheıtedi» degen taqyryptaǵy aqparat jarııalandy.
Ózbekstandyq BAQ-tyń dereginshe, Almatyda ótken resmı sharada Ózbekstannyń «Ýzbekneftgaz» AQ men Qazaqstannyń «QazMunaıGaz» ulttyq kompanııasy munaı-gaz salasyndaǵy áriptestikti tereńdetýge baǵyttalǵan mańyzdy kelisimge qol qoıǵan.
Bul qujat eki eldiń energetıka salasyndaǵy baılanysyn jańa deńgeıge kóterip, uzaq merzimdi strategııalyq seriktestikti nyǵaıtýdy kózdeıdi. Kelisim aıasynda eki el sarapshylary ózara tájirıbe almasyp, jańa jobalardy birlesip júzege asyrý úshin turaqty dıalog ornatady.
Sonymen qatar, jobalardyń geografııasyn keńeıtý, tabıǵı resýrstardy tıimdi paıdalaný, óndiristik jáne kóliktik ınfraqurylymdardy ońtaılandyrý múmkindikteri qarastyrylǵan.
Qytaı-Qazaqstan Halyqaralyq avtomobıl tasymaldary týraly kelisim resmı túrde kúshine endi – «Halyq gazeti»
«Qytaı Halyq Respýblıkasynyń Úkimeti men Qazaqstan Respýblıkasynyń Úkimeti arasyndaǵy Halyqaralyq avtomobıl tasymaldary týraly kelisim» osy jyldyń 10 naýryzynda resmı túrde kúshine endi.
Bul týraly Qytaıdyń «Halyq gazeti» basylymy habarlady.
Qytaılyq BAQ-tyń málimetinshe, sonymen birge 1992 jyly 26 qyrkúıekte qol qoıylǵan «Qytaı Halyq Respýblıkasynyń Úkimeti men Qazaqstan Respýblıkasynyń Úkimeti arasyndaǵy avtomobıl kóligi týraly kelisimniń» merzimi aıaqtalǵan.
«Jańa Kelisim avtomobıl kóligi salasyndaǵy ekijaqty halyqaralyq yntymaqtastyq aıasyn jahandyq tasymaldaý, tranzıttik tasymaldaý jáne úshinshi elderge tasymaldaý salalaryn keńeıtedi. Sonymen qatar, kólik quraldary men kópshiliktiń kirip-shyǵýyn basqarý, qujattardy ózara taný, salyqtan bosatý, vızalyq rejım men kedendik rásimdeýdi jeńildetý jáne aqparat almasý boıynsha salalyq jáne ınstıtýtsıonaldyq sharalar qabyldandy. Bul Qytaı-Qazaqstan halyqaralyq avtomobıl kóligi júıesin odan ári ilgeriletýge ońtaıly jaǵdaı týdyrady», dep jazady «Halyq gazeti».
Sonymen qatar osy aptada «Halyq gazeti» basylymynda «ShYU-nyń Hatshylyǵy Beıjińde Halyqaralyq naýryz merekesin ótkizdi» degen aqparat jaryq kórdi.
Shanhaı Yntymaqtastyq Uıymynyń Hatshylyǵy Beıjińde Halyqaralyq naýryz merekesin ótkizgen.
Atalǵan aqparattyń basynda «Shanhaı Yntymaqtastyq Uıymynyń Bas hatshysy Nurlan Ermekbaev» dep jazylǵan Bas hatshy sýreti berilgen.
Keltirgen derekterge súıensek, 1 sáýir kúni Shanhaı Yntymaqtastyq Uıymynyń Hatshylyǵy Beıjińde Halyqaralyq naýryz merekesin ótkizdi. Іs-sharaǵa ShYU-ǵa múshe memleketterdiń ókilderi, dıplomatııalyq korpýs músheleri, mádenıet qaıratkerleri sııaqty 200-den astam adam jınalyp, bul tirshilk pen birlikti beıneletin meıramdy birge toılaǵan.
Álemdegi eń úlken otbasylyq serýen Iranda ótedi - ParsToday
ParsToday aqparat agenttiginiń habarlaýynsha, Sársenbi (2 sáýir), Irannyń resmı kúntizbesi boıynsha farvardın aıynyń 13-shi kúni Tabıǵat kúni dep ataldy eken.
Irandyq BAQ-tyń dereginshe, Irannyń kúntizbesi boıynsha jańa jyldyń on úshinshi kúni ırandyqtar ıgi dástúr boıynsha tabıǵat aıasyna shyǵyp, tabıǵı syılyqtardan lázzat alyp, otbasymen jáne jaqyndarymen qýanyshty da este qalarlyq kúndi ótkizedi.
ParsToday agenttiginiń habarlaýynsha, jyl saıyn farvardın aıynyń 13-i Naýryz merekesiniń sońǵy kúni bolyp tabylady, ol «Sızda Bedar» dep atalady. Ejelgi ırandyqtar jyl on eki aıyn eske alatyn on eki kúndik mereke men qýanyshtan keıin Naýryzdyń 13-shi kúni merekeniń sońǵy kúnin tabıǵat aıasynda, jasyl jelekterdiń, ósimdikterdiń, bulaqtar men bulaqtardyń aǵyp jatqan sýlarynyń janynda ótkizý úshin tabıǵat aıasyna baratyn.
«Iran halqy ejelden tabıǵatty qurmettep, ony saqtap, tazartýǵa kúsh salǵan. Naýryzdyń on úshinshi kúnindegi ırandyq sherý álemdegi eń úlken pıknık bolyp tabylady jáne bul kúni erekshe merekeler men rásimderdi ótkizýdiń ejelgi jáne tarıhı tamyry bar», dep jazady ırandyq BAQ.
Oqýshylar sabaq aralyǵynda búrkit bıin bıledi - Harajorga
Qashqarlyq oqýshylar sabaq aralyq gımnastıkasyna arnalǵan materıaldyq emes mádenı mura búrkit bıin bıledi, dep habarlaıdy qytaılyq Harajorga áleýmettik jelisi.
Jaqynda, Qashqar aımaǵy Kóneshár aýdany Shynjyn-Tashqorǵan orta mektebiniń sabaq aralyǵyndaǵy 15 mınýt demalys ýaqyty áleýmettik jeli qoldanýshylaryn qyzyqtyrdy. Atap aıtqanda, kóptegen oqýshy mektep kıimin kıip, gımnastıka alańynda materıaldyq emes mádenı mura sanalatyn búrkit bıin bılep, qyran qustaı qulashtaryn erkin ashyp bıge basty. Bıikten túsirilgen kórinis tartymdy ári retti bolyp, jeli qoldanýshylarynyń erekshe yqylasyna bólenip, jyly pikirlerin qaldyrǵan.
«Óte tamasha eken!», «beızattyq(materıaldyq emes) mádenı mura mektepke kirse mádenıetke muragerlik etýmen birge densaýlyqqa paıdaly» dep jazǵan jeli qoldanýshylary.
Qytaılyq BAQ-tyń dereginshe, búrkit bıi – tájik ultynyń halyqtyq dástúrli bıi. Bul bı qarapaıym da tartymdy, oınaqy keledi. 2006 jyly tájik ultynyń búrkit bıi 1-shy toptaǵy memleket dárejeli materıaldyq emes mádenı muralardyń ýákildik týyndylarynyń tizimine engen.
Qytaı dúnıe júzi boıynsha aı topyraǵynan kerpish quıý tuńǵysh mashınasyn tapqyrlady - CNR
- Elimiz dúnıe júzi boıynsha aı topyraǵynan kerpish quıý tuńǵysh mashınasyn tapqyrlady, dep habarlaıdy Qytaıdyń «Ortalyq halyq radıosy».
Atalǵan aqparat kóziniń keltirgen derekterine súıensek, Qytaı eli dúnıejúzi boıynsha aı topyraǵynan kerpish quıatyn tuńǵysh mashınany zerttep-jasap, aıdyń betinen materıal alyp, uqsamaǵan ólshemdegi úlkendi-kishili aı topyraǵy kerpishin quıady. Bul aı shary bazasy qurylysyna mańyzdy negiz qalaıdy.