Álemde koronavırýsqa 761 mln adam shaldyqty – DDSU

JENEVA. QazAqparat – Bıyl 20 aqpan men 19 naýryz aralyǵynda álemde 3,7 mıllıonnan astam adam koronavırýs ınfektsııasyn juqtyryp, 26 myńnan astamy qaıtys boldy. Ólim-jitim aldyńǵy 28 kúnmen salystyrǵanda 46% tómendep, vırýsty juqtyrǵandar 31% azaıdy, dep habarlady Dúnıejúzilik densaýlyq saqtaý uıymynan (DDSU).

DDSU aqparattyq bıýlletenine sáıkes, tórt aptada álemde 3 738 575 adam koronavırýs juqtyrsa, olardyń 26 147-i kóz jumǵan.

28 kún ishinde eń kóp syrqattanǵandar AQSh-ta tirkeldi – 792 202. Odan keıingi oryndarda Reseı (339 564), Qytaı (320 029), Japonııa (291 672) jáne Germanııa (281 468) tur. 20 aqpan men 19 naýryz aralyǵynda qaıtys bolǵandar sany boıynsha da AQSh kósh bastap tur – 8 187. Odan keıingi qatarda Ulybrıtanııa (2 474), Japonııa (1 898), Brazılııa (1 587) jáne Qytaı (1 472) bar.

DDSU-ǵa túsken aqparat boıynsha, pandemııa bastalǵannan 21 naýryzǵa deıin álemde 761 071 826 adam koronavırýs juqtyrǵan jáne 6 879 677 adam qaıtys bolǵan.