Álemde 262 mıllıon adam demikpe aýrýyna shaldyqqan

ALMATY. KAZINFORM – Demikpe – dúnıejúzinde eń keń taralǵan aýrýlardyń biri. Bronh demikpesi tynys alý joldarynyń aýrýlaryna ákeledi. Alaıda demikpeniń sebebi allergııa men nashar ekologııa. Bul týraly allergolog, ımmýnolog Araı Batyrbaeva aıtty.

11 jeltoqsan kúni dúnıejúzilik demikpemen kúresý kúni atap ótiledi. Bul kúnniń basty mindeti — aýrý jáne ony baqylaý ádisteri týraly halyqqa jan-jaqty tanystyrý.Naýqastardy dári-dármek pen ıngalıatorlardy durys qoldanýǵa úıretý, aýrýdyń aldyn alýdyń mańyzdylyǵyna, trıggerlermen kúresýge jáne aýa sapasyn jaqsartýǵa basa nazar aýdarý.

Demikpeniń sebepteri:

— genetıkalyq beıimdilik;
— allergııalyq reaktsııalar;
— lastanǵan aýa men toksınderdiń áseri;
— vırýstyq ınfektsııalar;
— stress jáne fızıkalyq belsendilik.

— Dúnıejúzilik denasýlyq saqtaý uıymynyń málimetteri boıynsha, álemde 262 mıllıonnan astam adam demikpemen ómir súredi jáne jyl saıyn osy aýrýdan 455 myńǵa jýyq adam qaıtys bolady. Statıstıka aımaqqa, ekonomıkalyq damý deńgeıine jáne qorshaǵan orta jaǵdaıyna baılanysty ózgeredi. Demikpege balalar da shaldyǵady. Bul ekologııasy nashar nemese allergenderdiń áserine ushyraǵan adamdarda jıi kezdesedi, — deıdi Kardıologııa jáne ishki aýrýlar ǴZI respýblıkalyq allergologııa ortalyǵynyń basshysy Araı Batyrbaeva.

Dárigerdiń aıtýynsha, demikpeni emdeý tynys alý joldarynyń qabynýyn azaıtýǵa jáne órshýdiń aldyn alýǵa baǵyttalǵan.

Negizgi tásilder:

— ıngalıatsııalyq glıýkokortıkosteroıdtardy qoldaný;
— sımptomdardy tez jeńildetý úshin bronholıtıkterdi qoldaný;
— allergender men trıggerlerden aýlaq bolý;
— pıkfloýmetrlerdiń kómegimen jaǵdaıdy únemi baqylaýda ustaý.

— Bronh demikpesi — tynys alý joldarynyń sozylmaly qabyný aýrýy. Negizgi belgileri: entigý, jótel, keýde qýysynyń qysylý sezimi, syryl nemese ysqyryq túsý, — deıdi dáriger.

Spıkerdiń sózinshe, durys emdeý júrgizilse, demikpemen aýyratyndardyń kóbi ony baqylap otyrýǵa, sımptomdarynan arylýǵa, ustamalardyń sırek bolýyna nemese tipti múldem bolmaýyna, arnaıy dári-dármekterdi sırek paıdalanýǵa qol jetkize alady.