Álem kýbogy: Natalıa Bogdanova altyn medalǵa talasady

ASTANA. KAZINFORM - Astanada ótip jatqan World Boxing aıasyndaǵy álem kýbogynda Natalıa Bogdanova (70 keli) altyn medalǵa talasýǵa múmkindik aldy. 

Otandasymyz jarystyń atalǵan satysynda nıgerııalyq Patrısııa Mbatamen qolǵap túıistirdi. Jekpe-jek barysynda Natalıanyń belsendiligi baıqaldy. Qarsylasyna kóbirek soqqy jumsap úlgerdi. Nátıjesinde ol qarsylasynan basym túsip, altyn medalǵa talasýǵa múmkindik aldy.

Endi el quramasynan Sanjar Tashkenbaı (50 keli), Bekzad Nurdáýletov (85 keli), Alýa Balqybekova (51 keli), 57 keli. Aıdana Zabynbekova (57 keli), Aıda Ábikeeva (65 keli), Nadejda Rıabets (75 keli), Mahmud Sabyrhan (55 keli), Ertýǵan Zeınýllınov (65 keli), Sabyrjan Aqqalyqov (75 keli), Aıbek Oralbaı (90 keliden joǵary) sharshy alańǵa shyǵady. 

Aıta ketsek, qazirge deıin Nurbek Oralbaı (80 keli), Nazym Qyzaıbaı (48 keli), Vıktorııa Grafeeva (60 keli) altyn júldeni sarapqa salýǵa múmkindik aldy. 

Buǵan deıin qansha eldiń boksshysy jartylaı fınalǵa shyqqanyn jazǵan edik. Qazaqstan atynan 14 boksshy jartylaı fınalǵa joldama alsa, Úndistan - 10, Brazılııa men Túrkııa - 6, Ózbekstan - 4, Aýstralııa, Ázerbaıjan, Frantsııa, Anglııa, Japonııa, AQSh 3 bylǵary qolǵap sheberine úmit artady. Al Germanııa, Mońǵolııa, Bolgarııa - 2, Fınlıandııa, Taıpeı, Norvegııa, Domınıkan Respýblıkasy, Qyrǵyzstan, Nıgerııa, Fılıppın men Polsha 1 sportshysyn qosyp otyr.