Álem qazaqtary elordada bas qosty
Qazaq dıasporasy ókilderimen «Otandastar» qorynyń prezıdenti Nurtaı Ábiqaev pen Dúnıejúzi qazaqtary qaýymdastyǵy Tóraǵasynyń birinshi orynbasary Zaýytbek Turysbekov kezdesti. Júzdesý barysynda merekelik lebiz-tilekpen qatar Elbasy tapsyrmasymen qurylǵan qordyń maqsat-múddesi men jumysy túsindirildi.
«Álemge tarydaı shashylǵan qazaq balasyn biz eshýaqyt umytqan emespiz, umytpaımyz da. Barlyq qandasty tarıhı otan tóńireginde birlestirý, qoldaý úshin Dúnıejúzi qazaqtarynyń 5-shi quryltaıyndaǵy Elbasy tapsyrmasymen «Otandastar qory» kommertsııalyq emes aktsıonerlik qoǵamy quryldy. Elge oralǵan jáne shetelde turatyn qazaqtardy qoldaý maqsatyndaǵy jobalarymyzdy qazir júıelep, ázirlep jatqan jaıymyz bar. Búgingi kezdesýimizdiń maqsaty da sol - qıyrdaǵy qandastarymyzdyń shoqtyǵyn bıiktetý, sondaı-aq olardyń ulttyq bolmysyn saqtap qalý jolynda ózderińizben kúsh biriktirý», - dedi qor basshysy Nurtaı Ábiqaev.
Sondaı-aq, kezdesýge tanymal boksshy Qanat Islam da qatysty. Ol álemniń túkpir-túkpirinde júrgen qandastardy qazaqtyń birigýi jolynda aıanbaı eńbek etýge shaqyrdy. Óz kezeginde, sportshy boksty qazaq balalary arasynda keńinen nasıhattap, damytýǵa baǵyttalǵan jobalardy qolǵa alyp jatqanyn aıtyp ótti.
Kezdesýdiń taǵy bir qurmetti qonaǵy - qobyzshy, Taraz qalasynyń týmasy Áıgerim Ersaıynova. Ol Frantsııadaǵy «Qorqyt» qazaq mádenı ortalyǵyn basqarady.
«Tarıhı otanǵa, ata-anasyna birshama jaqyn bolǵysy kelgendikten asyrap alynǵan qazaq balalary orys mádenı ortalyqtaryna baryp júrgen eken. Osy nárse bizdiń namysymyzǵa tıdi. Sol úshin óz qarajatymyzdy quıyp, tuńǵysh qazaq mádenı ortalyǵyn ashtyq. Alǵashqy eki jyly tar bolsa da kishkentaı ǵımarattyń bir bólmesin jalǵa berip, túrik aǵaıyndar qol ushyn sozdy. Qazirgi tańda Frantsııadaǵy Qazaqstan elshiligindegi mádenıet, ǵylym jáne bilim bólimindemiz. Qazaq dıasporasy kóp shoǵyrlanǵan Frantsııa memleketinde bizdiń ónerimiz ben ana tilimizge degen qyzyǵýshylyq óte zor. Qazaqtyń ulttyq aspaptary men fortepıanony, ana tilimiz ben qolónerdi taǵdyr tálkegimen frantsýz shańyraǵynda ósip-ónip jatqan ózimniń qarakóz baýyrlarymnan bólek, frantsýzdarǵa da úıretip jatyrmyz. Qazirgi ýaqytta qazaq ádebıetine kóp kóńil bólgimiz keledi. Ol úshin bizge latyn álipbıindegi kitaptar qajet», - deıdi Áıgerim Ersaıynova.
Onyń aıtýynsha, ortalyq negizin qurbysy Áıgerim Mataeva ekeýi osydan úsh jyl buryn qalaǵan. Tuńǵysh qazaq mádenı ortalyǵyn ashýǵa Frantsııadaǵy asyrandy qazaq balalary sebep bolypty.
Odan bólek, kezdesý aıasynda shaqyrylǵan qonaqtarmen seriktestik týraly ekijaqty memorandýmdarǵa qol qoıylyp, sheteldegi qazaq dıasporalary men elge oralǵan otandastardy qoldaý, qandastardy tarıhı otanǵa oraltý baǵytynda kúsh jumyldyrý kelisildi.
