Álem halqy 500 mıllıonnan aspaýy kerek - konspırologııa
Vıdeo avtorynyń aıtýynsha, álem elıtasy Jer betindegi halyqty baqylaý jospary týraly 1980 jyly málimdegen. Muny tabıǵatpen tepe-teńdikte bolý úshin planeta halqyn 500 000 000 aspaıtyn deńgeıde ustaý qajettiligi týraly jazylǵan Djordjııa taqtasynan alynǵan dáıeksóz dáleldeıdi eken. Bul manıpýlıatsııa.
Djordjııa taqtasy – bul «amerıkalyq Stoýnhendj» retinde belgili eskertkish. Ol Djordjııa shtatynda Elbertonda ornatylǵan. Bıiktigi 6 metrden asatyn granıt plıtalardy tabıǵı tasty óńdeıtin Elberton Granite Finishing Corporation fırmasy shyn esimin aıtpaı, búrkenshik atyn ǵana kórsetken klıenttiń tapsyrysymen jasaǵan. Ol bolashaq urpaqqa habarlama qaldyrmaq bolǵan «shetelde turatyn amerıkalyqtardyń shaǵyn tobynyń» atynan áreket etip jatqanyn aıtqan. Monýment jalpy salmaǵy 119 tonna bolatyn ortalyq plıtany qorshap turǵan tegis emes jıekteri bar tórt alyp tastan turady.
Plıtalardaǵy mátin segiz tilde — aǵylshyn, orys, qytaı, arab, ıvrıt, sýahılı, hındı jáne ıspan tilderinde jazylǵan. Monýmentke tapsyrys bergen belgisiz tulǵany eshkim kórmegen. Postapokalıptıkalyq habarlamasy bar tas qurylymynyń ózi jergilikti kórikti orynǵa aınalyp, oǵan qatysty kóptegen túrli teorııalar tarady. Bireýler bul sózder ratsıonaldy oılanýǵa ıtermeleıdi dep oılasa, basqalary monýmentke sektanttar tapsyrys bergen deıdi. Qastandyq teorııasyn jaqtaýshylardyń aıtýynsha, eskertkish avtory – «álem ıeleri». Biraq bul pikir rastalmady, sondyqtan joramal bolyp qaldy.
Aıta keteıik, 1650 jyly Jer halqynyń sany 500 000 000 adamǵa jetti. Al 1980 jyldary Djordjııa taqtasy ornatylǵan kezde planetada 4,4 mıllıardtan astam adam bolǵan. Qazirgi kezde bul kórsetkish 8 mıllıardqa jýyqtady.
Demek, Djordjııa taqtasyndaǵy jazbalar Jer halqynyń sanyn baqylaý jáne azaıtý jónindegi belgili bir jospardyń bar ekenin dáleldemeıdi.
