Álem halqynyń 40 paıyzy allergııalyq aýrýlarmen aýyrady
ALMATY. KAZINFORM – Allergııalyq aýrýlar qazirgi ýaqytta mańyzdy medıtsınalyq-áleýmettik problemaǵa aınaldy. Álem halqynyń 40%-y allergııalyq aýrýlarmen aýyrady.
Jyl saıyn 8 shildede Dúnıejúzilik allergııamen kúres kúni atap ótiledi. Keıingi 20 jylda álemde genetıkalyq beıimdilikke jáne olardy klınıkalyq kórinister túrinde júzege asyrýǵa ákeletin kóptegen faktordyń bolýyna baılanysty allergııalyq aýrýlardyń epıdemııasy baıqalady.
Jahandyq statıstıka málimetteri boıynsha, álem halqynyń árbir tórtinshi-besinshi adamy allergııamen aýyrady. Kardıologııa jáne ishki aýrýlar ǴZI Respýblıkalyq allergologııa ortalyǵynyń basshysy Araı Batyrbaevanyń aıtýynsha, kez kelgen allergııanyń negizgi sebepteri adamnyń genetıkasyna negizdelgen. Kóbinese allergııa erte jasta taǵamǵa joǵary sezimtaldyqpen paıda bola bastaıdy.
«Allergııalyq aýrýlardyń aldyn alý úshin allergııa týdyratyn zattardy anyqtaý jáne este saqtaý qajet. Olarmen baılanysta bolýdan aýlaq bolyńyz, qajet bolǵan jaǵdaıda ózińizge qalaı kómektesýge bolatynyn bilińiz. Eger ósimdik tozańyna allergııańyz bolsa, aýa temperatýrasy joǵary bolǵan kezde kúnge shyqpańyz, maskany qoldanyńyz. Eger jándikter shaǵyp, ornynda jándiktiń ýy qalsa, ony alyp tastańyz jáne tistegen jerge sýyq kompress qoıyńyz. Úıdegi dári qobdıshasynda dáriger taǵaıyndaǵan dári-dármekter bolýy kerek. Ózdiginen emdeýmen aınalyspaı, medıtsınalyq mekemege júginińiz», - deıdi dáriger A.Batyrbaeva.
Allergııa – bul organızmniń qorshaǵan ortanyń keıbir faktorlary – allergenderdiń áserine joǵary sezimtaldyq jaǵdaıy, osy zattardyń qaıta áserinen órshıdi. Bul aýrýdyń damýyna yqpal etetin faktorlardyń ishinde eń kóp taraǵandary: qorshaǵan ortanyń lastanýy, psıhologııalyq shamadan tys júkteme, klımattyń ózgerýi, sapasyz tamaq ónimderi, dári-dármekterdi baqylaýsyz qoldaný.
Aıta keteıik, «Allergııa» termınin 1906 jyly balalar dárigeri Klemens fon Pırke engizgen. Sımptomdar ejelden beri belgili. Allergııa týraly alǵash ret Ejelgi Egıpette aıtylǵan, biraq ony aýqymdy zertteý tek HІH ǵasyrda bastaldy.
