«Álem Barysynda» 50 eldiń balýandary baq synaıdy

ASTANA. QazAqparat - Qazaq kúresinen ekinshi «Álem Barysy» Astanada ótedi, dep habarlaıdy QazAqparat tilshisi.

Osymen ekinshi márte jalaýy jelbireıtin «Álem Barysy» týrnıri  8 qyrkúıekte elorda tórindegi «Barys Arena» stadıonynda uıymdastyrylady.

Esterińizge sala keteıik, «Álem Barysy» týrnıri tuńǵysh ret 2014 jyly Pavlodar qalasynda ótken bolatyn. Oǵan álemniń 35 elinen eń myqty balýandar kelip qatysqany esimizde. Olardyń arasynda dzıýdodan álem jáne Olımpıada chempıony chex Lýkash Krpalek, sambodan álem chempıony armenııalyq Garıbıan Arýtıýn, dzıýdodan álem chempıonatynyń júldegeri nemis Raımýnd Gırdts, kýrashtan álem chempıony ızraldyq Gregorı Rýdelson, alyshtan Azııa chempıony parsy Mýhammad Teımoýrı Sarah, Olımpıada jáne álem chempıonatynyń júldegeri kýbalyq Oskar Rene Vıdal Braıson jáne taǵy basqa ataqty balýandar boz kilemge shyqqan edi.

Tartysty báseke nátıjesinde altyn belbeý men 100 myń AQSh dollardy kýbalyq Braıson ıelendi. Ekinshi orynda Aıbek Nuǵymarov, úshinshi satyda reseılik Maksım Shırıaev. Úsh jyl buryn xalyqaralyq týrnır retinde tusaýy kesilgen «Álem Barysy» búginde qazaq kúresinen absolıýtti álem chempıonaty deńgeıine ósti.

Al bıyl EKSPO-2017 aıasynda ótkeli otyrǵan ekinshi «Álem Barysy» týrnırine 50 memlekettiń eń myqty degen bir-bir balýany baq synaıdy. Ázirge Qazaqstan namysyn kimderdiń qorǵaıtyny belgisiz.