Alekseı Tsoı Pfizer vaktsınasynyń aqyly aınalymǵa qashan shyǵatynyn aıtty
«Mańyzdy sheshim qabyldandy. Úkimet Pfizer vaktsınasyn kommertsııalyq segmentke jiberýdi qoldady. Qazir sonyń tetikteri pysyqtalyp jatyr. Qazaqstan óńirleriniń bárinde atalǵan vaktsınany kommertsııalyq segmentke shyǵarý múmkindigin qamtamasyz etemiz dep josparlap otyrmyz. Qazirdiń ózinde jasóspirimder, júkti jáne bala emizetin áıelder sııaqty tegin vaktsına alatyn sanattardy qospaǵanda halyqaralyq saparǵa jıi shyǵatyndar úshin mundaı vaktsınany alý múmkindigi bolady», - dedi Alekseı Tsoı Úkimet otyrysynan keıin jýrnalısterge jaýap beret otyryp.
Sondaı-aq, ol Pfizer vaktsınasyn qashannan bastap aqyly negizde alý múmkin bolatynyn aıtty.
«Baǵasy áli anyqtalady. Bul kommertsııalyq segment. Básekelestik orta bar degendeı. Biz osy jyldyń sońyna deıin bul vaktsına aqyly aınalymǵa túsýi kerek dep josparlap otyrmyz. Jyl sońyna deıin biz óńirlerge aqyly vaktsınany jetkizýdiń tetigin anyqtaımyz. Ekpeni sýyq ortada ustaý tizbeginiń talaptaryn saqtaý óte mańyzdy. Bálkim qazir vaktsınatsııamen aınalysatyn obektilerde saqtaıtyn shyǵarmyz. Tońazytqysh jabdyqtary men ózge de talaptar saqtalǵan ǵoı», - dep túsindirdi Alekseı Tsoı.
Mınıstrdiń málimeti boıynsha, Pfizer vaktsınasynyń kommertsııalyq aınalymǵa shyǵarylatyn partııasyn jetkizý máselesi qazirdiń ózinde pysyqtalyp jatyr.
«Eń bastysy, jetkizýdiń barlyq tetikteri, quqyqtyq máseleler pysyqtaldy. Bul turǵyda óte aýqymdy jumys isteldi. Qazir biz tapsyrys kólemin qosymsha kelisimdermen keńeıte alamyz. Bastysy, vaktsınany satyp alý men jetkizý tetigi pysyqtalyp boldy. Pfizer vaktsınasynyń alǵashqy partııasy kelgenin bilesizder. Endigi partııalary apta saıyn kelip otyrady», - dedi vedomstvo basshysy.
