Alekseı Tsoı Atyraýda aımaqtyq shtabtyń otyrysyn ótkizdi
Atyraý oblysynda juqpaly aýrýlar aýrýhanalarynda tósek-oryndardyń qamtylýynyń birtindep ósýi baıqalady. Máselen, 5 tamyzdaǵy jaǵdaı boıynsha 1 734 naýqas statsıonarlyq em alýda. Bul 5 shildedegi statıstıkanyń 3,5 esege óskenin kórsetedi. Reanımatsııalyq kereýetterde 76 naýqas jatyr. Mundaǵy júkteme 5 shildeden beri 2,5 esege ósken.
Oblysta barlyǵy 16 statsıonar bar. Onyń 7-eýi aýdandar, al, 9 statsıonar Atyraý qalasynda ornalasqan. Atyraý qalasynda tósek-oryn júktemesi artqan. Munda 6 statsıonardyń 4-eýinde júkteme 97%-dy qurap otyr. Atyraý qalasynda ınfektsııalyq tósek-orynnyń júktemesi 60%, reanımatsııalyq kereýetter júktemesi 67%-ǵa ósken.
Sondaı-aq, modýldi aýrýhanada reanımatsııalyq kereýetterdiń jetispeýshiligi baıqalady. Aýrýhanada 19 reanımatsııalyq kereýettiń 95%-y naýqastarǵa tolǵan. Al kardıologııalyq ortalyqtaǵy 11 kereýettiń 92%-ynda naýqastar emdelip jatyr.
«Bul – alańdaýshylyq týǵyzatyn jaǵdaı. Óıtkeni, júktemeniń artýy kereýettiń jetispeýshiligine, turǵyndarǵa statsıonarlyq kómek kórsetýdiń tómendeýine ákelip soǵýy múmkin», - dedi Densaýlyq saqtaý mınıstriniń orynbasary Ajar Ǵınııat.
Osy aptada Densaýlyq saqtaý mınıstrliginiń jumys toby Atyraý qalasyndaǵy 5 emhanada, 2 jekemenshik emhanada, sondaı-aq, eki aýdandyq aýrýhanada monıtorıng júrgizdi. Taldaý nátıjesinde jyljymaly brıgadalar sanynyń jetkiliksizdigi, QIAJ-ge qońyraýdyń ýaqytynda engizilmeýi baıqaldy. Bul bir jyljymaly brıgadaǵa naqty júktemeni kórsetpeıtini anyq.
Ajar Ǵınııattyń aıtýynsha, barlyq medıtsınalyq uıymda naýqastardy ambýlatorııalyq baqylaý tıisti deńgeıde emestigi anyqtalǵan. Baqylaý paraqtary sapasyz júrgizilgen. KVI juqtyrǵandardy emdeýge arnalǵan klınıkalyq hattamalar saqtalmaıdy. Dárigerler egde jastaǵy emdelýshilerge qatysty qyraǵylyq tanytpaıdy. Jyljymaly brıgadadaǵy dárigerlerdiń mindetin ýchaskelik qabyldaýdaǵy jumyspen biriktirý jaǵdaıy kezdesedi. Bul sanıtarlyq-epıdemıologııalyq rejımniń saqtalýyna qaıshy keledi.
Densaýlyq saqtaý mınıstrliginiń usynysymen Atyraý qalasynda naýqastardyń tirkelýin, mobıldi toptardyń jumysyn baqylaý úshin sıtýatsııalyq ortalyqtar qurylǵan. Oǵan naýqastardy aýrýhanaǵa jatqyzý, ambýlatorlyq emniń ýaqtyly taǵaıyndalýy, dári-dármekpen tegin qamtamasyz etý kiredi.
Mınıstr Alekseı Tsoıdyń pikirinshe, Atyraý oblysynda KVI aýrýshańdyǵynyń edáýir ósýi turǵyndardyń sanıtarlyq-epıdemıologııalyq talaptardy saqtamaýynan bolyp otyr. Naýqastardy aýrýhanaǵa jatqyzý paıyzynyń joǵarylaýyna «Delta» agressıvti shtamymen jáne ambýlatorlyq-emhanalyq jumystyń jetkiliksiz uıymdastyrylýy áser etken. Bul jaǵdaıy aýyr naýqastardyń kóbeıýine yqpal etken.
Osyǵan baılanysty Atyraý oblystyq densaýlyq saqtaý basqarmasyna shuǵyl túrde oryndalýy tıis birqatar usynystar berildi.
Eske sala ketelik, buǵan deıin Alekseı Tsoı Atyraý oblysyndaǵy aýyl aýrýhanasynda bolǵanyn jazǵan edik.
