Aleksandr Shevchenko Maıamı masters týrnıriniń ekinshi aınalymyna shyqty

ASTANA. KAZINFORM — Qazaqstandyq tennısshi, álemniń 84-raketkasy Aleksandr Shevchenko Maıamı (AQSh) masters týrnırin sátti bastady. 

Qazaqstandyq tennısshi alǵashqy aınalymda álemdik reıtıngide 101-orynda turǵan ıtalııalyq Matteo Arnaldımen sheberlik baıqasty.

Qarsylastar osyǵan deıin eki ret kezdesip, onda Arnaldı jeńgen edi.

Bul joly birinshi partııada taı-breıkte Shevchenko basymdylyq tanytty — 7:6 (7:5).

Ekinshisinde Arnaldı dál sondaı eseppen ese qaıyrdy — 7:6 (7:5).

Sheshýshi, úshinshi setti qazaqstandyq sportshy óz paıdasyna jazdy — 6:2.

Eki saǵat 32 mınýtqa sozylǵan tartysty básekede Shevchenko 8 eıspen birge 14 breık-poınttyń tórteýin paıdalandy. Arnaldı 8 eıs, 2 breıkpen (7 breık-poınt) kózge tústi.

Aleksandr Shevchenko úshinshi aınalymǵa shyǵý úshin álemniń 9-raketkasy, amerıkalyq Ben Sheltonmen talasady.

Qazaqstannyń birinshi, álemniń 11-raketkasy Aleksandr Býblık ekinshi aınalymda kútpegen jerden reıtıngide 68-satydaǵy ıtalııalyq Matteo Berrettınıden utylyp qaldy — 4:6, 4:6.

Bir saǵat 28 mınýtta aıaqtalǵan bul kezdesýde Býblık 5 eıs jasaǵanymen, 6 breık-poınttan túk shyǵara almady. Berrettını 17 eıs, 2 breıkpen (7 breık-poınt) erekshelendi. 

Eske sala keteıik, budan buryn Maıamı masters týrnırinde Pýtıntsevanyń Rybakınamen oınaıtynyn jazǵan bolatynbyz.

Sondaı-aq Ámir Omarhanov Týnıstegi jarystyń jartylaı fınalyna joldama aldy.