Aleksandr Býblık: El namysyn qorǵaý – úlken jaýapkershilik

ASTANA. KAZINFORM – Qazaqstan quramasynyń tennısshisi, ATP álemdik reıtınginiń alǵashqy ondyǵyna engen Aleksandr Býblık mansabyndaǵy psıhologııalyq turǵydan eń kúrdeli oıyndardyń biri retinde Devıs kýbogyn atady. Bul týraly ol Kazinform agenttiginiń tilshisine bergen suhbatynda aıtty.

Aleksandr Býblık bul oıyn medıa ókilderimen ótken jabyq formattaǵy meet & greet kezdesý barysynda bólisti.

Sportshynyń aıtýynsha, komandalyq týrnırdegi negizgi qysym el namysyn qorǵaý jaýapkershiligimen tikeleı baılanysty.

– Devıs kýbogynda sen óziń úshin emes, el úshin oınaısyń. Bul maǵan ońaı bolmady. Naqty osy jaýapkershilikke baılanysty ishki qysymdy qatty sezinemin, – dedi ol.

Onyń aıtýynsha, qoǵamdyq synǵa onsha mán bermegenimen, ishki jaýapkershilik únemi seziledi.

– Synǵa sabyrmen qaraımyn, shyny kerek, asa mán bermeımin. Biraq el úshin oınaýdyń jaýapkershiligin sezinemin, – dedi tennısshi.

Aleksandr Býblık sońǵy jyldary Devıs kýbogy aıasyndaǵy nátıjeleri ATP týryndaǵy jetistikterimen salystyrǵanda tómen ekenin de jasyrmady.

– Osy ýaqyt ishinde men reıtıngtiń alǵashqy ondyǵyna endim, ATP týrnırlerinde birneshe tıtýl jeńip aldym. Biraq Devıs kýbogynda jeńisterim bolǵan joq. Bul, árıne, belgili bir deńgeıde qıyndyq týdyrady, – dep moıyndady ol.

Soǵan qaramastan, tennısshi ulttyq qurama sapynda oınaýdy óz mindeti sanaıtynyn atap ótti.

– Meniń kelmeı qoıýyma da bolatyn edi. Biraq bul maǵan tán áreket emes. Qazaqstan úshin oınaýdy óz boryshym dep esepteımin, – dedi Aleksandr Býblık.

Sportshy mansaptyq ósýi men álemdik reıtıngtiń úzdik ondyǵyna enýi týraly aıtyp, sheshýshi kezeń retinde burynǵy «jaıly aımaqtan» shyǵýdy jáne múmkin bolatyn quldyraýdy qabyldaýdy atady.

– Reıtıngtegi 30-40-oryndar men úshin yńǵaıly boldy. Ol jerde qysym az. Al alǵashqy júzdikten shyǵyp qalǵan kezde, nátıje úshin kúressiz tennıs oınaý qyzyq emes ekenin túsindim, – dedi ol.

Onyń aıtýynsha, ózgeristerge sanaly daıyndyq pen jattyǵý protsesine degen kózqarastyń ózgerýi áser etken.

– Bul sıqyrly taıaqshanyń bir silteýi emes. Qosymsha jaýapkershilik paıda boldy, men sony jattyǵý kezinde ıgere aldym, – dep atap ótti sportshy.

Aldaǵy maqsattary týraly suraqqa jaýap bergen Aleksandr Býblık ózin alǵashqy ondyqtyń oıynshysy dep ataýǵa áli erte ekenin jetkizdi.

– Alǵashqy ondyqqa kirý – bir bólek, sol jerde birneshe jyl boıy turaqtap qalý – múlde basqa dúnıe. Sondyqtan ózimdi TOP-10 oıynshysymyn dep aıta almaımyn, – dedi ol.

Aldaǵy kúnderi Aleksandr Býblık Qazaqstan quramasy sapynda Monako komandasyna qarsy Devıs kýbogynyń matchtaryna qatysady.

6-7 aqpan kúnderi Astanada erler ulttyq quramasy atalǵan qarsylasqa qarsy oıyn ótkizedi.

Eger Qazaqstan quramasy jeńiske jetse, komanda Devıs kýbogynyń birinshi álemdik tobyna joldama alady. Devıs kýbogy – erler arasyndaǵy tennısten komandalyq álem chempıonatyna teń jarys sanalady.

Aıta keteıik, buǵan deıin Aleksandr Býblıktiń Australian Open týrnırine qatysqany habarlanǵan bolatyn.