Aldaǵy eki jylda 12 óńirde ońaltý ortalyqtary salynady

NUR-SULTAN. QazAqparat – 2024 jylǵa deıin 12 óńirde 150 oryndyq ońaltý ortalyqtary salynady. Bul týraly QR Eńbek jáne halyqty áleýmettik qorǵaý mınıstri Serik Shápkenov vedomstvonyń keńeıtilgen alqa májilisinde málim etti, dep habarlaıdy QazAqparat tilshisi.

Mınıstr óz sózinde Qazaqstanda múgedektigi bar adamdardyń ómir súrý sapasyn arttyrý úshin keshendi sharalar júzege asyrylyp jatqanyn atap ótti.

Aıtýynsha, 2021 jylǵy qazanda zańnamaǵa birqatar jaǵdaıdy jaqsartatyn normalardy kózdeıtin túzetýler qabyldanǵan.

«Nátıjesinde I toptaǵy múgedektigi adamdardy kútý jáne olardy súıemeldep júrý boıynsha biryńǵaı járdemaqyny 26,3 myń adam alyp, 57,2 myń múgedektigi bar bala úshin járdemaqy mólsherin ulǵaıtýdy kózdeıtin toptarǵa bólý júrgizildi jáne 2,8 myń alýshy bir mezgilde múgedektik jáne asyraýshysynan aıyrylý jóninde járdemaqylardy ıelene alady.

Elimizde shamamen 700 myń múgedektigi bar adam turady. Ekonomıkada eńbekke qabilettilerdiń 126 myńy nemese 25%-dan azy jumyspen qamtylǵan. 2022 jyldyń sońyna deıin eńbekke qabiletti jastaǵy jumyspen qamtylǵandardyń úlesin 25%-ǵa deıin arttyrýdy josparlap otyrmyz», - dedi Serik Shápkenov.

Sonymen qatar, vedomstvo basshysy túıinin tarqatýdy talap etetin máseleler áli de bar ekenin atap ótti.

«Ásirese ońaltý máselesi ózekti. Osyǵan baılanysty 2022-2024 jyldary 12 óńirde árqaısysy 150 oryndyq jańa ońaltý ortalyqtaryn salý josparlanǵan. 2021 jyly olardyń qurylysy Shyǵys Qazaqstan, Jambyl jáne Túrkistan oblystarynda bastaldy. Aǵymdaǵy jyly Aqtóbe jáne Batys Qazaqstan oblystarynda qurylysty júrgizý josparlanýda. Eńbekmıni bul máseleni erekshe baqylaýda ustaıdy. Óńirlerde de qurylys barysyna qatań baqylaý júrgizilýi tıis», – dedi mınıstr.