Aldaǵy kúnderi Qazaqstanda tuman túsip, jel kúsheıedi

«Qazgıdromet» RMK-sy 28-30 qarashaǵa arnalǵan aýa raıy boljamyn jarııalady, dep habarlaıdy Kazinform.

Aldaǵy kúnderi Qazaqstan aýmaǵyndaǵy antıtsıklondy Qara teńiz aımaqtarynan keletin tsıklon almastyrady.

— Shyǵysqa qaraı yǵysa otyryp, 28 qarashada batysta, 29 qarashada soltústik, ortalyq jáne ońtústik oblystarda, 30 qarashada respýblıkanyń basym bóliginde jańbyr, qar túrinde jaýyn jaýady, tuman túsip, kóktaıǵaq bolady, jel kúsheıedi. 28 jáne 30 qarashada soltústik oblystarda jel ekpini 23-28 m/s-ke jetip, qar jaýady. Onyń áserin ásirese ońtústik óńir turǵyndary sezinedi, onda ashyq ári jyly aýa raıy jaýyn-shashynǵa (jańbyr túrinde, taýly aımaqtarda qarǵa) ulasady. Aýa temperatýrasy 15-24 gradýstan 0-12 gradýsqa deıin tómendeıdi, - delingen habarlamada.