Aldaǵy kúnderi 28 gradýsqa deıin aıaz bolady — Qazgıdromet

ASTANA. KAZINFORM — Qazgıdromet aldaǵy 3 kúnge aýa raıy boljamyn jarııalady.

Sınoptıkterdiń boljamynsha, respýblıkanyń basym bóliginiń aýa raıyn soltústik tsıklonnyń tereń jyrasy aıqyndaıtyn bolady. Osyǵan baılanysty aýa raıynyń qubylmalyǵy kútiledi.

— Eldiń basym bóliginde qar jaýady, elimizdiń shyǵysynda qalyń qar jaýyp, burqasyn kútiledi, ońtústik óńirlerde jańbyr sońy qarǵa ulasady. Taýly aýdandarda qatty jaýyn-shashyn bolady. Shyǵys, ońtústik jáne ortalyq aımaqtarda kóktaıǵaq bolady dep boljanýda. Eldiń batysy men soltústik-batysynda keń aýqymdy Skandınavııalyq antıtsıklonnyń áserinen jaýyn-shashynsyz aýa raıy kútiledi», — delingen habarlamada.

Aýa temperatýrasy túnde eldiń batysynda 5-13 gradýsqa, al soltústik-batysta 13-25 gradýsqa deıin tómendeıdi. Elimizdiń soltústiginde 20-25 gradýs aıaz boljanady. Al Qazaqstannyń ortalyǵynda termometr 15-28 gradýs aıaz bolady, shyǵysta 18-26 gradýs, ońtústik-shyǵys óńirlerde 8-21 gradýsqa deıin aýa temperatýrasynyń tómendeýi kútiledi.