Aldaǵy bes jylda Eýropa Odaǵyn kim basqarady
ASTANA. KAZINFORM — Aldaǵy bes jylda Eýropalyq Odaqty kim basqarady? Brıýsselde Eýroodaq elderi men úkimet basshylary kelissóz bastady, dep habarlaıdy Euronews.
17 maýsymda Brıýsselde Eýropa Odaǵyn aldaǵy bes jylda kim basqaratyny týraly kelissóz bastaldy.
Kezdesýge qatysýshylar Eýrokomıssııa basshysyn, Eýropalyq keńes tóraǵasyn jáne EO syrtqy saıasat jáne qaýipsizdik jónindegi Joǵarǵy komıssaryn saılaý máseleleriin sheshýge tıis.
EO memleketteri men úkimet basshylary qazirgi jaǵdaıdy eskerip, geografııalyq, genderlik jáne partııalyq tepe-teńdikti saqtaýy kerek.
Eýrokomıssııa basshysy laýazymyna naqty favorıt — onyń qazirgi tóraıymy Ýrsýla fon der Lıaıen. Degenmen, Italııanyń Marıo Dragı men Grekııanyń premer-mınıstri Kırıakos Mıtsotakıs te naǵyz úmitker retinde ataldy.
Sarapshylardyń pikirinshe, Fon der Lıaıen basqaratyn Eýropa halyqtyq partııasynyń Eýroparlament saılaýyndaǵy jeńisi jáne onyń jumys turaqtylyǵy osy saılaýda alǵa shyǵýyna septigin tıgize alady.
«Eýropalyq keńes ınstıtýtsıonaldy ózgeristerdi engizýge óte yntaly bolady. Protsesti tez aıaqtaý úshin. Óıtkeni biz óte aýmaly-tókpeli zamanda, alasapyran geosaıası ýaqytta ómir súrip jatyrmyz. Bul birinshiden. Bizdi Tramptyń taǵy bir prezıdenttigi kútip tur. Sondyqtan meniń oıymsha, EO kóshbasshylary jańa kún tártibi bar jańa komıssııanyń múmkindiginshe tezirek qurylýyna múddeli», — deıdi Eýropalyq saıasatty zertteý ortalyǵynyń sarapshysy Sofııa Rýssak.
Eýropa keńesinde múmkindikter neǵurlym ashyq, degenmen barlyq belgiler ony sotsıal-demokrattar ókili basqaratynyn kórsetedi.
Eýropalyq keńes tóraǵasy laýazymyna eń yqtımal úmitkerler — Portýgalııanyń burynǵy premer-mınıstri Antonıý Koshta men Danııa úkimetiniń basshysy Mette Frederıksen.
Eýropalyq Odaqtyń syrtqy ister jáne qaýipsizdik saıasaty jónindegi joǵarǵy ókiliniń qyzmetine keletin bolsaq, suraqtar kóbirek.
Biraq, negizinen, bul laýazymǵa lıberal ótýi tıis.
Mundaǵy úmitkerler — Estonııa premer-mınıstri Kaıa Kallas, Polsha syrtqy ister mınıstri Radoslav Sıkorskıı jáne Belgııanyń premer-mınıstriniń mindetin atqarýshy Aleksandr de Kroo bolýy múmkin.
