Alaıaqtyń arbaýyna ilingen áıel 4 mln teńgeden astam aqshasynan aıyryldy - Óskemen

ÓSKEMEN. QazAqparat – Óskemen qalasynda úı satyp alamyn dep alaıaqtyń qurbanyna aınalǵan áıel adam iri kólemdegi aqshasynan aıyrylǵan, dep habarlaıdy QazAqparat tilshisi.

Qalalyq Polıtsııa basqarmasy baspasóz qyzmetiniń málimetine súıensek, Úlbi polıtsııa bólimine 52 jastaǵy azamatsha júgingen. Óz sózinde ol úı satatyndyǵyn aıtqan alaıaqqa 4 289 000 teńge bergendigin jetkizdi.

«Áıel adam páter satylatyndyǵy týraly jarnamany kórip, sonda jazylǵan nómirge qońyraý shalǵan. Úıdi unatqan soń, oıyna esh sekem kelmeı alǵashqy jarna retinde atalǵan somany bere saldy. Aqshany qolǵa túsirgen alaıaq oǵan qujattardy resimdeý úshin birneshe aı kúte turý kerektigin jetkizdi», - deıdi basqarma bastyǵy Andreı Mýla.

Jedel-izdestirý sharalaryn júrgizgen polıtsııa qyzmetkerleri 31 jastaǵy qala turǵynyn qolǵa túsirdi. Kúdikti óz kinásin moıyndap otyr. Qazirgi ýaqytta atalǵan fakti boıynsha QR Qylmystyq Kodeksiniń 190-baby 3-bóligine (Alaıaqtyq) sáıkes sotqa deıingi tergeý amaldary bastaldy.