Alaıaqtyqpen kúres: antıfrod ortalyǵynyń jumys erejeleri ázirlendi
ASTANA. KAZINFORM – Ulttyq bank tólem operatsııalaryndaǵy alaıaqtyq belgileri bar tranzaktsııalar boıynsha derekter almasý, ıaǵnı antıfrod-ortalyqtyń qyzmetin retteıtin erejeler jobasyn ázirledi.
Jobaǵa sáıkes, antıfrod-ortalyǵy qarjy jáne tólem uıymdarymen ózara is-qımyl jasaıdy. Alaıaqtyq belgileri bar tranzaktsııalar týraly aqparat túsken jaǵdaıda, ortalyq operatsııalardy ýaqytsha toqtata alady nemese olardy oryndaýdan bas tartady. Sondaı-aq jobada áreketterdiń tártibi men merzimi naqty kórsetilgen.
Alaıaqtyqpen kúres tıimdiligin arttyrý jáne ortalyqtyń fýnktsıonalyn keńeıtý maqsatynda joba kelesi sharalardy kózdeıdi:
- antıfrod-ortalyǵynyń derekqoryna engizilgen klıentter úshin keıbir qarjylyq jáne tólem qyzmetine qoljetimdilikti shekteý, sondaı-aq osy qyzmetti alý úshin ótinish berý tártibin aıqyndaý;
- zańsyz tranzaktsııalardy anyqtaý jáne buǵattaý maqsatynda qylmystyq qýdalaý organdary, ulttyq qaýipsizdik organdary jáne ózge de vedomstvolarmen ózara is-qımyldy jolǵa qoıý;
- tranzaktsııa alaıaqtyq dep tanylyp, qylmystyq qýdalaý organy bergen jáne prokýror sanktsııalaǵan habarlama sheńberinde, klıentke qarajatty qaıtarý mehanızmin engizý.
Ulttyq banktiń málimetinshe, antıfrod-ortalyqtyń qurylýy qarjy naryǵyndaǵy alaıaqtyq operatsııalardyń sanyn azaıtýǵa baǵyttalǵan. Sonymen qatar atalǵan ortalyq arnaıy organdarǵa zańsyz qarjylyq áreketterdi anyqtaýǵa jáne toqtatýǵa járdemdesedi.
- Antıfrod - ortalyqtyń iske qosylýy eldiń bank júıesinde kúmándi tranzaktsııalar sany men táýekelin azaıtady dep kútiledi,- delingen buıryq jobasynda.
Eske salaıyq, byltyr tamyzda Ulttyq bank alaıaqtyqqa tán tranzaktsııalar týraly derek almasatyn antıfrod-ortalyqty iske qosty.
Bıyl mamyrda belgili bolǵandaı Ulttyq bank antıfrod-ortalyq arqyly 2,2 mlrd teńgeniń alaıaqtyq áreketin buǵattaǵan.