Alaıaqtyq jasady dep aıyptalǵan 620 Qytaı azamaty eline qaıtaryldy

ASTANA. KAZINFORM - Qytaı, Mıanma jáne Taıland elderiniń quqyq qorǵaý organdary transshekaralyq telekommýnıkatsııalyq alaıaqtyqqa qarsy birlesken operatsııalardi kúsheıtip jatyr.

Nátıjesinde jyl basynan beri transshekaralyq qylmystyq toptyń múshesi degen kúdikpen ustalǵan 620 Qytaı azamaty eline qaıtaryldy. Bul týraly Lianhe Zaobao basylymy habarlady.

28 aqpan kúni Taılandtyń Bangkok qalasynda úsh eldiń ókilderi transshekaralyq telekommýnıkatsııalyq alaıaqtyqqa qarsy kúresti úılestirý jóninde mınıstrlik deńgeıinde kezdesý ótkizdi. Kezdesýde taraptar birlesken kúresti odan saıyn kúsheıtý jaıly pikir almasyp, birqatar ýaǵdalastyqqa qol jetkizdi.

Basylymnyń jazýynsha, kezdesý transshekaralyq alaıaqtyqqa qarsy kúres boıynsha Qytaı, Mıanma jáne Taıland arasyndaǵy yntymaqtastyqtyń mańyzdy ári kezeńdik nátıjege qol jetkizgenin kórsetti. Kezdesýde taraptar birlesken is-qımyldy udaıy jalǵastyrý, turaqty úılestirý tetikterin ornatý, aqparat almasýdy kúsheıtý, kúdiktilerdi eline qaıtarý rásimderin jetildirý máselesi boıynsha kelisimge keldi.

Belgili bolǵandaı, sońǵy ýaqytta úsh eldiń tıisti vedomstvalary uıymdastyrǵan birlesken operatsııalardyń nátıjesinde, Mıanmanyń Mıavadı aımaǵynda qolǵa túsken 620 Qytaı azamaty eline qaıtarylǵan.

Sońǵy jyldary Mıanmanyń shekaralyq aýdandarynda telekommýnıkatsııalyq alaıaqtyq órship tur. Alaıaqtyqpen aınalysatyn qylmystyq toptar shetel azamattaryn «jalaqysy joǵary jumys bar» dep shyrǵalap, aımaqqa shaqyryp alǵannan keıin kepilge alyp, ınternet arqyly alaıaqtyq jasaýǵa májbúrleıdi.

Qytaı tarapynan jasalǵan qysymnyń kúsheıýine baılanysty, jyl basynan beri Mıanma bıligi alaıaqtardyń birqatar «apanyn» joıdy. Arnaıy operatsııalar barysynda 20-ǵa jýyq eldiń shamamen 7000 azamaty quldyqtan bosatyldy.

Osyǵan deıin Qazaqstanǵa ınternet-alaıaqtyq jasaý úshin kelgen sheteldiktiń tutqyndalǵany týraly jazdyq.