Alaıaqtar jyl basynan beri almatylyqtardy 12 mlrd teńgege aldaǵan
ALMATY. KAZINFORM — Almaty polıtsııasynyń bastyǵy Arystanǵanı Zapparov qalalyq qoǵamdyq keńeste jyl basynan beri shaharda 6 myńnan astam alaıaqtyq tirkelgenin habarlady.
Alaıaqtardyń áreketterinen qala turǵyndaryna 12 mıllıard teńgeden astam shyǵyn keltirilgen.
«Qabyldanǵan sharalar ınternet-alaıaqtyqty 14,5%-ǵa tómendetýge múmkindik berdi. Zııatkerlik menshik quqyqtaryn buzýmen baılanysty qylmystardyń aldyn alý men kúresti kúsheıtýge baǵyttalǵan jumystar atqaryldy. Jedel jaǵdaıdy turaqtandyrý maqsatynda polıtseıler negizgi krıterııler boıynsha halyqpen jumys júrgizip jatyr. Bul, eń aldymen, halyqtyń quqyqtyq saýattylyǵy, BAQ deńgeıinde qoljetimdi jáne túsinikti aqparattyq jumys, kóshelerde, qoǵamdyq oryndarda, alaıaqtyqtyń túrleri men ádisteri týraly jarnamalyq býkletter. Sondaı-aq, alaıaqtyqtyń jańa túrleri, olardyń jasalý joldary jáne aldyn alý sharalarynyń der kezinde qabyldanýy qadaǵalanyp jatyr», — dedi Arystanǵanı Zapparov.
Spıkerdiń aıtýynsha, qaladaǵy saýda ortalyqtary men sýpermarketterde ınternet-alaıaqtyqtyń aldyn alý boıynsha plakattar ilinip, qalanyń ortalyq kóshelerindegi elektrondy bılbordtarda ınternet-alaıaqtyqtyń ádisteri men túrleri týraly eskertpe beınerolıkter kórsetiledi.
Eske salaıyq, buǵan deıin alaıaqtyq sıpattaǵy jarnamaǵa baılanysty Qazaqstanda Canva servısi ýaqytsha buǵattalǵanyn jazǵanbyz.
