Alaıaqtar rásimdegen nesıe qalaı esepten shyǵarylady

ASTANA. KAZINFORM — QR Qarjy naryǵyn retteý jáne damytý agenttigi tóraǵasynyń orynbasary Oljas Qızatov alaıaqtar rásimdegen nesıelerdi esepten shyǵarý tetikterin túsindirdi.

Qazir qoldanystaǵy normaǵa sáıkes, alaıaqtyq jolmen rásimdelgen nesıeler tek sot sheshimimen ǵana esepten shyǵarylady. Al tutynýshylar quqyǵyn qorǵaý týraly jańa zań aıasynda ózge tártip engizý usynylyp otyr.

— Atalǵan zań jobasy aıasynda biz alaıaqtyq nesıelerdi sotqa deıin esepten shyǵarý tetigin engizip otyrmyz. Eger bank nemese mıkroqarjy uıymy azamattardyń jekelegen sanattary úshin osy zań jobasy aıasynda engizilgen 24 saǵattyq kútý kezeńinde olardyń mindetti qatysýy talap etiletin normany buzsa nemese nesıe alý úshin qosymsha kelisim alý talabyn oryndamasa, bul jaǵdaılardy ákimshilendirý jáne dáleldeý ońaı. Mundaı jaǵdaıda bankter men mıkroqarjy uıymdary bul nesıelerdi sotqa deıingi tártippen mindetti túrde esepten shyǵarýy kerek, — dep túsindirdi O. Qızatov Senatta ótken brıfıngte.

Sonymen birge, O. Qızatov alaıaqtar rásimdegen nesıeni tólep jatqandarǵa nemese tólemdi aıaqtaǵandarǵa qarajat qaıtarylmaıtynyn aıtty. 

Aıta keteıik, búgin Senat tutynýshylar quqyǵyn qorǵaý zańyna 24 túzetý engizip, Májiliske keri qaıtardy.

Sondaı-aq, Qazaqstan aýmaǵynda fılıalyn ashqysy kelgen sheteldik bankter aktıvine qoıylatyn talap 10 mlrd dollarǵa deıin tómendetildi.