Alaıaqtar onlaın kitap satamyz dep halyqty aldaýǵa kóshti

ÓSKEMEN. KAZINFORM – Shyǵys Qazaqstan oblysynyń polıtsııa qyzmetkerleri ınternet-alaıaqtardyń jańa ádisi týraly eskertti.

ShQO polıtsııa departamentiniń málimetinshe, alaıaqtar Telegram messendjerindegi shaǵyn qosymshalar arqyly áreket ete bastady. Olar tegin kitaptar katalogy retinde bezendirilip, qoldanýshylardy faıl júkteýge ıtermeleıdi.

- Messendjerdegi bottar kitap servısiniń jumysyna uqsatyp istelgen. Áýeli paıdalanýshynyń suranysyn qabyldap, kitaptyń qysqasha sıpattamasyn kórsetedi. Sodan keıin messendjer ishindegi oqý «turaqsyz» jumys isteıdi degen jeleýmen Android júıesine arnalǵan faıldy ornatýdy usynady. Muny bólek qosymshany júkteý qajettiligimen túsindiredi, - delingen aqparatta.

Al qosymshany júktegen soń alaıaqtar azamattyń telefonyn basqaryp, oılaǵandaryn iske asyrady.

- Sondyqtan onlaın kitap alǵysy kelgender jazylym negizinde jumys isteıtin, qosymsha faıldardy ornatýdy talap etpeıtin kitaptardy zańdy taratý servısterin paıdalanýlaryńyz qajet, - delingen habarlamada.

Eske salsaq, osyǵan deıin Petropavl turǵyny ınternet alaıaqtarǵa aldanyp, páterinen aıyrylǵany habarlanǵan.