Alaıaqtar kólik salyǵyn shuǵyl tóleýdi talap etip jalǵan SMS jibere bastady

ASTANA. QazAqparat - Memlekettik kirister komıteti banktiń mobıldi qosymshasy arqyly paıdalanýshylarǵa múlik jáne kólik salyǵyn tóleý qajet degen jalǵan habarlama jiberetin alaıaqtyqtyń jańa túri paıda bolǵanyn eske salady, dep habarlaıdy QazAqparat.

Habarlamany tapsyrýdyń qoldanystaǵy tártibine – habarlamasy bar tapsyrys hatpen poshta arqyly, salyq tóleýshiniń jeke kabınetine elektrondy tásilmen mobıldi qosymsha arqyly jiberý kiredi.

Habarlamanyń feık ekenin qalaı anyqtaımyz?

Mynalarǵa nazar aýdaryńyz:

- habarlama jiberýshini qate kórsetýi, mysaly «QR salyqtary» AQ»;

- múlik salyǵyn durys tólegen kezde Memlekettik kirister komıtetiniń memlekettik kirister basqarmasy kórsetilýi kerek, múlik salyǵy - jyljymaıtyn múliktiń ornalasqan jeri boıynsha, al kólik salyǵy – salyq tóleýshiniń turǵylyqty jeri boıynsha kórsetiledi;

- salyq tóleýdiń belgilengen merzimi bar: kólik salyǵy boıynsha – 1 sáýirden keshiktirmeı, múlik salyǵy boıynsha – 1 qazannan keshiktirmeı. Tıisinshe habarlamalar osy merzimge deıin árbir salyq boıynsha jiberiledi.

Este saqtańyz:

- eseptelgen salyq somasyn «kgd.gov.kz» saıtynda jáne «E-salyq Azamat» mobıldi qosymshasynda «Aldaǵy tólemder» servısinen, sondaı-aq bankterdiń Homebank jáne Kaspi.kz (memlekettik qyzmetter – salyq – kólik jáne múlik salyǵy- JSN terý) mobıldi qosymshalarynda bilýge bolady;

- salyq boıynsha bereshektiń bar ne joq ekenin «e-Salyq Azamat» (AppStore, PlayMarket) mobıldi qosymshasy→Elektrondyq servıster→Salyq jáne áleýmettik tólemder boıynsha bereshek servısi→JSN engizý arqyly tekserýge bolady.

«Salyq organynyń barlyq esepteýleri jáne tólengen salyq somalary salyq tóleýshiniń derbes shotynda kórsetiledi. Osyǵan baılanysty, anyqtamalyq aqparat alý úshin jeke tulǵalar Biryńǵaı baılanys ortalyǵynyń 1414 tegin telefon nómiri boıynsha júgine alady», -deıdi MKK.