Alaıaqtar habarlasqanda ne isteý kerek

ASTANA. KAZINFORM – QR Ádilet mınıstrliginiń resmı ókili Talǵat Ýálı turǵyndarǵa alaıaqtar habarlasqan jaǵdaıda ne isteý keregin túsindirdi.

Spıkerdiń aıtýynsha, alaıaqtar ózderin sot oryndaýshysy retinde tanystyryp, azamattardan qaryzdaryn óteýdi talap etedi. Talap oryndalmaǵan jaǵdaıda jeke shottardy, múlikti buǵattaıtynyn aıtyp qorqytady.

«Sizge osyndaı qońyraý tússe, Ádilet mınıstrliginiń, respýblıkalyq jáne óńirlik jeke sot oryndaýshylar palatasynyń resmı saıttaryndaǵy aqparatty óz betińizshe tekserip, qajet bolǵan jaǵdaıda bankke habarlasa alasyz. Atqarýshylyq is júrgizýdiń bar-joǵyn tekserý úshin ınternet-braýzerdiń izdeý júıesinde AIS OIP (Atqarýshylyq is júrgizýdiń avtomattandyrylǵan aqparattyq júıesi) dep jazý kerek, sodan keıin «Boryshkerler men tyıym salýlar tizilimi» bólimin tańdap, tek JSN engizý kerek», - dep túsindirdi T. Ýálı mınıstrlik uıymdastyrǵan brıfıngte.

Adam shyn máninde boryshker bolsa, qaryzy týraly aqparat, sot oryndaýshysynyń aty-jóni jáne onyń telefon nómiri kórsetiledi.

«Al eger boryshker bolmasańyz, qyzǵylt sary túspen «Suraýyńyz boıynsha eshteńe tabylmady» habary paıda bolady. Bul sizdiń shottaryńyz ben múlikterińizdi eshkim buǵattalmaǵan jáne buǵattaı almaıdy degendi bildiredi. Tek resmı derekkózderge senińiz, jeke derekterińizdi belgisiz tulǵalarǵa bermeńiz», - deıdi resmı ókil.

Qosymsha aqparatty 119 nemese 8 7172 58-00-58 nómirleri boıynsha alýǵa bolady.