Alaıaqtar endi Shymkent ákiminiń atyn jamylyp júr

ShYMKENT. KAZINFORM. Internet-alaıaqtar endi Shymkent ákiminiń atyn jamylyp, ońaı olja tabýdyń ádisine kóshken. Bul týraly qala ákimi jeli paraqshasynda jazyp, turǵyndardy saq bolýǵa shaqyrdy.

Shahar basshysynyń jazýynsha, WhatsApp messendjerinde ákimniń atynan jalǵan habarlamalar jiberilip, tipti aqsha surap jatyr eken. 

«Bul jalǵan! Muny ınternet-alaıaqtary jiberedi. Sizderden jalǵan aqparatqa senip, beıtanys nómirge aqsha aýdarmaýlaryńyzdy suraımyn. Sondaı-aq kúmándi siltemelerge ótpeńiz. Meniń Instagram, Facebook áleýmettik jelisinde tek eki resmı akkaýntym bar. Men barlyq habarlamalardy tek jeke telefonymnan jáne resmı akkaýntymnan jiberemin. Eger sizge meniń fotosýretim qoıylǵan jasyryn nómirden qońyraý nemese habarlama kelse, oǵan mán bermeńiz. Saq bolýlaryńyzdy jáne arandatýshylyqqa boı aldyrmaýlaryńyzdy suraımyn»,- dep jazdy Shymkent ákimi. 

Biz buǵan deıin alaıaqtar WhatsApp, Telegram jáne t.b messendjerlerde antıkor basshylyǵy men qyzmetkerleriniń atynan jalǵan akkaýnttar ashyp, jalǵan habarlamalar tarata bastaǵany týraly jazǵan edik. 

Ádilet mınıstrliginiń resmı ókili Talǵat Ýálı turǵyndarǵa alaıaqtar habarlasqan jaǵdaıda ne isteý keregin túsindirip bergen bolatyn.